بعد الولاده بيت هلج والا بيت ريلج؟؟

اخواتي الغاليات.. عندي استفسار مهم جدا قد لا يعنيني شخصيا ولكن يهمني معرفة رايكم..

بعد الولاده تروحين بيت اهلج؟؟ كم يوم؟؟ وليش؟

ومتى ترجعين بيت ريلج؟؟

انا شخصيا اشوف ان الحرمه اذا بتربي (ولاده طبيعيه) والوضع الصحي مستقر تروح عند اهلها اسبوعين بالكثير وترجع بيت ريلها.. للاسباب التاليه..

اولا: ما يصير يتم ريلج بروحه كل هالفتره.. الله العالم شو يسوي او كيف يقضي وقته خاصه انه تعود عليج في بيتكم

ثانيا: البيبي ولده ولازم الريل يحس بالمسؤوليه يعني مب بس انتي اللي تسهرين وتتلعوزين مع البيبي لازم هو يشارك في هالمسؤوليه..

ثالثا: اللي بتقول "منظري مب حلو او ما اكون متعدله مثل ما كنت قبل الولاده" بقول لها بتكونين نظيفه ومتسبحه وريلج بيشوفج ويشوف البيبي وهذا الاهم.. وجودج في البيت جدام عيون ريلج.. وممكن تكونين في غرفه بروحج مع البيبي (حسب الاتفاق او الترتيب)

رابعا: اذا احتجتي مساعده من امج او خواتج فما بيقصرون.. بييون عندج

طبعا اذا بيت هلج في اماره وبيت ريلج في اماره الوضع يختلف.. واذا الولاده قيصريه او في مضاعفات بعد الولاده الوضع بيختلف..

لكن انا ضد ان الحرمه تقضي ٤٠ يوم في بيت اهلها بعيد عن ريلها وتخليه يواجه الحياه بطريقه يديدة وعقب تقول ليش تغير معاي..

شو رايكم خواتي؟؟ رايكم بيثري الموضوع

يمكن ثاني بيبي مابقعد وايد…

حبيبتي تيلسين وين ترتاحين

انا اروح عند امي لانه هي بتقوم بواجب الضيوف
وبتسويلي الاكلات الي لازمتني

وهي تعرف اكثر مني فاستفيد منها في هاي الفتره

والنقطه الاهم انها تتقبل

الله يحفظهم الامهات لنا

يا رب ارحمهما كما ربياني صغيرا

البجر بتعبين وايد في النفاس وبروحج بتقررين بعد الولاده الوضع اللي يريحج