السلام عليكن خواتي ..
بصراحه مب عارفه كيف ابدا بالموضوع ..
بس كل فتره وايد يشغل بالي ويخليني اتوتر من مجرد التفكير فيه ..
ومع الوقت صرت ابدا ماحب احد يناقشني فيه ..
لا تتحسبون ان كلللللل تفكيري محصور بهالشي …
بالعكس والله انا عايشه حياتي ماشاء الله ومرتاحه ماشاء الله ..
بس كل فتره لازم ينفتح هالموضوع .. واحس كل ماينفتح يتعكر مزاجي !!
انا بنيه وعمري 22 سنه تقريبا ..
وباقيلي تقريبا سنه وشوي واخلص دراستي الجامعيه ان شاء الله ..
حالي حال اي بنيه جامعيه تطمح لمستقبل طيب .. وتكمل دراستها العليا .. تاخذ الماستر يعني ..
او تشتغل في مكان يستاهل مستوى شهادتها والتعب اللي تعبته ايام الدراسه ..
يعني بالمقتصر عندي طموح واهداف ابا احققها ..
بصراحه ماشاء الله تبارك الله كل فتره ييون ناس يتقدمون لي ..
بس انا كله اقول لأمي قوليلهم ..
"اني بكمل دراستي ومابا اي شي يشغلني عن الدراسه"
ودوم اقول لأهلي اذا الشخص شاريني بيترياني !! لأني فعلاً احس ماروم اعطي حق الاثنين ..
لازم بقصر بواحد منهم …
ما انكر شي بنات ماشاء الله عليهن ومعايه في الجامعه يدرسن ومنهن حمل بعد ..
بس أنا احس روحي ماقدر … واخاف اخسر دراستي بسبب انشغالي في البيت ..
او اخسر بيتي بسبب انشغالي بالدراسه ..
الفتره الاخيره احس كل حد من خواني وخواتي يعاتبوني و يقولونلي
" ترا ع كثر ماترفضين عقب محد بيتقدم لج ابدا! "
والله مرات احاول افكر .. بس ماعرف اييني خوف فظييع ..
وتفكيري دوم محصور في اشيا …
دراستي .. وظيفتي … حريتي او شخص يتامر عليه!!
وخاصه اللي يخوفني اكثر ..
ما اعرف هالشخص اللي متقدملي كيف طبعه واسلوبه واخاف اوافق ..
ومع الوقت يصعب عليه اتراجع عن قراري خوف من اني اكون مطلقه!! < لا تلوموني اذا تفكيري متشائم شوي .. بس شفت تجارب حولي تاثرت بها وايد ..
وخلاني مع الوقت مستحيل اتنازل عن الاشيا اللي ذكرتها .. دراستي وظيفتي وحريتي !!
الحريه اللي اطريها القصد منه في بيتي اهلي ابدا ماتعودت حد يتامر عليه في الطلعه او الدخله
او المشرايه او يجبرني ع الغشوه ! اهلي تفكيرهم متفتح شوي .. واخاف اللي الشخص يكون عكس تماما!!
يمكن البعض يشوف اني مكبره الموضوع .. انا ابدا مب مكبره الموضوع
بس مب عارفه اقرر …
واخاف اقرر وييني شخص يجبرني اتنازل عن اشيا انا مقتنعه تماماً اني مستحيل اتنازل عنها ..
يمكن تقولون بسيطه .. مع الوقت بتعرفين طبعه … انزين كيف بعرف طبعه اذا انا اصلا ماعرفه!
وخايفه ع كثر ما ارفض .. محد يتقدم لي .. مب عارفه والله …
ابغي حلول وكلام منطقي ..
لا تقولون الحرمه مكانها بيتها ومالها حايه للشغل! انا ارفض هالشي تماماً ..
لازم الحرمه يكون لها شخصيتها واستقلالها ..
خيتو انا ابعمرج وتقريبا شرات حالتي بس بقولج شغله وحطيها افبالج الي يبي شي ما راح يصعب عليه
لا تقولين الريل بيمنعي من اشيا وبيتامر لا والله اذا جيه تفكيرنا عمرنا ما راح نتزوج ونحن بذكاءنا نقدر انسوي الي نبيه بس بالسياسه …^^
وربي يوفجج ..
الله يووفقج حبيبتي انتي ماتعرفين يمكن الريل يكون متفهم
عالعموم انتي استخيري كل ما اي حد يخطبج وربي بيكتب لج الي مناسب لج
ماعرف بصراحه شقول بس اتمنى الخواتي تفيدنج
الله يوفقج أختي ويحقق كل طموحج وتطلعاتج ويرزقج كل خير ويستر عليج دنياا وآخرة .. اللهم آمين
انا في نظري صحيح اللي ذكرتيه مهم (دراستي وظيفتي وحريتي ) بس الاهم انج تكونين اسرة سعيده تحبينهم ويحبونج تبذلين روحج الهم وتربين اولادج تربية صح بكل معنى الكلمه وهذا هو النجاح الحقيقي والسعاده الحقيقيه .. ام انج ترفضين الزواج لحد ماتخلصين دراسه صدقهم هلج يمكن بعدين ماحد يتقدملج , والوضع اللحين مثل ماتشوفين البنات متكدسه في البيوت والشباب اغلبيتهم عازفين عن الزواج وهاربين من تحمل المسؤليه .رايي اذا ياج شخص مناسب ومشهودله بالاخلاق والدين وافقي وتكلمي معاها بصراحه عن نظرتج للمستقبل وتفكيرج وتعرفي على نظرته وتفكيره قبل الملكه والزواج يعني اثناء الخطبه ممكن انج تكلمينه بالتلفون وكل واحد منكم يعرف الثاني بذلك تتقربون لبعض وتتعرفون على بعض قبل ماالواحد منكم يخسر شي .وانا ها اللي سويته والحمدلله رب العالمين كان زواجي ناج ومتفاهمين انا وزوجي على كل شي مع اني كنت مثلج متعوده ماحد يتامر علي وكنت حره لابعد الحدود بس صدقيني بتفاهمي مع زوجي لم يسلبني حريتي نهائي بالعكس ودي اقدمله روحي وقلبي هديه …الله يوفقج ويهديج للخيرة .
عيبني تفكيرج ماشاءالله عليج
والله يا حياتي بالنسبة لموضوع الزواج هذا نصيب وارادة رب العالمين فوق كلشي فاذا مكتوب لج تعرسين فبتعرسين
ودوم تذكري هالشي "وعلى نياتكم ترزقون"
موفقه الغلااا
——————————————————————————–
—استغفرالله—
—استغفرالله استغفرالله—
—استغفرالله استغفرالله استغفرالله—
—استغفرالله استغفرالله استغفرالله استغفرالله—
—استغفرالله استغفرالله استغفرالله استغفرالله استغفرالله —
—استغفرالله استغفرالله استغفرالله استغفرالله استغفرالله استغفرالله—
—استغفرالله استغفرالله استغفرالله استغفرالله استغفرالله —
—استغفرالله استغفرالله استغفرالله استغفرالله—
—استغفرالله استغفرالله استغفرالله—
—استغفرالله استغفرالله—
—استغفرالله—