ولدي والروضة

باجر بدخل ولدي الحضانة لانه عمره 3ونص يعني بس ابيه يتاقلم مع الوضع لان السنة الياية كي جي 1
وفكرت ادخله عشان ما يخاف من اليهال ويتعلم كيف يتعامل معاهم…

بس انا خايفة يصيح وااايد لانه هو وايد متعلق فيني وما اعرف شو اتصرف لو يلس يصيح..عظوني من تجاربكم الله يخليكم…اخاف تضيع البيزات عالفاضي.

يعني ابيكم تخبروني كيف اشجعه..

ولدي الكبير يوم دخلته الحضانة قعدت وياه شوي، ويوم التهى ويا اليهال طلعت عنه، وطبعاً يوم انتبه صاااااح، تقطع قلبي عليه صراحة، بس المس قالتلي عادي خليه، لين ما تعود

وبنتي هالسنة نفس الشي، دخلت الحضانة، وهاي متعلقة فيني اكثر من اخوها، صااااحت طبعاً ، بس قويت قلبي ، وخليتها ، تميت اطالعها من دريشة الصف، شوي تلعب، ويوم تتذكر تصيح، وعلى هالحالة لين ماتعودت

وطبعاً في البداية دوم كنت اتصل فالحضانة اسأل عنها، لاني ادوام وما اقدر اسير كل يوم، بس اشوف حريم ما شاء الله عليهن اييون يشوفون عيالهم من بعيد لبعيد، خاصة اللي توهم مسجلين

فنصيحة ، قوي قلبج، و ان شاء الله بعدين بتشوفين النتيجة وما بيلعوزج يوم بيسير الروضة ، بيكون متعود عالجو

انا بنتي هالسنة كي جي 1 ما شاء الله عليها حتى ما سوتلي باي باي ،، راحت الصف ولا طالعت وراها اتشوف امها شو اخبارها اتصيح ماما ولا لا ؟ ههههههههههههه وانا انقهرت الصراحة كيف استغنت عني بسهولة ههههههه

طبيعي بيصيح بس مب معناته انج ما تودينه اليوم الثاني يمكن حتى يصيح لاسبوع واكثر ،،
عقب يبتعود
تعرفين امي انا انجبرت تيلس ويا اخوي في المدرسة لثلالثة ايام وهي كانت تيلس وياهم في الصف والاستاذ اخر شي قال لامي ما يستوي جي لازم اتخلينه يتعود ،، وبدون ما يحس اخوي طلعت امي وخلاااص ،،

يعني بالمختصر لازم تتحملين صياحه وانتي بهداوة لا تعصبين عليه ،، وتمي امدحي الاولاد الثانيين زملاءه وبيغار منهم وبيهدأ ويتعود …