خواتي بموت من القهر تعالوا قولولي شسوي لاني خلاص وصلت حدي

الحين خواتي انا مب عارفه شسوي انا أغار على ريلي موت وما أرضا انه يشوفها جيه واللي خلاني اليوم أكتب وشكيلكم انها تمادت أكثر تخيلوا اليوم الظهر طالعه في الحوي ويا ريلها تتمشى ولابسه بنطلون وقميص من غير أكمام يعني أيدها كلها برع صدق ماتستحي على ويها

حتى ريلي شافها وزقرني قالي تعالي شوفي فلان ويا حرمته ليش جيه مخلنها؟ الصراحه طاح من عيني
قلت له خله يولي لو يستحي على ويهه جان حشم حرمته

انا يوم خبرت أخت ريلي وقلتلها لازم أحطي حد للموضوع لين متى بسكت ؟ قالت بيقولون نحن في بيتنا وحرين … وعادي تتبلى عليج وطلع عليج رمسه مب عدله ترا اللي ما تخاف من ربها تسوي كل شي وهاذي وحده ماتخاف ربها وعلى فكره ترا عندها عيال للاسف يعني أم والمفروض تحترم نفسها وتحترم ريلها وعيالها والمفروض قبل هذا كله تخاف ربها وتعرف انه يشوفها ويشوف تصرفاتها

بس خواتي انا خلاص طفح الكيل عندي والله اني كرهتها كره .. ليش يعني ماتتمشى ألا في الجهه المقابله لبيتنا ؟؟؟

والله مب عارفه شسوي أخاف اذا رمست تزيد من حركاتها عناد فيني واذا سكت تراها بتم على نفس الحركات

قولولي لو أنتوا مكاني شو بتسون؟؟

أستغفر الله العظيم
ولا حول ولا قوة الا بالله العلي العظيم
وحسبي الله ونعم الوكيل

ملااااااااحظه : نحن مب يالسين نراقبهم بس بيتنا من صوب بيتهم كله جامات زجاجيه من عند الدري يعني غصبا عنا نشوفهم ونحن طالعين ونحن نازلين فهمتوا قصدي؟ خاصه في النهار أما في الليل مايبان شي وهم عارفين ها الشي لان البيتين وايد قراب من بعض يعني المفروض هم يحشمون نفسهم ويحترمون الجيره مثل ما نحن محترمينها . والمفروض على الحرمه تلبس لبس محتشم لانها عارفه ان لبيوت مكشوفه واذا بغت تطلع وهي متكشفه تطلع على الاقل بالليل مب بالنهار عينك عين .. عيل ليش انا كل ما أطلع البس لبس ساتر ومحتشم ؟ لاني عارفه اني بكون مكشوفه ألهم مثل ما أنا احسب لهم حساب المفروض هم نفس الشي ولا انا غلطانه؟ يعني هي ترضى زوجها يشوفني وانا كاشفه؟ أكيد لا.

وزوجكِ اخطأ..

كان من باب اولى انه عندما رآها يغض البصـر وينتهي الامر

علينا ممن هم في منزلنـا ولا يحق لنـا ان نتدخل مافي منزل الغيـر

ومن واجب الجيـرة…