نقاط مهمة لكل وحدة مقبلة على التلقيح الصناعي او الانابيب او سوت التلقيح والانابيب

السلام عليكم ورحمة الله وبركاته ..

خواتي اشحالكم يارب بخير وسعادة بإذن الله .

حبيت افتح هذا الموضوع .. للي مسوين تلقيح صناعي او انابيب

او ناويين يسوون ..

بخبركم هذه القصة لوحدة اعرفها ..

انا اعرف وحدة مسوية تلقيح في توام ..

الكل كان يقولها : سيري عند الدكتور وليد وهو بيسويلج ..

قالت ما بسوي عند ريال وهذا مب ضرورة ابد .

بسوي عند حرمة .. وسوت عند دكتورة مها .. اللي كانت مع الدكتور وليد … سابقاً في مستشفى توام ..

طبعاً استخارت اول شي ..

وأكثرت من الدعاء والاستغفار والصدقة وتأكدت تماما : 100 % ان الله هو بيرزقها اذا سوت عند حرمة بدل الريال ..

والله انها حملت من أول مرة . ماشاء الله ..

واللي ما حملت من أول مرة . يمكن خيرة لها سبحان الله … او في شي ما سوته من الاشيا المذكورة سبحان الله !!!

======

شو الفايدة من هذه القصة الواقعيه ؟؟

1) حسن التوكل على الله .

قال تعالى : ومن يتوكل على الله فهو حسبه .

2) ترك الذنوب .. سبب للأرزاق من تبرج وغيبه ونميمة وغيره ..

الدليل : النبي عليه الصلاة والسلام قال : ان العبد ليحرم من رزقه بسببب ذنب يصيبه .

3) حسن الظن بالله .. والتفاؤل .

قال تعالى في الحديث القدسي ..: انا عند حسن ظن عبدي بي ..

4) تقوى الله .. يعني مخافة الله في السر والعلانية ..

وخاصة :: ان الطبيب ليس بضرورة انه يشوف مكان العورة يا اخواتي .. اقصد بالعورة يعني الفرج .

هل تشوفينها ضرورة .؟؟ وان اتأخر الحمل عشرين سنة ؟؟

ما دام شي وحدة تسوي .. الا هو تحط السائل المنوي في الرحم .. في التلقيح الصناعي ..

يعني هالشي بيد الله يا اخواتي ..

يعني هذه الدكتورة تسوي فقط السبب .. وانتي تبذلين السبب ..

صدقيني اتركيها لله … والله يعوضج خير ..

سيري عند طبيبة احسن لج … وطبعا قبل كل شي استخيري الله تعالى .. عشان يكتب لج اللي فيه الخير ..

5) الاستغفار .. يفتح الاقفال .. ويزيد الارزاق والاولاد .. ويغفر الذنوب ..

والدعاء … يرد القضاء ..

والصدقة … تدفع البلاء … وتداوي المريض وغيره

كما قال عليه الصلاة والسلام : داووا مرضاكم بالصدقة ..

والله اعلم .