https://forum.uaewomen.net/showthrea…B1%D9%81%D9%8A
اولا انا عمري 21 طالبه جامعيه
ثانيا هو 24 طالب جامعي من اهل البلاد بس مثل ما قلت اشتغل قطاع خاص …
الولد اخلاق من اللي اشوفه وظاهر ماعرف الخافي الله يعلم وهو من قبيله معروفه وقد ذكرلي في الفتره اللي كلمته فيها مسجات انه ولد خاله ولد عمه ماخذين عن حب ( انا تميت اكلمه مسجات شهر تقريبا ) من عقبها قلت لين هني وبس انه اذا تباني اخطبني لا تم ترمسني من ورا اهلي وبس
انا خايفه اوافق عليه وما نتفاهم او اعيش تجربه مب حلوه ( عندي اخت مطلقه ومتاثره انا مابا اعيش هالتجربه ادري كل شي مكتوب ومقدر الحمدلله ع كل حال )
في نفس الوقت يشتغل خاص الخاص ما يعيش احين وانا متعوده ع الرفاهيه في بيت ابوي غير جي نحن نسكن العاصمه هم يسكنون منطقه تابعه لها يعني ناس ع قد حالهم مب متكبرين والحمدلله عندهم الله رازقنهم
وانا لما قلت بييني احسن عنه قصدي انه بيي ريال بشكل تقليدي مب تعارف يعني اغلب زواجات العايله تقليديه فاحس انه الشي شاذ ومستنكرتنه وجني اخدع اهلي مب قصدي اتنقى هذا الاحسن وهذا عنده وهذا وهذا اساسا لما يتقدم واحد ع خلق ودين ويشتغل اهلي بيوافقون عليه صح لي راي بس بيحاولون يقنعوني اذا الريال فعلا زين
وفعلا انا متعقده من الرياييل وبلاويهم سواء من تجارب غيري ولا من اللي حولي واللي اقراه عسب جي احسني ماقدر اصدقه واتم اشك انه يكذب واخاف ابتلي ب واحد عقب ما يحترمني ويكون عصبي والله يجازيني ع فعلتي فالريال
بالنسبه للي يقولن لا ترمسينه تراني ما ارمسه من قبل قاطعتنه لين يزهب عمره بس خلاص كذبت عليه وانهيت الموضوع
وهالشي في بالي انه اللي انبنى على حرام ترى هو حرام والله انا مب راعيه شباب والموضوع صار صدفه وما كنت متوقعه يوصل لجي
ونفس الوقت انا مابا اتخذ قرار اندم عليه مثلا عشان اشرد من المشاكل فالبيت او عشان شي معين او او او …. كل بنت تبا تتزوج وتبا الستر محد ما يبا لكن واضح من الموضوع اني انا ماعارفه لنفسي انا ابا ولا مابا انا مره اصف جي ومره اصف جي واقول هو ذنب انا تبت منه والله بيكتب لي الاحسن وبيوفقه مع غيري
ادري انه بييني واحد من طينتي ( الطيبون لطيبات والخبيثون للخبيثات. )
هل انا علي ذنب احين اني سويت فيه جي ؟؟
للعلم قبل انا حذرته من العلاقه وقلت بتعلق فيني قال لا هالكلام قبل لما كنت اكلمه وعقبها فتره ماقدرت اتحمل اللي اسويه حسيت بالغلط واضطريت اكذب وحذفته عشان اسكر السالفه لكن الولد رد يدور عني لين حصلني وصديته وعدني عقب يتقدم وانه يباني ويعرف اني اكذب وهو ما صدقني وتم جابرني وتميت مغصوبه اني اسايره لان ماحس بالقناعه
وفعلا هو مافي شي غصب واكون مجبوره اعيش عشانه
الغالبيه هني فالمنتدى اكبر عني ويفهمون اشياء يمكن ماعرفها وينظرون للموضوع بنظره ثانيه
شكرا لكل وحده دشت وكتبت كلمه عشاني
تمت الموافقة
الكلمة الطيبة صـــــدقة
حبيبتي بعدج صغيره ع العرس انا عرست بعمرج والحينه عمري 26 لا عشت حياتي ولا استانست الزواج مسؤوليه و عيال ف بعدج ع هالاشيا خلصي دراستج واشتغلي وحققي طموحج خذي سياره سافري مع هلج استانسي مع ربيعاتج ويوم الله يكتب بييج ولد الحلال لي يناسبج وتناسبينه انشالله
وهذا الله بيسهل عليه واذا شفتيه رد يدورج غيري رقمج وفكي عمرج من ويع الراس لانه هالدرب كان غلط لاتردينله لو شو ماصار لا تتلومين ولا شي الفلوس لي يمعهن بياخذ فيهن وحده تناسبه والشغل بيفيده ب العكس ما بيضره هو يمكن حاط فباله يتزوج عن حب وانتي ماتبين علاقه قبل الزواج وهالشي من حقج هالزمن لاتثقين ف حد
الله يوفقج حبي ❤
هيه انتي مب مقتنعه فيه ك زوج
ف خلاص اللي سويتيه صح
خليه ف حاله وخليج في حالج
عيشي حياتج بعيد عنه
وقرارج صح انج ما استمريتي ع الغلط
اما تانيب الضمير هذا من الشيطان عشان تردين ترمسينه
بالتوفيق
هل يعرف انج بنت خير وعندكم خير ان كان لا
خليه يجرب ويجى يتقدم حتى لو كان فقير واهلج شي طبيعى بسالو عنه ان كان اخلاق وملتزم ويصلي بعدها بخبرونج عن الي عرفو عنه وعن وضعه المالي ان على قد حاله الزوجه الذكيه من تشجع زوجها ويطمح ويحاول يستثمر فيشتغل بدون ديون لكن لا يصعد بسرعه خطوه خطوه من اجل يكافح وتشجيعك له بكون حافز له وحذاري لما يكون نصيب تقولي له اهلي جي هم بخير وانت بعدك فقير ولكن شجعيه ولما يقدم لج هديه فترة الخطوبه او الزواج افرحى بها حتى لو كانت قيمتها رخيصه
الحل النهائي للوضع بينكم ان كان جاد يتقدم خلال الاسبوع هذا ان تماطل او طلب صور او طلب لقاء فورا ابعدى عنه ان كان يريد رؤيتج نظره شرعيه يجى المنزل والقرار الاول والاخير لج والتعاون في الزواج جميل بين الزوج وزوجته
اختي اول شي لا تتعقدين من الزواج والرياييل ولا شي
مثل ما تقول لي امي دايما، كل واحد ياخذ نصيبه من الدنيا
واللي مكتوب لج هو اللي بتحصلينه، ثانيا برغم عدم اقتناعج، ف لازم تعرفين انه من ترك شيئا لله عوضه الله بخير منه
ابتعدتي عن الريال ف حاولي تنسين الموضوع، مهما كانت الطريقة اللي ابتعدتي فيها ف لا تخلين الشيطان يلعب ف مخج ويأثر عليج وكل ما حسيتي بتأنيب الضمير استغفري وبترتاحين ان شاء الله، وبعد وف النهاية لو هالريال من نصيبج أو لا ف كله خيرة من رب العالمين.
نفس ماقلتلج بالرد الاول
خلي الريال فحاله وبس