هلا خواتي شحالكم ؟؟
انا بعرضلكم شي انا عايشتنه وملاحظتنــــــه وللأسف مب عايبني لا انا ولاريلي
انا لما حملت ثاني مرة اضطريت اييبلي خدامـــــــة تساعدني …. من دخلت الشهر الخامس ..
وبعد ماولدت والولادة كانت قيصرية حسيت اني تعبانة ومرهقة مب متفيجة غير حق بنتي الوليدة
وولدي الاول دوووم ويا الخدامة
حاسة اني تايهة وملخبطة وماعرف شي … ولدي فديته يوم صغير كنت وايد متعلقة فيه اموووووووووووووووووت فيه لكن من بعد مايبت شغالة وخذته عني صرت احس انه مب ولدي صح كلام قوي بس مادري ليش ّّ
يعني من ينش لين يرقد وهو عند البشكارة !!
ادري هالشي غلط بس هيه خلتني انفر منــــــــــــه
ريحة ثيابه ريحتها …. رمسته مثلها .. حتى يحبها ويباها .. ماخلت لي شي 
غير ها ولدي ماشالله عليه مشاغب ويتحرك وايد هو عمره سنتين ونص ودوم يلعوز اخته وهالشي ماتحمله ..
عشان جي احس اني معتمدة عليها واحس اني ابتعدت عنه اللي كان كل شي بحياتي فديته ربي يحفظـــــــــــــــــــه
هل هالشي طبيعي وفترة وبتعدي …
وشو الحل برأيكـــــــم ؟؟
وكيف اقدر اوفق بين ولدي وبنتي اليديدة اللي توها مكملة شهريــــــــــــن …!
اختي اول شي الحمدلله على سلامتج
ثاني الحين الحمد لله كماتي الشهرين وان شاء الله اتكونين بخير
امسك ولدج ولا تخلينه مع الخدامه ما اتعرفين شو اتعلمه ويوم بسافر اكثر بتتعبين
مثل يوم تطلعين مع ريالج شلي ولدج ولا تاخذين الخدامه ولا اتقولين ما اقدر انتي امسك البيبي وريالج مع ولدج او خليه يطلع مع ابوه بروح
وممكن اتخلين حد من الاهل يساعدج مثل اختج او اختي زوج
والله يحفظ ولدج من الخدامه
الله يعينج اختي
انا ما جربت الامومه.. وهذا اول حمل لي.. الله يسهل يا رب..
ترى هذا هو.. يوم بتخلين الولد عند البشكاره ٢٤ ساعه.. لازم يتعلق فيها اكثر عنج للاسف..
عشان جي انا مستحيل اخلي عيالي عند البشاكير.. يختي اموت من الغيره.. حتى لو تعبانه..
اذا بنتج راقده.. خلج ويا ولدج لعبيه ويلسي وياه..
وان شاء الله الاخوات (الامهات) يفيدونج
اختي مب كل شي تفرينه على البشكاره انتي تقولين اخليه من الصبح الين وقت الرقاد يعني هذا شي طبيعي ولدج ما يباج .. او شكلج اتعودتي .. الحين عودي عمرج ان بنتج يوم ترقد شلي ولدج ولعبيه خليه يتعود عليييج وما شاء الله كبير سنتين ونص يعني ما يباله عباله وايد ..
لا تقسوون عليها اكيد هييه روحها مضايجه
بس انتي تووج مربيه والحمدلله على سلامتج اهم شي ،،
ولانه البيبي تووه ولا انتي ما كنتي بتخلينه لكن في هالفتره رقادهم مب مرتب وصياح بس لو كبرت شوويه بتقدرين تسيطرين على الوضع ،،،
انتي حاولي في اوقات ما يكون عندها دامج موجوده في الصاله يلسيه وياج او فالحجره وخليهم يلعب جدامج لو مشاغب وددوم يوم بيسوي شي صح شجعيه وصفقيله واحضنيه ،، وقوليله كيف تستانسين يوم يسووي شي صح
حتى اخته قوليله انا ابغيك تيلس عدالها ما تخلي حد يمسكها انت اخوها وهيه تحبك
وانتي مثلا سويلها المرضعه او اي شي بس بسيط وانج تشوفينه من دون لا يحس عشان يحس انج تحبينه كثرها وتعتمدين عليه لو بيبي تراهم يفهموون
الحمدالله على سلامتج الغاليه ..
بصراحه انتي غلطانه حرام عليج كيف ماتبين يتعلق في الخدامه وعادي تحصلين نسى حضنج …!!!
والله مابغي اضايقج بس انا متضايقه عشان الولد … لازم الشده شوي عشان تتحلين بالقوه حبيبتي وتبعدين عنج اليأس
لازم اتسيطرين ع الوضع قبل مايبدأ ولدج يكره اخته ويحس الاهتمام والرعايه لها وهو طاف .. والله حرام ..
ماعليه الغاليه طولي بالج مع اليهال ،، ليش عيل الجنه تحت أقدام الأمهات << ترا والله مب لأي أم
وايد امهات مايعرفون شـــي عن عيالهم
بتتعبين وياهم فصغرهم ان شاء الله بيبرونج في كبرهم يالغاليه 
خلي الخدامه لشغل البيت بس أو تساعدج وياه في الرعايه مب يكون عندها طوالي بدرجه انه ريحتها فيه ويتكلم شراتها والله حرام
الله يعينج الغاليه ويعينا ع اليهال والله يعطيج العزيمه وطولت البال معاهم