عيادة VLCC

أنا من زمان كنت مشتركة في مركز VLCC وبشرحلج عنهم بالتفصيل :
– أول مره تروحيلهم يكون إستشاره مجانيه يقيسون وزنج و طولج و BMI وبعدين تيلسين ويا حد من الموظفات بتشرحلج كم المفروض يكون وزنج و شو الأنظمه اللي تصلحلج وبتخيرج بين مجموعة جلسات و وبتسويلج Package بالجلسات التي تحتاجينها وبتعطيج السعر المطلوب…طبعا انتي مخيره بين أنج توافقين و تدفعين المبلغ أو إذا مب عايبنج تقوليلهم بفكر وبرد عليكم خبر و من تظهرين من الباب ما يشوفون ويهج (يعني تطنشينهم)

– في حالة أنج وافقتي ودفعتي بتقابلين أخصائية التغذيه وبتشرحلج شو بتسوين و بتعطيج نظام غذائي وبتعطيج موعد لأول جلسه وبياخذون مقاساتج
و نظامهم عباره عن شيئين الشي الأول إتباع نظام غذائي تعطيج ياه اخصائية التغذيه في المركز والشي الثاني الجلسات.

– الجلسات أنواعها وايده عندهم منها جلسات أجهزه ومنها جلسات مساج تنحيف وشد جسم
أنا مثلا في أول مره أشتركت معاهم خذت 15 جلسه عباره من 5 تنحيف 5 شد جسم و5 مساج كلفوني 3750 درهم تقريبا بس حسيت بتغيير في جسمي و خفيت عليهم 5 كيلو تقريبا لأني ماكنت مطبقه الريجيم عدل و ما كنت أسوي رياضه مع أنه عندهم صاله أجهزه رياضه صغيره و يسوولج ايروبيك اذا تطلبين من دون سعر إضافي.