.
.
.
أمهـات دخيلكم ساااعدوني بحل ،، خصوصا اللي تشتغل أو تدرس ،،
عندي نونو ربي يحفظه عمره شهرين تقريبا ،، وأنا بجر وما عندي خبره فهالأمور،،
وأنتوا عارفين هالمرحلة رقاده مب ثابت خصوصا فالليل،، وأنا هالفترة إجازه أسهر وياه ،،
وأرقد وقت النهار من التعب ،،،وخواتي الحمدلله من حولي بس يوم برجع بيتي بكون بروحي
وبرجع الدوام بعد كمن أسبوع ،، ووايد شاله هم كيف بداوم وانا مب راقده الليل،،،
يبت خدامه فلبينية،، وجربتها في بيت هلي ،، هي مع الياهل وايد أوكيه ،،، حرمه عودة شوي
مادري هل أخليها تسهر وياه الليل؟ وبعدين كيف بتم معاه الصبح لين أرجع الدوام..؟ وطبعا بيكون
2 ونص أو 3 الظهر أطلع من الدوام،، أخاف مالها طاقة تمسكه ويمكن من تعب السهر قلبها ما يكون ع الياهل فترة دوامي الصبح،،
أتمنى تفيدوني بتجربتكم ،، شوه تسووين مع النونو خص في هالعمر؟ كيف نظام رقادج والياهل من يداريه فالليل؟
وكيف طاقتج فالدوام مع السهر ؟ أو حد ثاني يسهر وياه؟
ومشكورين خواتي ،، ربي يكتب كل خير لكل وحده ترد ولو بكلمة طيبة،،،
حبوبة انا نفسج بجر… وفالاربعين كنت فالبيت ما قضيتهم فبيت ابوي.. ما بقول لج تعب لا الا تعب وسهر وحالتي حالة … اول شهر من عمر البيبي كنت بروحي لان الخدامة وايد طولت من المكتب .. المهم مثل ما قلتي الرقاد فهالفترة يخترب وايد.. بس شوي شوي بيعتدل والبيبي ما يقوم الا اذا هو يوعان او حفاضته مضايقتنه… انتي شوفي كم مرة اترضعين البيبي واذا فكرتي فالصناعي كونج بداومين فابدي من اللحين على الاقل رضعتين مع الطبيعي وبتزيد الرضعات مع الوقت… الياهل فهالفترة محتاج للحليب كل ساعتين ..وكانت امي دايما اتقول لي متى ما ينام علاوي نامي معاه.. بس كنت احاتي الملابس والتنظيف وغيره..بس فعلا تاقلمت ما بقول لج صعب بس والله شوي شوي تاقلمت ساعات كنت اروح الدوام وانا مب نايمه غير ساعتين او اقل..
دايما خلي الرضعه بالليل دفي الياهل ونيميه فسريره ونامي على طول معاه… اذا مب يوعان يمكن يسحبها نومه من 3 ل 5ساعات متواصلة ومع الوقت بتزيد عدد ساعات نومه..
والله يقويج حبيبتي حاسة فيج وان شاء الله ماجورة على كل شي…
بخصوص البشكارة خليها من الصبح معاج…ووقت ما البيبي واعي علميها كيف اتبدل له الحفاظات وكيف اتنظف المكان.. خاصة اذا بنوتة.. وكيف اتشل الياهل واتشربه الحليب .ولا تنسين اتعلمينها كيف اتصدر له .. ومن ينام البيبي خليها اتنظف البيت وفنفس الوقت بالها مع البيبي…
بس انها تسهر مع البيبي بالليل غلط …صدقيني انا كانت اتيني فترات ارقد علاوي بيني وبين ابوه احسه ينام مرتاااااااح لانه يكون حاس بامه وابوه..
الله يعينج ويسهل عليج تربيته
حاولي اتعودينه على النوم فالليل من الحين
مثلا من الساعه 10 تبدين الروتين وهو تبديله بامبرز وتقمطينه
بعدين ترضعينه او تعطينه رضعه صناعيه
وجهزي جو الغرفة للنوم من تكييف واضاءه خافته وهدوء
يبتعود ان شاء الله وبيعتدل رقاده بس يباله صبر وطولت بال
عواشهـ . .
مشكورة وايد ع كلامج ،، المشكلة اني ماعرف أرقد نفسي معاه ، لأن حاليا رقادي مخترب ،،، يمكن مع الدوام بنام الليل ،،،
والصراحه قلبي مب مرتاح أني أخلي ولدي مع الخدامه فالليل ،، الله المستعان
Memeyah
تسلمين حبوبه،، كل حد قالي يوم بيكون ست شهور بيعتدل رقاده وبينام وقت أطول،،
هو تييه ليالي يتم واعي لانه ينام من 9 أو 10 وعلى الـ 12 فالليل وعى ويتم مبطل عينه لين 2 ومرات 3
ياخذ غفوة وينش يمكن خمس مرات ،، بحاول والله يسهل علينا وعليكم يارب
الصراحه الله يعينج صدج تعب انا ما اداوم وبنتى الله يهديها احينه بتكمل 4 شهور ماشى رقاد مع انها ترقد حذالى على السرير وانش الصبح جنه شاله بنايه فوق راسى من التعب والصداع وقل الرقاد احيانا من يطلع النهار افرها عالخدامه تشيلها حتى ساعتين احط راسى فيهم شوى وانتى الله يعينج وان شاء يعتدل رقاد ولدج لين اييه وقت الدوام