السلام عليكم ورحمة الله وبركاته
طبعا نعرف انه الحرمة يوم تربي تسير عند اهلها لمدة 40 يوم،،
سؤالي يا أخواتي،، في هالفترة هل صدق تستفيدون من اليلسة في بيت الوالدة؟
وشو الشيء اللي هم ينفعونج فيه اللي ما تقدرين تسويينه لو كنتِ في البيت بروحج؟؟
و بعد الأربعين هل تحسين انه صدق استفدت من مساعدة الوالدة؟
ويوم انتِ ترضعين طبيعي بدون استعمال غرشة كيف يساعدونج؟
بانتظار ردودكم
انا الحين في الاربعين..
من اسبوعين ربيت ويبت بنوته والحين في بيت الاهل..
الوالده تساعدني بالخبره والمعلومات لانها بكري..
وثاني شيء راحه نفسيه وتفضين للياهل ولعمرج وتكونيين بعيده عن مسؤوليه البيت ..
وثالث شيء امي ما تقصر تسويلي الخلطات الشعبيه والحبه الحمرا والمشروبات الساخنه وتدير بالها علي ..(الله لا يحرمني منها)
بس افكر الحمال الياي ما اتم في بيت اهلي وايد يمكن بس اسبوع او اسبوعين وارد بيتي..
على حسب ….انا ماارتاح الا في بيتي
بيت أهل اكيد غير … منو بيسبح البيبي … منو بيسويلج الاكل و ييبه لين عندج ووااااااااااااااايد أشياء ما تقدرين تسوين و انتي في بيتج..بتتعبين …فديتها أمي والله …الله يطول بعمرها.
فحال لو كنت عند ريلي مستحيل يسوي لي ها كله
ظني بممووووت من البرد والمرض ومحد يعرف ..خخخخ
ها الرد ظحكني,,,
طبعاً بيت الأهل أحسن لأنه ما بيكون عليي واجبات الا تجاهي و تجاه البيبي,,,, و محد له شي عندي,,, لو في البيت الريال يبا حد يحطله الأكل و يجابله و يزهب ثيابه و اللي تكون في الأربعين ما تروم على ريال يتطلب و يتدلع و يأمر عليها,,, فتسير عند أمها أخير
الله يسهل عليه إن شاء الله …
على حسب وين بترتاحين وتاخذين راحتج اكثر .. انا صراحة امي حرمة كبيرة وماتقدر تعابل الياهل .. قعدت اسبوعين عندها والبقية في بيت ريلي ..