نصايح لمقابلة الخطاب - امارتيات الخليج

خواتي لاحظت الكثيرات يسألن شو يلبسن ؟وشو يسون لما أيي حد ؟يشوفهن علشان الخطبة والزواج .بقول لكن من واقع خبرتي لأني أخواني الله يحفظهم أغلبهم تزوجوا وأنا الكبيرة فأنا وأختي مع وجود الوالدة الله يحفظها الله خطبنا ليهم . والحين صديقاتي وقريباتي ياخذني معاهن يوم يروحن يدورن عرايس لخوانهن أو قرايبهن. وهذه نصايح بسيطة :
المهم والأهم أنه تكون البنت طبيعية وملابسها ومكياجها يكون بسيط , وطبعاً ما تحتاجن أقول لكن عن النظافة الشخصية مهمة لكل مرأة, خلي ريحتج حلوة بس خفيفة , لا تحطي عطر قوي ولا بخور يزكم . لو بس زيارة حريم عادي تطلعي شعرج أو تطلعي قصة ما مشكلة ( لا تنسي تكوني محصنة نفسج بالأذكار الصحيحة فالعين حق) ولبسي لبس بسيط ومحتشم يعني جلابية, مخورة, بلوزة وتنورة كله زين .بس ما تطلع للحريم بكت وحفر ولا شورت وبودي أو بجامة نوم أو لبس قصير ! (أقول كذا لأني شفت العجب)! وما في داعي للمكياج الأوفر! ولا في داعي للكعب اللي فوق 2سم !
في التعارف والشوفة أكيد الحريم بيسألن أسئلة, عادة هذه الأسئلة عريس المستقبل طالب منهن يسألنها. فخليج طبيعية وجاوبي عادي.الأسئلة أكيد عن العمر والدراسة والهوايات وإذا حافظة شي من القرآن…. الخ.
لو الزيارة هي للرؤية الشرعية والشاب بيشوف البنت , البسي شي محتشم يفضل عباة ساترة ومكياج بسيط جداً وما في داعي بنات لكيلو بودرة وكيلو فاونديشن! ومن اللي شفته نصيحة غطي شعرج كامل ولا تطلعي قصة لأنه فيه شباب يرفض تماماً يتزوج وحدة مطلعة شعرها قدامه قبل الملكة حتى لو كانت فيها كل الصفات الزينة ! ( صارت قدامنا أكثر من مرة) لو يبغى يشوف شعرج بيقول لج أو بيقول للحريم يقولن لج. . لو كان جسمج مليان البسي ما يغطي عيوب جسمج, وإذا بتلبسي مخورة وأنت سمينة خلى خامتها ما تلمع , لأن لمعان الخامة يبرز السمنة أكثر.خلج طبيعية وهو يسألج وجاوبي وأنت اسألي لو عندج أي أسئلة, بس خليج ذربة لا تسألي سؤال محرج , حتى لو من حقج تعرفيه , خلي خوانج أو أبوج بعدين يسألوه , من حقج تنظري له وتشوفيه, بس فيه بنات يمكن من الإرتباك ما تنزل عيونها عنه! ههههه وهذا ما يعجب معظم الريايل.لا تنسي الخجل زينة المرأة .
هذه نصايح بسييطة أتمنى تفيدكن بنات وربي يرزق كل بنت الزوج الصالحة والذرية الصالحة.