بيتزا التونة لذيذة وسهلة وسريعة :) لا تفوتكم

1 جيس صمون دوائر صغار نقطعهم نصين ( انا ماستخدمت الجيس كامل تقريبا 6 حبات بس يعني طلعولي بعد ماقطعتهم 12 حبة وهالخلطة بتقدرين تسوين اكثر من 12 بس انا كثرت من الخلطة على كل حبة لاني مابا اسوي وايد)

1 بصلة مقطعة قطع وااايد صغار ( قطعتهم باستخدام جهاز براون ملتي كويك )

1 حبة جزر او نصف اذا كانت الجزرة كبيرة (مبشور او مقطع قطع صغار)

1 تقريبا ورقة ملفوف كامله (مقطعة قطع صغار بعد بالمكينة قطعتهم )

1 م صغيرة بزار , شوية ملح وفلفل اسود

مايونيز وجبن موزريلا

الطريقة :

نقلي البصل بشوية زيت لين يذبل
نضيف التونة ونخلطهم , ونضيف البزار والفلفل الاسود
نضيف الجزر والملفوف ونحركه لين يذبل الملفوف
ونشله من ع النار

بهالوقت نشغل الفرن بس فوق

ندهن الصمون بشوية مايونيز ونحط فوقه الخلطة مال التونة , واخر شي شوي جبن موزريلا
نحطهم كلهم بصينية فرن وندخلها الفرن ومايطول دقايق بس لين يذوب الجبن وبس