عن تجربة – ماذا حدث لي بعد حبوب التخسيس

شحالكن خواتي ؟
بصراحه هالكلام فـ قلبي من زمان

وزني وطولي ولله الحمد متناسقين
بس الطمع شين

حبيت اني اضعف اكثر
اشتركت سنة كامله ف نادي صحي ، وواظبت ع نظام صحي
وحياتي كانت صحيه 100% .. ما كنت احب سوالف شراب التخسيس
ولا سوالف المشروبات اللي نسويها فالبيت شراة الزنجبيل وخل والخ الخ
كنت أؤمن بنظرية ان الواحد ما يخسر وزنه بسرعه

ف هالسنه بس خسرت تقريباً كيلوين ، بس بين علي أن جسمي صار أحسن من قبل
يمكن كسب عضلات وحرقت دهون .. هاللي ما خلا وزني يتأثر وايد
بس ك شكل للجسم كان واضح ان تغير

ما كنت حابة أن الرقم فالوزن ما ينقص !
ياني هوس ، وعقب فترة طويله من البحث والأسئله فوق ال 6 شهور يمكن .. قررت اخذ حبوب تخسيس بدون ذكر الاسم ..

ف كل مكان يبيعونه ع أساس أن آآآآمن جداً .. حتى فالمحلات الموجودة في المولات واللي تبيع منتجات طبيعية كانو ينصحون بها وبشدة

وجفت آراء الناس حوله وما جفت حد يتشكى منه
خذته شهر بس
مع اتباع النظام الموجود عليه ، وحرصي اني اسوي رياضه

ما اجذب عليكم خلال شهر بس بعد ما كملت الجرعة
فقدت أغلى نعمة في الحياة
وهو صحتي !!!

خسرت 14 كيلو ودخلت الانعاش مرتين ، لاني كنت ارجع بدووون سبب وبدون لا آكل شي
وكل المستشفيات احتارو ف أمري ..
مرت شهوور وشهوور كنت افقد فيها حياتي ونفسي تدرييجياً ..
التهابات في المعدة والدم وتضحم الكبد .. وحصاة في المرارة ما أكبرها ..
وصارت لي مضاعفات في جسمي والكلى عندي باي باي ..

كملت أكثر من سنة ع سالفتي هذي .. ولازلت في كل فترة اتعالج كل يوم مشكله ورا الثانيه
كل حد يجوفني يقول ضعفانه وجسمج ضعيف مب بصحتج ..

انا فقدت أغلى نعمة موجودة ..
اتمنى يرد الزمن لورا .. واعق الحبوب اللي خذتها

ع فكرة يا خوات .. حتى الرجيم بدون حبوب أو هالخرابيط بدون استشارة ودراسة وترتيب جدول الرجيم الخ يسبب مضاعفات خطيييره جداً مستقبلاً .. ممكن لو سمعنها فيها نستهين فيها الحين

انا الحين ممنوعة من وايد اكلات .. بس عسب ما اخسر صحتي اكثر
اتمنى لو يرد فيني الزمن لورا وأكل واشرب ومهتمه بنفسي ولاعلي من وزن مجرد ارقام فقط

بس الحمدلله ع كل حال

ما حطيت لكن هالموضوع .. إلا لأني ما أبي أي وحده تفكر نفسي تخاطر بصحتها ولو كان ضمان المنتج 100%

والله يحفظكن يميع ويديم عليكن نعمة الصحة والعافية