مشكلتين وابا حل ممكن اتساعدوني ؟

اشحالكم خواتي وشو الاخبار والعلوم ….؟؟؟

الله يسلمكم عندي مشكلتين تخص اعز ربيعاتي وماعرفت شو الحل …وحاولت اساعدهم باني انصحهم بس ترددت واتمنى انكم تعطووني حلول عسب اروم اساعدهم ..

اول مشكله الله يسلمكم … (( حمات ربيعتي تبا ولدها ياخذ على حرمته بنت خاله ))

ربيعتي عرست وخذت ولد عمها وحماتها تحبها وماترضا انه حد يقول شي عنها … وادافع عنها وربيعتي بعد اتحبها وايد وبدت سالفة حماتها قبل 7 شهور وكانت حامل … المهم قامت حماتها تتضايق منها وما اتيها لانه ربيعتي ساكنه فبيت بروحها … استغربت انها اتغيرت عليها 180 درجه …وهيه ما سوتلها شي بالعكس …المهم سالت ريلها شو السالفه وطبعا بروحه مايعرف وقبل 3 شهور ربت ويابت ولد …المهم حماتها زدت من اللي اتسويه انها تتصل واتقول غيرتي ولدي عليه … انتي شو اتقولين عليه ومن هل السوالف واخرتها قالت حق ولدها انها ياخذ بنت خاله … ربيعتي انصدمت ماعرفت شو اتقول شو السالفه وليش هيه شو سوت ..هيه مب مقصره فبيتها وريلها وعمرها ما غلطت على حماتها واخرتها تبا ريلها ياخذ عليها وحده ثانيه وهيه توها مربيه ليش شو السبب ماتعرف وخلاف عرفت انه بنت خال ريلها هيه اللي تباه لانه قبل كان محيرينها له من صغرهم بس ماكان شي نصيب المهم ابوها هو اللي رمس اخته اللي هيه حمات ربيعتي عسب ولدها ياخذ بنته انا بصراحه اول شي جذبتها قلت لا مستحيل في بنت جي وابوها بعد قلت لالالا ماصدق بس حلفتلي وهيه مغصوصه .. استغربت المهم كملت وقالت انه حماتها قايله حق ريلها اذا ماخذت بنت خالك ازعل عليك ولا انا امك ولا انت ولدي حاول وياها ماشي فايده وتتصل في ربيعتي تهددها انها بتشل ولدها عنها وبطلقها من ريلها اذا ادخلت ….خبرت امها عاد امها ما صدقتها …وهيه عاد قالت حق ريلها اذا بيتزوج عليها ما بتم فالبيت وتبا تتطلق ما بتتحمل …

شو رايكم شو الحل شو اتسوي ماتعرف وتباني انصحها انا بصراحه ماعرفت شو ارد عليها … وقلتلها حاولي ويا ريلج واتفاهمو وقلت قعدي ويا حماتج واساليها انتي شو سويتي بس ردت عليه قالت انها ما تعطيها فرصه عسب تتفاهم وياها من اتشوفها اتطيح فيها هزاب .. وريلها مايعرف شو يسوي هذي امه ومايقدر يزعلها وهذي حرمته يحبها ولا يبا ياخذ بنت خاله لانه اصلا رافض والسبب محد يعرف …

انتو بشو تنصحونها ….. ((…………….))

والمشكله الثانيه الله يسلمكم …ربيعتيه مالجه بس ما تقدر تستمر ويا ريلها

ربيعتيه الثانيه مالجة من شهور طويله وسالتها فلانه يالله متى العرس عسب انفصل يعني غلاسه قالت ماعرف وبعد السوالف رمستني وقالت انها ما تقدر اتكمل وتعرس قلتلها افا ليش بلاه الريال مسوي شي قالت لا الريال طيب بس ما تقدر تعرس والله احترت وتميت على راسها لين ما رمسة وحسيت انه صوتها اتغير قالت مب قادره تتحمل ريلها اكثر حاولت تتاقلم عليه بس مب قادره اتحس انها بتظلمه قلتها استهدي بالله واستغفري هذي حالة كل وحده تملج وقرب عرسها ..تعرفون انها لين الحين رافضه تتزهب .. قالتها اذا كنتي ما تبينه ليش وافقتي عليه من الاساس قالت انها استخارة اكثر من كم من مره بس ما حست بشي فقالت حق اهلها يوم سالوها وحشروها عسب يردون عليهم لانهم وايد بطوا عليهم فالرد فوافقت اول فتره ما كنت ترمسه ولا تكلمه ويوم حاولت تتقرب منه عسب تفهمه ماقدرت مب قادره تتحمله ابدا ولا تتصور انها تقدر اتعيش وياه فبيت واحد قلتلها خلاص رمسي اهلج قالت ما تقدر اتقوللهم يبون سبب مقنع وفوق كل هذا ماتقدر اتقول حق ريلها ما تطيق اتشوف رقمه ولا اتكلمه هني عاد قلت البنت هاي فيها شي شو بلاها ينت كل حل عطيتها ما تقدر اتسويه والحين اجلت عرسها بعد كم من شهر

صدقوني احتر وياها …وماعرف شو اقوللها الحين خبروني فديتكم فشو تنصحونهم

واسمحولي لاني طولت عليكم

وأحب أخبركم شي بخصوص الطلاق… طول ما الياهل صغير القانون يحق للأم انها تاخذه وتربيه والأبو ما يتنفس