السلام عليكم و رحمة الله و بركاته
عندي سؤال للي يبنون في ارض مساحتها 100 * 100 (الملاحق مشبوكة بالفلة)
1. بالنسبة لغرفة الغسيل كيف ترتيبها خلف الفلة ؟؟ ما ابغي احطها داخل
2. اذا سمعتوا عن الديرتي كيتشن .. كيف رتبتوها ؟؟
شكرا جزيلا
اهلين الغاليه
انا بيتي سويت غرفة الغسيل والستور داخل الفيلا حتى يكون اسهل لي اغسل مستقبلا اذا ماعندي شغاله بدال لا اطلع برع الفيلا كل شوي
والدرتي كيتشن ضروري للشوي والقلي وهالسوالف تكون برع الفيلا انا ناويه اسويه ان شاء الله
غرفة الغسيل خليها ورا الفله ويا الملاحق الي محتاجتنهن
مثلا غرفة المطبخ والديرتي كيتشن أعتقد تقصدين
المطبخ الي فيه ( التنور ) الي يكون مفتوح هذا
بيفيدج في حال كنتوا من النوع الي تحبون
السمج المشوي والدياي / الهريس والخ من
الاكلات الي تختاج نخمطها في التنور
هو حاجة أساسية في أغلب البيوت
الاماراتية وفي ناس يحطون كذلك
على زاوية ركن للقلي حيث إنه يكون
خارجي أفضل عشان ما تتجمع الزيوت
على جدران المطبخ الداخلي
غرفة الغسيل تكون ملاصقه لغرفة مخصصه
للكوي واذا كنتي من النوع الي تحبين ترتبين
وتخزنين خصصي لج غرفة ( ستور ) حطي
فيها أرفف بتساعدج في التنظيم بعد وفي
ناس الي عندهم ماشاء الله وايد عيال
يفضلون بناء غرفه خارجيه لليلسه في الفترة
المسائية
بالنسبة لي في بداية ما تحولت ما كان عندي مطبخ خارجي
ولا غرفة غسيل وكان الموضوع جداً مزعج روائح الاكل كلها في الصالة
والغرف ،، لكن الحمدلله شوي شوي بنينا ملحق ومطبخ خارجي
وغرفة للغسيل يعني إذا تبين نصيحتي لا تخلين أي شي عندج
داخل يوم يكونن برع وايد أفضل
هذا كله يعتمد على تخططيج ومدى إحتياجج
للغرفة أو للملحق الخارجي