جدول سنوي لتضبيـــط المصروف شو رايكن؟؟؟

يالسه اتجوّل في هالقسم ولفت انتباهي موضوع الصرف

وطبعا حدث ولا حرج!!!

انا مثل اكثر العضوات اللي قالن انهن مسرفات

انا وحده تعقدت بصراحه خاطريه اتم ليه لو 100 درهم لين اخر الشهر

لازم اصرفهن كلهن

على العموم الكلام هذا ماخوذ خيره بنقعد نتشكى عن الصرف واللعب وغيره

فيه حل ان شا الله ينفعني وينفعكن

بنسوي جدول لسنه كامله عن الصرف الشخصي،، لا يخصه لا في العيال ولا الاخوان ولا غيره

يعني كل وحده كم تصرف على نفسها او بالاحرى طول السنه نحدد شو المناسبات وشو المبالغ وشو الاشياء الشهريه اللي ممكن نصرفها

يعني مثلا،،
كم عباه في السنه المفروض انفصل ،، وكم كندوره وكم اندر وير وغيره وغيره
واغراض السوبرماركت، والعنايه الشخصيه صالونات وغيره

بشوف تفاعلكن معايه وببدا ان شا لله في طرح الموضوع الايام المقبله وطبعا اكيد اشجع اي وحده ممكن تحط اضافات للموضوع عشان نخليه شي ثابت وبنطلب من مشرفة القسم تثبت الموضوع

تحياتي لكن

1- قسمي مصروفج ع 4 اقسام ( عدد الاسابيع )
2- حطي ميزانيه الصالون لكل اسبوع ( انا مثلا اروح الصالون كل اسبوعين و احط 150 حق كل مره ) >> كل وحده و ع حسب احتياجاتها
3- حطي مبلغ حق الملابس الي بتشترينها ( حددي اولوياتج .. مثلا لا تقولين ما عندي تي شيرت يديد و الكبت ممزوور تي شيرتات .. استهلكي الي عندج بعدين اشتري.. اولا لا ننسى ان التبذير حرام .. والله بيحاسبنا عن الملابس الي فالكبت نشتريها و ما نلبسها )
4- حطي مبلغ حق الرصيد ( التلفون ) لكل اسبوع
5- حطي مبلغ حق طلعاتج فالويك اند ( مثلا اسبوع -سينما -مطعم ) >> عن نفسي ما احط وايد لها الشي
6- حطي مبلغ للتوفير في حصاله ولا تفجيين هاي الحصاله خير شر ..و يفضل تحطين مفتاح الحصاله داخلها >> انا ما وصلت لهاي النقطه خخخخخخخخخخخخخخخ لاني احط بيزاتي فالبوك بس احاول اقبض عمري
7- لا تحطين في بالج ان كل طلعه تطلعينها لازم تكون شوبينغ !! لا حطي في بالج كل طلعه تمرين ع المحلات و تشوفين اليديد ولا تشترين الا الشي الي صدق محتاجتنه
8 اذا انتي من محبات السفر و عندج خطط للرحلات و السفر .. سويلج حصاله و اكتبي عليها السفر … و تذكري كل ما حطيتي في هاي الحصاله .. كل ما بتزيد وناستج فالصيف لان مستحييل تسافرين مكان و ما تبيين تسوين شوبينغ من الخاطر و تتحطويييييييييييين
9 – حطي مبلغ للاعمال الخيريه >> صدقة .. تبرع او اي شي … لان الله بيرزقج و بيفتح عليج ابواب الرزق
10- لا تبخلين ع عمرج .. بل حافظي ع فلوسج ولا تشترين اشيا مب محتاجتنها ..لا تنسون ان الله يفرح لما يشوف عبده ينفق مما اعطاه الله .. لكن بحدوود مب لدرجه الاسراف .. و احيانا فيه اشيا تكون رخيصه بس تكون شيك و ما عليها كلام و احلى مليوون مره عن شي غالي بالالاف

كل وحده تسويلها جدول ع الاحتياجات الي هييه تنفق فيها .. مثلا بترول .. حصص دراسية .. مسلتزمات مكتبيه ..كتب .. او ع هوايه … الخ