مشكلتي والفون

مرحباً بنات شحالكن
وايد ترددت قبل لا اكتب مشكلتي بالتفصيل لأني قبل كنت منزله مواضيع تخص هالسالفه ومالي حد اشكيله غيركم
مشكلتي نفس مشكلة وايد من البنات الي تعرفن على شباب ويكلمونهم بس انا وايد خذت راحتي وخنت ثقة اهلي فيني بقولكم التفاصيل وادري اني انا الغلطانه واستاهل الي استوالي
مشكلتي بدت تقريبا من 4 او 5 اسنين اول ما دخلت الكليه كان ما عندي فون اهلي مب مقتنعين انه البنت يكون عندها فون خاص فيها كنت اشوف البنات بالساعات يدخلن الجات وويسولفن ويا الشباب وما يحسن بالوقت في لحظه ضعف قلت بجرب بشوف اذا عيبني الوضع بكمل قمت اكلم فلان وعلان وأخذ ارقامهم واتصل من فون البيت حتى دولي كلمتهم بعد سنه طلعت من الكليه وحده من البنات اتصلت ع البيت وخبرت أمي بالسالفه بس ما صدقوها لأني انا طبعي مب جي فالبيت احسن وحده في خواتي وخدوم والكل يحبني ويقدرني وانا استغليت هالشي المهم طلعت من الكليه ودخلت الجامعه وعقب ما كملت سنه خذولي فون وكنت من قبل متعرفه على واحد واتصلبه من البيت ومن خذت الفون ما اكلم حد غيره مع اني ما كنت احبه بس جي اتسلى أمي لاحظت انه اتصالاتي زادت وكلمتني وأخوي العود عرف اني اكلم واحد ويا ونصحني بكل هدوء وما سوالي شي قطعت فتره وتعرفت ع حد يديد وقمت اكلم 3 في نفس الفتره ونفس الشي اخوي عرف عن واحد بس ويا كلمني وبعدني ما تبت اقطع فتره وارجع اكلم لأني تعودت على هالشي 4 سنوات واكثر المهم خلصت جامعه وكنت بعدني على طبعي بس ما ارمس جدام اهلي المشكله بدت في اواخر رمضان وكنت اداوام يا اخوي وقالي حالمنج مسويه مصيبه وأخوي اذا حلم ولا حس بشي يصدق إحساسه وقالي عطيني فونج أشيك عليه وكان شاك في رقم وتم يسألني عنه وكان يعرف اسمه ومن وين قالي هالمره ما بسكت خلاص ما اقدر أتحمل ذنبج وبخبر أبوي عليج هنيه أمي مل خلته قالتله سو الي تباه فيها بس لا تخبر أبوك عن شي قالي طلعي من دوامج اذا ما تبينه يعرف عاد انا كله ولا أبوي يعرف سوالفي والله بطيح من عينه وانا عنده اسوى عيونه المركبه قلتله اوك وخبرت أبوي اني خلاص ما اقدر ع الدوام وكراف وتعبت قالي راحتج اهم اذا تشوفين عمرج تعبانه ودري الشغل وهو يحليله مايعرف اني مجبوره المهم اخوي خذ الفون عني وعطاني اياه فالعيد بس أنا ما تأدبت طرشت مسجات حق الي أعرفهم عشان ما يتصلون لانه الفون احتمال ما يكون عندي وواحد منهم اتصل علي الفير ورديت عليه وأخوي طلع مراقب فوني ويعرف كم مسج طرشت والأرقام الصادره والوارده من عقبها سحب عن الفون واللاب واحين تقريبا من 5 شهور وانا بدون فون وذيج الفتره كانت نفسيتي زفت ونقص وزني تقريبا 9 كيلو وكنت وايد اخاف من اخوي ما اقدر أحط عيني في عينه واتجنبه بس خفت اخسره لانه هوطبعه اذا صد عن الواحد خلاص ما يعطيه ويه هنيه انا قمت أتقرب منه ايب له الشي قبل لا يطلبه وتغيرت وايد قمت اصلي القيام والتزمت بالاستغفار والحمدلله كنت أصوم الايام البيض عدت الايام وخطبنا حق اخوي وكنت أنا الي اتشراله ويا أمي مع انه عندي خوات اكبر عني وكنت في هالفتره وااااايد قريبه منه لأني كنت ادعي ربي ان الله يحنن قلب اخوي علي والحمدلله استجاب دعائي قبل الخطوبه بكم يوم سالت أمي عن الفون وقالتلي هي ناويه تكلمه عشان يرده لي كلمته وما وافق لانه لين الحين بعده مب واثق فيني ويوم انخطب بياخذ لي واحد غيره وحاولت فيه أمي ورد عليها اذا تبيني اردلها الفون اخبر أبوي عن سوالفها قلت حق أمي خلاص مابغيه وخليه يستر علي
الحين شو المطلوب مني عشان ارد ثقه اخوي فيني لا تقولون لي كلميه أنا ماقدر اكلمه أمي الوسيط بينا السالفه وايد هامتني لدرجة اني ما قمت اكل ولا اقدر أرقد نصحوني شو الشي الي اقدر اسويه ويثبت له اني خلاص تغيرت *
ادري عورت راسكم ويمكن كلامي مش مرتب وسمحولي
دعواتكم لي بالزوج الصالح في القريب العاجل

الصرااحه ماعرف شو اقلج يعني اخووج كم مره معطينج فرصه وانتي تخوني ثقته ؟؟؟

رمسي اخووج قبل لايعرس لانه لو عرس بينشغل ويمكن ماتلاقين فرصه ترمسينه اعتذري له وخلي يعطيج اخر فرصه اذا انتي قدها ..وربي غفور رحيم ..

اختي عليج بالاستغفار صدقيني ربج اللي يغفر الذنوب وان شاء الله يحن قلبه عليج وترجع ثقته فيج

الله يهديج ان شاء الله ..

اشغلي نفسج بأشياء ثانيه وصدقيني اخوج خايف عليج عن تغلطين ولا اتطيحين من عينه مره ثانيه تراها ماهي هينه للريال انه يسكت عن اخته هذا شرف .. ماشاء الله عليه سكت عليج اكثر عن مره وصبر بس للاسف انتي ماحترمتي هالشي ..
فنصيحتي لج ودري التلفون وخذيلج آي باد ولا اي بووود عوضي نفسج فيه ,, وادخلي مراكز تدريب اتفيدج ومالج حايه للتلفون لين ماتعرسين ان شاء الله ..

نفسي ضعيفه ماقدرت ايودها والصراحه ماقدر اكلم اخوي وافتحله الموضوع مره ثانيه ابغيه ينسى ولو انه هالشي ما ينسى بسهوله لانه مب شوي عليه

لا تستعيلين ع الفون الحين ,,,
اذا بينتيله انج مب مهتمه وانج تغيرتي ,, هو بروحه بترد ثقته فيج

عسى الله يستر ع بنات امة محمد اجميعن و يحقق اللي في بالج