لا تفرضين نفسج على زوجة أخوج (( مشكله نعاني منها نحن المتزوجات ))

هلا خواتي الغاليات

الصراحه بنات انا وايد متضايقه من اللي يالس يصير … من تتزوج الوحده وتعيش في بيت أهل ريلها او حتى في بيت مستقل .. أهل ريلها مايخلونها في حالها يعني يطيحون الميانه زياده عن اللزوم خاصه اذا كانت حرمت ولدهم طيبه وياهم .. يعتقدون كل شي بيسونه بيكون عادي عندها وما بيضايقها .. واقصد من كلامي

1- الزيارات المفاجئه

2- التدخل في شؤونها هي وزوجها …………. الخ

أدري بتقولون هي السبب وهي اللي سمحتلهم يتمادون ……… بس انا بقوللكم لا انتوا غلطانين … أولا مافي وحده أتيب حق عمرها صدعة الراس صح ولالا … وثاني شي اذا دخلوا عليج أهل ريلج فجأه شو بتسوين يعني بتطردينهم ؟ ولا بتبينين لهم انج متضايقه من زيارتهم طبعا لا أحتراما لزوجج صح ولا انا غلطانه ؟ ………. وثالث شي هذا سببه في رايي قلة التربيه والذوق يعني الانسانه الفاهمه والعاقله واللي تعرف الصح من الغلط مابتسوي جيه بالعكس بتحترم خصوصيات أخوها وحرمته .

خواتي لاتشوفون زوجة ولدكم طيبه وحبوبه وتقولون خلاص بناخذ راحتنا .. هاذي مهما كان غريبه عنكم ولو حتى كانت من الاهل .. ما بترضى تدخلون عليها فجأه وهي مب لابسه وكاشخه .. لازم تراعون ظروفها الوحده في بيتها تاخذ راحتها وتلبس اللي تباه مابتيلس أربعه وعشرين ساعه تلبس تحسبا لاي زياره مفاجئه

والصراحه بعض اهل الازواج تصرفاتهم زادة عن حدها .. مثلا اختي يوم كانت ساكنه في بيت اهل ريلها بس في فيلا مستقله عدال فلتهم والله ان خوات ريلها يدشون عليها في اي وقت حتى وقت راحتها يعني بالليل وحتى أبوه مع انه كبير في السن والمفروض يكون فاهم وعارف أوقات الزياره لكنه في اي وقت يدخل عليها ومرات تكون بقميص نومها وتركض داخل علشان تغير ومرات اذا ريلها عنده ضيوف وهي يالسه في المطبخ اتحضرلهم أكله يدشن خواته يغثونها ويدخلن في كل شي تسويه بحجة المساعده انزين هي ما طلبت منكن مساعده واختي عاد من النوع اللي ماتحب حد يدخل فيها اتحب اتسوي كل شي بروحها وعلى راحتها.. وحتى يوم كانت ترجع من السوق وشايله في ايدها اكياس من أتحطهم تقوم أخت ريلها وتيلس أتفتح الاكياس وتشوفها شو مشتريه واختي عاد يرتفع ضغطها .. وكل ما كلمت ريلها للاسف يلس يدافع عن خواته لان شخصيته ضعيفه ودايما يسمع كلام خواته . الصراحه شافت الويل منهم وفي الاخير أطلقت وهم السبب في طلاقها لانها مول ما كانت مرتاحه بسبب تدخلاتهم فيها وفي ريلها . وياما حاولت وياه يطلعهم في بيت بروحهم بس كان يرفض وفي الاخير ما كان جدامها الا الطلاق