تجربة ولادتي في مستشفى النور في بوظبي

اشحالكم حومل ؟؟

مثل ماكنت انا ادور طول الوقت عن قصص و تجارب الولادة اعرف انه في غيري يدور وانا الصراحه دورت عن مستشفى لنور الي في شارع المطار وماحصلت اي حد مجربنه

طبعا توكلت على اللله صليت استخاره و توكلت على الله اني اربي في مستشفى النور الي بشارع المطار في بوظبي

وانا اعتبرها فعلا تجربه سيئة انا بقولكم التفاصيل و بعدها انتو شوفو اذا اتأيدوني بانها تجربه سيئه او اني انا الي بس احسها جي لان كنت بجر

انا كنت اراجع عند الدكتور بشار من بداية حملي لانه الوحيد الي كنت احصل عنده مواعيد فالويكند بما اني ساكنه فالعين و اي بوظبي فالويكند و كنت اراجع عنده لين اخر شهر تقريبا يلست في بيت اهلي و حولت موعدي عند الدكتورة فوزية وهي استشارية امراض نسائية و مسؤوولة القسم

و الي ساكن فالشارجه ممكن يعرفها كانت تشتغل في مسشتفى القاسمي و عقب جنها فنشت و يت هالمستشفى الخاص و للاسف هالكلام عرفته عقب ماربيت

المهم راجعت عندها موعدين و ع موعد ولادتي 27-12- بدت عندي الالام

الساعه 12 نزل عندي دم و تم ينزل تقريبا للساعه 1 و الام خفيفه و انا كنت رايحه ازور عماتي و عقب عالساعه 1 رديت البيت و بدت الالام اتزيد و تنتظم تقريبا

شربت قرففه و ظهرت من البيت عالساعه 2 و الالم كان بزياده يالس يزيد

دخلوني على طول غرفت الولاده بما انه نزل عندي الدم و يتني الدكتورة المناوبة اول شي و جيكت قالتلي مفتوح عندج 1 سم وقالت انتي شكلج مابتربين الحين ييتي مستعيله و الالم يالس يزيد وكنت شوي واظربها صدق كنت تعبانه لانه هلاالام اول مره اتيني ومش قادره اوصف لامي كيف الالم عشان جي ييت المستشفى بسرعه عقب قالتلي امي قومي امشي و بديت امشي فالممر رايحه ويايه وكان عندي الطلق 160 قبل لا ابدا امشي ومنتظم

و مشيت نص ساعه وعقب مارمت امشي خلاص ورحت الغرفه عقب كان الطلق واصل لل170 و قلتلها نادي الدكتورة فوزية بسرعه انا تعبانه اتقولي لازم يفتح اكثر بس شوي الا الدكتورة يتني لانه كانت تحت بالعياده و مرت علي فوق و يوم يت اتشوف الرحم قاللتي فتح 3 سم و حسيت انه الالم بيطلع من عيوني

و عقب قالتلي راس البيبي فوق بعده مانزل فوق تقريبا 2 و نص سم و عقب قلتلها انا طلبت ابرة الظهر
اباها بسرعه و قالتلي اوكيه و نادولي الدكتور ويا الدكتور اسمه الدكتور محمود

و يا تم يشرحلي عن الابره وهو متفيج يشوف الالم كيف يالس يزيد عقب تم ربع ساعه تقريبا يركب الابره و ها تقريبا عقب المغرب المهم ركب الابره و ارتحت فالبدايه من الالم

لمدة 30 دقيقه بس

و الدكتور راح البيت و عقب هالنص ساعه رجع الالم قوي اكثر من قبل و الطلق كان تقريبا 180

وكل شوي انادي النيرس طبعا ماعندي حد الدكتورة راحت و الدكتور البنج راح

انا عمري ماسمعت انه في دكتور تخدير يحط ابره الظهر و يرد البيت !!!!!

صدق ماشي مسؤولية

و يتني النيرس قالت الدكتور قالي ازيدج البنج و ها كله عن طريق التلفون و تمت كل شوي اتزيد اتزيد اتزيد في هالبنج وماشي فايده اقولها انا يالسه احس بالالم قوي

و عقب نادو الدكتورة و يت الدكتورة قالت بعده الياهل فوق و الرحم بس فاتح 3 سم و لازم نفتح الرحم عشان انشوف لون الماي لانه دقاته بدت تضعف و يوم فتحته كان عالساعه 8 تقريبا قالت لونه اخضر تقريبا ( معناته انه الياهل بدا بطنه يطل و صخ يعني يخرج .. و كان المفروض يولدوني على طول عشان الياهل مايشرب هالماي بس ابد لا حياة لمن تنادي ) و رجعت الدكتورة راحت بيتها

و طبعا البنج مافاد و النيرس كل شي اتزيد الكميه .. و الالم يزيد و الطلق يزيد والرحم مافتح و لا راس الياهل نزل

و قلتلهم نادو الدكتورة و نادو دكتور البنج و طبعا بعد ظرابه

ريلي اتظارب معاهم و غصب يا دكتور البنج عالساعه 12 و الدكتورة يت بعد و عقب الدكتورة قالت و الله دقاته خفت و الراس بعده عجنب ما نزل ضبط

و هالكلام توها اتقوله بعد عناء من الظهر لين 12 فليل ماقالتلنه انه الراس ياي عجنب حتى قبل بيومين كنت عندها ع موعدي قالتلي كل شي تمام الراس تحت و تمام

و الحين يوم شافو طلقيى وصل 190 و الرحم مايفتح لانه الراس مانزل و الياهل يالس يسوي يدفع نفسه بس يظرب ع خصري و خلاص تعبت و قلت حق ريلي ابا عملية ماقدر اتحمل اكثر من جي خلاص

عقب الدكتورة توها عقب هالعناء قالت لا انتي لازم عملية لانه الطفل شكله مابينزل

و سحبوني لغرفة العمليات و عقب حظرته دكتور البنج تم بعد يزيد فالبنج و انا احس بالالم هم على اساس انهم بيعطوني بنج نصفي بس مافاد معاي لين عطوني بنج كامل

و هالكلام الساعه 1 فليل وريلي يقولي طلعو الولد من العمليات الساعه 1 و نص و حطوه فالعنايه لانه كان شارب ماي

و انا طلعوني الساعه 4 و نص تقريبا

و ثاني يوم اشوف الدكتورة يتني قالتلي انتي ياج تشنج فالعملية و تسالني انتي فيج صرع قلتلها لا مافيني صرع و لا شي

عقب تقريبا كل الاستشاريين صارو ايون عندي الغرفه يفحصون طبعا خافو انهم سوو شي فيني فيبون يبينون اهتمامهم الحين

و استشاري اعصاب و استشاري باطنيه و دكتور التخدير هييل كل يوم كانو يمرون و يفحصون و اشعه و خرابيط حتى انهم بغو يسوولي تخطيط مخ و اشعة الرنيم المغناطيسي بس ريلي مارضى لانه مافي شي هو كل التشنج الي ياني سببه كمية البنج الي عطوني اياها

بس الموضوع الي انا استغربته كيف البنج مافاد معاي ابد

حتى الدكتورة قالتي انه نحنا يوم كنا نبا انسويلج تخدير نصفي انتي بديتي اتحسين بالعملية عشان جي عطيناج بنج كامل المهم هذا الي صار و هاي البهدله الي بهدلوني اياها

يعني انا بجر المفروض اتكون الدكتورة عندي طول الوقت و دكتور التخدير لازم يكون عندي لانه هاي ابره فالعمود الفقري خطر ايخليها فظهري و يروح ينخمد فبيته و النيرس اتزيد البنج

المهم الحمدلله هاي رحمه من اللله و اللله لو مب رحمة اللله كانت موجوده جان ماظهرت من غرفة العمليات من هالبنج الحمدللله والشكر

و انا عقب اسبوع يتني ربيعتي تشتغل فمستشفى القاسمي دكتورة هناك قالتلي الحمدلله ماسوتلج طبيعي لانه هاي اي وحده اتولدها طبيعي عقب شهر اتروح تتعالج مسالك لانها دوم اتخيط المثانه قلتلها و الله لاني صليت استخاره في هالدكتورة ربي رحمني صح تعذبت لكن اجر

طبعا مهما كان الواحد يصلي استخاره يطمن عشان عقب العملية مايقول احسن لو ماييت المستشفى لكن هاي خيره من الله و رحمه انه انا وولدي طلعنا من المستشفى

طبعا انا طولت فالكلام بس قلت افيدكم

و الي يفكر يربي اهناك انا انصحكم لا تربون اهناك لانه ماعندهم خبره هاي مسؤولة القسم و استشاريه بهدلتني و غير البهدله الي تبهدلتها مع النيرسات و الدكاتره وقت الولاده وبس

انا الي خلاني فالبدايه اطمن لانه خالتي مربية بس في مستشفى النور الي داخل و سمعت كل حد يمدحه و اتوقعت انه الي فشارع المطار بيكون افضل

لكن للاسف العكس هييل الي بشارع المطار ماعندهم خبره ابد و الدكاتره الريااييل اهناك د.مروان و د.بشار شكلهم يفهمون اكثر من الحريم لكن صعب ريال يولدج

و الي يبا مستشفى النور الي داخل يمدحون د.شيرين

و التخدير الي فالظهر يوم سوته خالتي قالتلي انها ماكانت اتحس الا بدفع بصيت بدون الم

و بالنسبه للاسعار انا ماعرف كم سعر الولاده لانه كان عالضمان بس ابره التخدير بس ابرة التخدير ب1800 درهم بس لانهم غلطانين مادفعوني الابره

و بس لا تحرمونا من دعواتكم انا و وضناي ^_^

و بس سؤال للي مسويات قبل قيصري و قرت موضوعي ممكن اتخبرني كيف اخلي الكرشة اتروح لانه عندي كروشه صغيره و قالولي لا تسوين ريالضه و مضايقه منها فيدوني للي يعرف

و سلامتكم

ربي يحفظكم

في الاول كنت اروح عند الدكتورة ماجده .. حسيتها واايد زينه .. وارتحت ان شفت وحده في المنتدى كاتبه عنهاا .. بس خوفي الوحيد ان تولدني قيصري ..

صليت استخارة بين مستشفى النور ومستشفى الرحبه

وارتحت للنور اليديد بعد مارحت وشفت الغرف وتعامل الدكتورة معاي طبعاا

ورحت الرحبة وكرهته سبحان الله

بس قلت رغم جي بربي فالرحبه لانه حكومي .. بس الله لايراويج بهدلوني اخر بهدله وغير الخياطه اللي مفتوحه لين يومج هذا …

انا الحين حامل مره ثانيه وناويه اربي فالنور اليديد .. ما سمعتي شي عن الدكتورة ماجده .انا من النوع اللي استحمل الالم واضغط على عمري .. بس هل هم من النوع اللي دكاترتهم يفضلون الصناعي من الولاده الطبيعية

وثانيا انا اول مرة اشوف ابره التخدير اللي في الظهر (Epidural) تحسين بالعوار .. انتي الله رحمج .. ولا معروف ان ابره الظهر موووووووول ما تحسين بالالم وحتى لدرجة يقولج ان من مساوئها انج ما تحسين يوم تسوين بوش ..
ابره تنعطى في العمود الفقرييعني صوب النخاع وممكن اي غلطة بسيطة في استخدمها تسبب شلل لا قدر الله ..

حسبي الله ونعم الوكيل..

عندي تعليق بسيط بس لاغير و السموووحه منج

انتي موقف واحد و حكمتى ان المستشفى مب زين و انتي بينتي الجانب السلبي لانج كنتي اتحسين بالويع

ياما ناس جربوه ماحد اشتكى و انا بقولج الولاده انتي و حظج يعني يا الله يسهل امور ولادتج يا يصعبها
فانتي كنتي من النوع الي ولادته صعبه

يعني عندج الكورنيش مع انه تخصص بس شوفي فيه ناس يمدحونه و ناس يشتكون منه
المفرق فيه الي يمدحه و فيه الي يذمه و الرحبه و النور نفس الشي

يعني انتي و حظج