ساعدوني؟؟

بنات مابركتولي انا ملجت الخميس الي طاف والحمدالله على كل شيء..الله يكون عوض لي ان شاءءالله..

بس المشكله يا بنات الصدمه…اني بزوج في اول اربع.او تاريخ اربع اربعه .يعني ما يمدلي اسوي شيء ماعندي وقت غير اسبوعين…؟؟

احتفال ما بنسوي عرس كبير …لاني مطلقه احس كبرت على هل السوالف
ماعرف محتاره البس فستان ابيض او اسوي جلابيه فخمه..او اكنسل سالفه العرس بالمره..؟؟ عزومة وخلاص ونروح وياه افك عمري..؟؟ حايره

الي افكر فيه الحين الزهبه…كيف ازهب في اسبوعين..لا دوامي طويل..؟؟

بنات ساعدوني كيف اتزهب 30 الالف..؟؟ شو اشتري شو ما اشتري

عاادي أختي بيمديج اتزهبين .. اتشري الأشيا الضرورية اللي تبينها ولا تتشريين وااايد
شوية عطور على كم جلابية على كم مغربية فخمة للعزايم..
.. وعقب العرس تقدرين تتشرين ع راحتج وحسب احتياجاتج وبتعرفين شو تبين بالضبظ

وبالنسبة للفستان الأبيض .. لا تتنازلين عنه .. حتو لو فستان بسيط .. من حقج تستانسين ومن حق ريلج يشوفج أحلى عرووس بها اليوم

الف مبرووووك ويعله عوووض لج ان شالله ..

امـمم انا ماعندي افكار وايد بس بفيدج باللي اعرفه ..

بما انج مطلقه .. حفله صغيره فالبيت تكفيكم …واذا انتي تبين تسوين عرس ليش لا اهم شي راحتج الغلا

وبما انه دوامج طويل اكيد بيكون عليج ضغط وايد … بس اهم شي انج ماتفكرين ولاتلعوزين عمرج .. نظمي وقتج

من تردين من الدوام تغدي وريحي لج شوي واحجزي لج جلسات حمام مغربي وماسكات ومن هالسوالف .. امـمم ماعرف انتي من وين بس انا اعرف بعض المراكز في العين وفبوظبي ..

وبالنسبه للزهبه لاتكثرين خذي من كل شي مجموعه بسيطه .. واهم شي قمصان النوم وحاولي تنوعين وماتكررين وانتي اكيد عندج فكره عن هالسوالف ..

العبي .. فصليلج 4 او 5 ماكسمم لنه الموديلات كل فتره ينزل شي يديد فلاتكثرين …
وهاي مجموعه من محلات العبي المعروفه بموديلاتها الغاويه .. بس ي ليت تقوليلي انتي من وين ناويه تشترين العبي عسب اقدر افيدج ..
في العين :
1- لوزان
2-بلودان
3-المهيا
4- هاي ليدي
5- خنجي

في دبي انا مفصله عند محل اسمه شيلاتي وااايد حلوووووه عبيهم واكثر شي حق المناسبات يعني اكيد بتلقين عندهم اللي تبينه .. بتحصلينه فالطوار مول

ف بوظبي:

1-خنجي
2-J’s Couture
3-my fair lady
4-سويت ليدي

وبتحصلين فالخالديه ورا المهيري سنتر بعد .. واسعارهم اووكي

خذيلج عطور وكريمات ودخون ودهن عود .. هذا اهم شي بالنسبه لي

عقب ايي دور الشنوط والنعول … واطقم المللابس .. بس تكون ناعمه وبسيطه

وبالنسبه للحفله امـمم احس اذا لبستي فستان بيج ع ذهبي ناااااعم بيطلع واااااااايد حلو عليج … وعاد انتي وذوقج اختاري التسريحه اللي تناسبج وتفنني فاختيار الميك اب ^_^

اذا كنتي من بوظبي .. سيري طالعي فالمهيري سنتر شي محل فساتين روووووعه فالطابق الثالث ..

ووووبس ^^

سمحيليه جان طولت عليج ..

مشكوره اختي.. تري شكلنا بنسويها في البيت لانه ماشيء حجوزات نهائيا هه
ممم فستان ابيض ماعارف حايره فيه بس عجبني فكرة اختي سويت قيرل يكون شويه سكري

ام سما..
تسلمين اختي الغاليه…صح والله بشتري الاشياء الضروريه…بعدين لاحقه على الاشياء تكملة عدد..اختصارا للوقت..مشكله لو عرسنا في البيت ههه احس بموت حر فستان ضخم ابيض بعد يالله بالستر..بس افكر بسكري افضل..بنشوف الوضع تسلمين الغاليه ربي يسعدج

بسومة…
تدرين عاد شو مشكله في دوامي يخلص الساعه 6 المغرب..ابي اروح شارجه او دبي..ماعندي يوم اجازه الي الجمعه.انا بقالي اسبوعين يعني ماعندي غير جمعتين…صح كلامج اول شيء اركز..عبي والمخاوير..لانها تاخذ وقت..انش اءلله هل الجمعة افكر اروح…دبي او شارجه. الاشياء الي اقدر اسويها او اشتريها في راك..كل يوم يوم بخلص دوامي بروح اشتري شويه شويه….بس يا ريت اذا عندج اماكن معينه ارووووووووح بسرعه..؟؟ عشان ما اخذ وقت

سويت قير
مشكوره وياد اختي ربي يوفقج..مشكوره انج عطتني اماكن بس انا من راك…ااذا تعرفين محلات في شارجه او دبي افضل لانه العين ابوظبي بعاد عليه….صح انا حطيت بعتبار انه يسكون سكري..جيء شويه مابحس بالاحراج ههه..
من الحين بحطلي جدول عشان…ما ينقصني شيء من الاشياء ضروريه