السلام عليكم ورحمة الله وبركاته
بس في مشكله عندي هي اني من يومين خواتي كنت معزومه على عرس بس مش من معارفنا
بس اخت ربيعت ربيعتي
وهم يشوفني معاها وظاهر قالن لها تعزمني
فانا عاد تكشخت على قدي!
المهم
ربيعتي هذي اكثر من مره اشتكي منها لانها مرات كلامها جارح ودوم عندها هموم عشان هي تصرف على اهلها وجي
مب مشكله خواتي
انا قدرت المشكله بس هي ماتقدر اني قدرت!!!!
يعني يوم العرس خواتي هي طالعه من الدوام ومب ملاقيه فستان او لبس تلبسه للعرس فطلبت مني اطلع وياها عشان ادور لها فستان
وفعلا دورت معاها وكل شي وكنت معاها في غرفة القياس وكل شي ودوم انصحها انها لازم تهتم بعمرها
حتى اليوم تتصل علي عشان تروح الصالون تسوي شعرها ولازم اروح معاها!!!!!!
عندها هي خوات بس كلامها انهن مايحبن هذي الاشياء ويمكن الام ماترضى تطلعهن معاها عشان هن اصغر!يعني تعتبر هذي الكبيره فحره تروح وتدور بس هن لا!لانها هي متحمله المسؤوليه
قلت زين
ولكن في شي جرحني في العرس
وهو
انها ماتقدر دوم ماتقدر
انا قلت ذيله مب معارفنا وجي يعني اعرف بعض البنات يعني حوالي ثنتين من خلالها هي !
فانا رحت معاها على اساس هي الربيعه والثانيات اعرفهن بس نطلع مرات السوق!
فبالعرس يوم البنات قامن يرقصن
الربيعه شو تقول لي؟
فلانيه خليكي وياالاغراض وانا رايحه ارقص!!!!!!!
انا انصدمت
قلت اوكي وقتها كنت اكلم امي في تلفون!!!!!!
يعني تركتني وقامت ترقص
قلت مب مشكله انا اصلا مب جاي على بالي
بس هي صدمتني!
قلت اوكي
العرس تقديم الطعام فيه على شكل بوفيه! يعني ساعد نفسك بنفسك وتعرفون الحريم يفعصنك عشان الحمص
في عرس قبل هذا العرس
كنت انا وهي معزومات فيه وهي كانت تعبانه فطلبت مني احط لها في الصحن اكل يعني كان العرس بعد نظام بوفيه
فوقفت طابور واحط صحن فوق صحن عشان اكب لها اكل!
المهم
في هذا العرس بعد ماربيعه خلصت رقص وجي كانهم بدأ البوفيه وانا بعيده عن البوفيه يعني لازم اركض عشان اوصل
شفتها من بعيد تاشر لي تعالي!
يعني تعالي وخدمي نفسك!!!
مافيها شي
رحت بنفسي
بعد فتره يوم شافتني تقول لي ياله خذي طبق
لكون انا خلفك ونسيتك!!!!!
انا انصدمت
اكلت وكل شي بس مب وايد مبسوطه
عرفتوا علي
طبعا انا ماتفكرون اتكلم من وراها ولا اريدها تخدم علي
لا
انا واجهتها هناك
يوم مره ثانيه بدا الرقص وجي رميت عليها شنطتها وقلت خذيها انا رايحه ارقص واتسلى (رغم اني مب رقيصه بس عناد)
حاله
وهي سكتت
والاكل قلت خلاص انا اخف عنها اقدر ادخل واطلع بين كومه النساء بسهوله
بس اليوم اتصلت وطلبت مني اروح معها الصالون تعرفون انا فاضيه وجي
عادي عندي لان ماعندي شغل
امي طبعا خبرتها القصه
امي مضايقه ومصره تفتح سالفه طويله عريضه مع البنت
قالت لي انت مب خدامه لها ولا عند اي حد!لان امي ماترضى مثل ماتعرفون وزعلت
امي تقول لازم تحترم
يعني دوم تتصل وتطلب منك تروحين معها السوق وتتشرين
بس انتي لا
وهذا الشي لاحظته يعني يوم اريد ادخل محل ترفض! تقول تبعانه وماريد
يعني انتي معها احسن حتى من خواتها كيف ماتحترم!!!!
فمب عارفه شو اسوي؟
هي تجرح وايد وماتحترم وانا مب مستفيده وايد منها بس وناسه طلعه لان ماعندي حد اطلع معه
ومتونسه مع ربيعاتها لانهن من النوع شوي احسن يمكن يقولن حرام
بس انا زعلت من التصرف عشان العرس يعني هي اكثر وحده اعرفها ليش كان هذا التعامل
فصار الاختيار صعب
يعني اواجهها مره ثانيه ولا اقطع العلاقه وريح نفسي! مثل ماريحت نفسي من غيرها
اريد اعرف ليش انا دوم علاقتي مع الناس غلط!
ماتقولون شخصيه ماشخصيه
لان انا ارد عليها حتى من فتره صار بيني وبينها على هذا الموضوع بس بخصوص شي ثاني
زعل وقلت لها اذا ماتحترمين بزعل وجي
فانصدمت مني وقالت تغيرت!
وانا حبوبه معاها نوعا ما بس بعد اواجه
فالشخصيه مب بطاله
ولكن هي ماتحترم لو شو!
يعني ماشيه تفكر بنفسها
انا اقول اخليها على قد عقلها احسن! وبس
مادري اختي احس انج وايد حساسه ومكبر الامور يعني حبتين شوي انتي تسوين شي وتبين هيه ترد لج اياه بالمقابل.. يعني حطيتي لها في عرس من البوفيه تتريينها هيه تحط لج ها العرس يمكن انتي جيه تفكيرج تحبين تردين المساعده للناس لكن مش كل الناس نفس تفكيرنا انا نفس وايد اعاني من ها التفكير ومن الحساسيه المفرطه في النهاية انا احس بديت اني افقد عمري والناس الي حوالية مو شرط كلهم يفكرون نفسنا هيه تعاملج احسها بدون قيود يعني ماتفكر عطتني بعطيها راحت بروح وياها خلج كول حاولي تبعدين فكرة انها لازم تكون نفسج في نفس الوقت انتي لا تظغطين على عمرج باشياء عشانها ولا عشان غيرها الي يناسبج سويه بكون لو صار موقف بينكم مرة ثانيه ماتحسين انج ظغطتي على عمرج وهيه مابادلتج نفس الموقف.. يعني لو تبين تروحين وياها روحي لو ماتبين لا تروحيت تعذري بطريقه مهذبه مثلا مشغولة عندي مشوار بروح ويا امي لا تقولين لها ماببروح وياج لانج ماتروحين ويايه وماتسوين لي شي لا تحسسينها يعني انتي تبين وحده بوحده .. حاولي تطلعين مشواير بروحج بدونها عشان هيه تحس بعد انج تقدرين وتروحين وتيين من غيرها فهمتي خلج مستقله وماتترين من حد شي ونفس الوقت كول وماتشيلين على حد شي بخاطرج الدنيا كل حد بحاله …
يا الغلا كل وحده تعرف نفسها ..وصعب احد يعطيج رايه ..
انا مثال كل ربيعاتي بالمدرسه علاقتي بهن سطحيه ما تتعدى المدرسه ماعدا وحده لاننا كنا متشابهات
بكل شي وبعد ما عرسنا تمت العلاقه تزيد اكثر واكثر.لين جاء يوم وشكيت فيها ..مجرد شك .ما حبيت افتح الموضوع
معها لانها يا بتقول الحقيقه يا بتنكر وبكل الحالتين انا ما بستفيد شي …
فقطعت علاقتي بها على طوول بدون مقدمات ولا اي شي .
انا مقتنعه ان الصداقات حلوه وتجيب راحه نفسيه للانسان ..بس اذا كانت الصداقه تجيب الشك والمرض
فهذه مو صداقه ابدااا..
خليها زماله وسلام واحترام من بعيد لبعيد
حبيبتي و الله لا تزعلي منها الي انصحك بيه شوفي اتي نفسج مرتاحه معاها اوكي ما مرتاحه خلاص اقطعي
امم، اختي مشاكلج ويا ربيعاتج هي نفسها، ماشي احترام او
يمكن هم مطيحين الميانه وياج وانتي متحسسه من هالشي
نحن ما نقدر نقولج رابعي هالبنت ولا رابعي هاييج! ما نعرفهن
ولا نعرف هل هن يستاهلن الصداقه ولا، يمكن الغلط منج انتي
انج تفتحين المجال لهم يعاملونج بـ هالطريقه، لكن انتي اللي تحددين
كيف الناس تعاملج يعني مثال، قلتي انه حطوا اغراضهم عندج وساروا
انزين لو ما ترضين بـ هالشي المفروض ترمسين نفس الوقت
يا هيه او لا اسمحولي ماقدر لكن انج توافقين ع هالشي وعقبها تقولين
لازم ما يسوون جي ولازم يتصرفون جي ف هالشي غلط اختي، هم
ما بيحطون هالشي ف بالهم بالعكس بيتحرونه عادي، ف اذا هالبنت تعز
عليج بس حزت ف خاطرج ع هالسالفه يلسي وياها ورمسيها قوليلها
فلانه لو تبين صداقتنا تستمر اتمنى منج انج تكونين ويايه جي وجي،
حطي النقاط ع الحروف من اولها عشان ترتاحين من هالمواقف، واذا
وجودها والعدم واحد ف حياتج ف خلاص تعذري منها كل ما تطلب منج
انج تطلعين وياها وخلاص بروحها مع الايام بتعرف انج بترفضين ف
ما بتتصلبج من الاساس . .
لا تكبرين الامور اختي، اللي مرتاحه عليه سويه واللي ما تبينه
ف حياتج الغيه، الحياه فيها مواقف اكبر من هالمواقف تستاهل
منج هالتضحيات، اما انج تضحين بشخصيتج وكرامتج هني مب
الناس اللي بتخسر، انتي اللي بتخسرين . .
هي المشكله خواتي يمكن عشان انا وحيده امي وماعندي اخوان وجي
فدوم اتحسس كثير
يوم ماحد يقدم لي مساعده او يعاملني زين خاصه اذا متامله في الخير
اظن ان الناس مافيهم خير وتخيل انه مب زين
يعني ادقق
واقول انهم يعاملون اخوانهم زين ويحرصون عليهم وانا لا
كاني مثل ماقالت ولدوها ونسوها!
والمشكله الثانيه انهن مايحترم ابداً حتى لو زعلت وقلت لهن
يمكن يعتذرن مره وبعدين ردت ريمه للعاده القديمه!!
مااعرف وين المشكله هي اتصور
انهن يظن ان مستواي عادي اتصور هذا الشي يعني
يعني بس انا وامي ونحن ناس عاديه وماحد بيهتم فينا!!!
واني على نيتي او طيبه وعادي عندي مابزعل
هذا اتصور التفكير!