السلام عليكم حبيباتي …
طبعا الي تعرف موضوعي (( تسريع وقت الولادة)) .. بتعرفني .. والي ماتعرفني .. ف هذي قصتي ..
بعد مانزلت الموضوع .. والخوات ماقصروا .. عطوني وايد اشيا وحلول لتسريع الولاده ..
موعد السونار المفترظ اربي فيه 6/4/ .. طبعا مافي ويع ولا ألم ولا شي بنفس اليوم . كالمعتاد .. نشيت الصبح ودخلت المنتدى وعلى الظهر ظهرت اتغديت مع ريلي ..
رجعت ورقدت لين 5 .. نشيت وبسرعه سرت الحمام (وانتوا بكرامه) عسب اتوضى للصلاه .. راحت عليه نومه ..
وانا يالسه .. حسيت الي نزل لي مب بول(وانتوا بكرامه) .. ماعرفت شو هو فالبدايه..
قلت ف خاطري .. ل هالدرجه مافي كنترول عالبول ..خخخخخ
اتوضيت وظهرت بصلي … بعد حسيت شي ينزل لي .. لما شيكت .. كان شي شفاف مب اصفر .. اهني عاد انا خفت .. وعلطول قلت حق ريلي تعال شي ينزل لي .. بس مب افرازات .. اتصلت ف عيادتي .. قالوا لي تعالي بنفس الوقت (وطبعا كانت الساعه6 المغرب) .. قالوا لي الدكتوره بتي الحين (وهو مب وقت دوامها اصلا) .. سرت ووصلت الساعه7 بالضبط .. شيكتني .. قالت مفتوح 1 سانتي .. وكان هذا الماي الي نزل .. بس بدون ويع .. وطبعا قالت تدخلين المستشفى(الامريكي) عسب اكون تحت الملاحظه .. المهم سرت وزقرت خواتي وماما .. وكان مفتوح 2 سانتي … قالت النيرس اذا ماياج الويع لين 6 الصبح (بعد ماسألتني عن وقت نزول الماي) .. بيحطون لي طلق صناعي .. ومرت الساعات وانا ادعي واقرا كل شي عن تسهيل الولاده (كنت طابعه ورقه بالأدعيه من قبل ودوم ف شنطتي)..
يت الساعه 5 ونص الفجر وانا مب راقده ولا متعشيه .. ماكان لي نفس .. ومافي ويع ..
يت النيرس عالوقت بالضبط وودوني غرفة الولاده … حطولي المغذي وفيه الطلق الصناعي .. بصراحه ماتوقعت ولو 1% ان الويع جي .. صدق كنت لما يوصل الويع لين 60 او 50 تطلع روحي .. اتخيلوا عاد ان الويع اظن لازم فوق ال100 !!
محد فهمني اني بحتاج طاقه .. ولا حد قال لي لازم آكل زين .. خواتي قالوا لي .. بس اتحريت عادي .. لأنهم ما أصروا عليه ..
المهم .. رحمة رب العالمين نزلت بي .. كل دقيقه من الويع الي انتظمت فتراته من 6 لين 7ونص الصبح اقول ربي الطف بي.. طبعا بمساعدة رب العالمين والنيرس وانا .. كنت اسمع رمستهم لما يقولون لي اتنفسي ويسوون جدامي .. ولأنه بجري .. ف سمعت وطبقت الي قالوه بالحرف (ونصيحه ترا التنفس هو الي فادني واااااااااااااااااااااااااااااااايد) .. الساعه 8 إلا ربع بدا طلق الولاده مع الدم !!
دخلت الدكتوره وحطوني بوضعية الولاده .. اختي بس كانت على راسي .. محد رام يشوفني جي ..لا ريلي ولا ماما … طبعا كنت ازفر(اسوي push) لما الدكتوره اتقول متى ماياج الويع.. شو اقول بس .. الحمدلله عدت .. وفعلا .. 8:27 ظهر ولدي حبيبي .. فديييييييييييييييييييييييييييييييييييييييييييته .. والله شعور وااااااااااااايد حلو لما سمعت اول صرخه وهو على صدري .. قلت الحمدلله رب العالمين .. وعقب شفت فوق وقلت يارب خلاص اقبض روحي (هههههههههه .. ماكنت حاسه بشي) ..
وتميت ف غرفة الولاده .. سوت لي الدكتوره خياطه .. والبيبي على يميني موجود … وعقبها حطوه يرضع على صدري ..هم يعلمونج … وعقبها اتسبحت والنيرس نظفت البيبي .. وهذا كله ف غرفة الولاده .. لبست وظهرت والبيبي معايه مافارقني دقيقه .. وهذا قانون المستشفى . حتى ممنوع ياخذون البيبي عندهم .. إلا اذا كان فيه شي او انولد ب 38 اسبوع ..
الدكتوره فنااااااااااااااااااااااااانه وحتى اختي مدحتها وايد .. ارتحت من شفتها دخلت عندي .. احبها وايد والله … وخطفت عليه اليوم الي عقبه بعد شافت الخياطه وقالت موعدي معاها عقب اسبوع ان شاء الله ..
وكل هذا وانا بعدني مصدومه من الويع .. محد فهمني انه جي .. او عالأقل ان شدته جي .. فديت ماما .. شقا اتحملتنا وهم مال زمان اول ..
على فكره انا ماخذت اي شي يخفف .. لا ابرة ظهر .. ولا اكسجين ولا شي .. عسب جي حسيت بكل لحظه من لحظات الويع والولاده .. وحتى وقت الولاده .. كنت ازفر بدون صوت او صريخ (ماما قالت انها جي سوت ف قلدتها) ..
طبعا بدوا الاهل يوصلون .. وانا مارمت اغمض لي عين .. كل دقيقه عمتي(ام ريلي) تدخل اتبوس البيبي وينش يبا يرضع . عقب اهلي . يعني مارقدت يومين .. وبنفس اليوم هذا قلت حقهم ابا ريلي يبات عندي .. مابا حد .. كنت متظااااااااااااااايجه .. لين البارحه .. ظيج فظيع صابني .. وماعرف هل سار او لا ..
طبعا وقتها محد قدر اني يديده على هالوضع … الناس يتصلون بس وانا مابا ارمس حد ولا رديت على حد .. بتقولون انا مب اول وحده اربي . المصيبه اني دلوعة البيت كنت ..
وظهرت اليوم الي عقبه الساعه 10 فالليل .. مارمت اتحمل .. مابا ضيوف … مابا ارمس حد .. احس كرهتهم لأنهم يوا على طول .. ماعطوني فرصه ارتاح .. طبعا ويهي من الولاده والضغط طلعت فيه حبوب .. والحين سارت الحمدلله ..
المستشفى ماعليهم كلام .. وايد ارتحت .. متى مازقرت حد ايون … واتكون في نيرس اتناوب … هي تهتم فيج وفالبيبي .. عقب يت معالجه نفسيه .. اترمسني وتسألني وتسمعني . وعقبها يت نيرس الرضاعه .. اتعلمني شقا ارضع واتخبرني بالخيارات الموجوده .. عقبها يت نيرس الي اتعلمج شقا اتسبحين البيبي .. يعني راحه تامه .. هذي تجربتي الشخصيه
كنت احس بظيج فظيع .. احس ان البيبي مايشبعه حليب صدري .. والحمدلله صدري فيه حليب .. بس كل ساعه ينش .. او احيانا يرضع ويرقد وعقب ربع ساعه ينش يبا .. اظن هي مسألة تعود اني اسهر الليل .. انا عند ماما .. بس ماتروم اتسوي لي شي … لأن كل شي عالرضاعه يعتمد ..
الحين هو راقد .. وبس وقت الظهر يرقد له مال ساعتين على بعضهم …
كان عنده موعد اليوم وقال الدكتور وزنه نزل .. وقال طبيعي .. بس كثري من رضاعته ..
البنات الي بعدهم ماربوا ويبون طبيعي ..نصيحتي .. حطي ف بالج انه الم وايد شديد .. لاتخافين .. بس كوني مرتاحه وراقده زين .. ووفري طاقتج ..
انا اقول الحمدلله رب العالمين اني ربيت طبيعي وهذا الي كنت ابااه .. وسبحان الله .. البيبي ظهر بأمر من رب العالمين و فالوقت المكتوب له ..
بس في شي ماسويته وربيعتي الي ربت طبيعي قبلي بفتره وجيزه سوته .. وقت الطلق .. اشربوا جرفه واشيا حاره .. بس وقت الطلق ..
الله يسهل على الجميع يارب .. ويرزق كل محرومه … الحمدلله رب العالمين على هالرزق .. وربي ان شاء الله يرزقني دوم العيال والي يكونون من الذرية الصالحه والطيبه يارب العالمين ..
الحمدلله ع سلامتج ..
ومبروك ما ياج
وعقبالي يااااااااااااب .. اربي طبيعي
اهئ اهئ بديت اخاف
مع ان هذا ثاني حمل لي
ياااااااااااااااارب سهل علي وعلى كل حامل
بس تعرفين حسيت بتواصل فظيع بيني وبينج يوم قلتي هالجملة ( وكل هذا وانا بعدني مصدومه من الويع .. محد فهمني انه جي) لان عقب ما ربيت في بنتي قلت نفس الجملة
وتميت في حالة صدمة لمدة سنة
مو مصدقة ان في الم جي
وعلى العموم مبروك عليج ما ياج
وعقبالنا يارب
الف مبروك على البيبي
والحمدالله على السلامه
وانا هذا اول حمل لي
الله يقومنا بالسلامه
يارب اربي طبيعي وكل الحوامل
مبرووووك وعقبالنا ياااارب
أول مره في حياتي اقرا قصة ولادة .. لأني ازيغ واحس البنات يبالغون ويبون يسوون عمارهم طرزان 
بس لأني كنت متابعة موضوعج عن تسريع الولادة ومن كمن يوم ماشوفج فقلت بشوف شخبارها ..
وبصراحة وايد فرحتلج انج ربيتي طبيعي مثل ما تمنيتي .. و اشوف انه كلامج واقعي جدا وما بالغتي فأشكرج على هالشي لأنج ما زيغتيني هههههه .. لأني يالس اتشاور على موضوع الابره وتخفيف الالم ولا امشي عالبركه بدون مخدر.. مادري اذا بقدر اتحمل الالم ..
ويوم قلتي انج حطيتي ولدج على صدرج دمعت عيني لأني حسيت انه هاي هي لحظة الراحة اللي كل شي عشانها يهون.. وفعلا نصايحج بخليها في بالي عن موضوع الراحة وتوفير طاقتج حق هالشي..
الحمدلله على سلامتج وفرحت يوم قريت اسمج على الموضوع 
ان شالله يتربى ولدج في دلالج وعز ابوه ..
الحمد لله على السلاااااااااامة اختي
والله يجعله من الصالحييين
والعقبى لنا ان شاء الله نربي بالسلامة
بس خوفتيني