ٱڵڛڵٱمَ ؏ـڵېڰم ۅړζـمۃ ٱڵڵـھ ۅبړڰٱٺھ
خواتي أنـْْ♡ـْْا متزوجه وزوجي ايام الويكند مــ̯͡ا اشوفه لين الليل يطلع مـِْט الصبح ويه ربعه مايرد الا وقت الرقاد ومانعني مـِْט الطلعه اذا هو محد
شو اسوي كيف اشغل نفس والله اتم يالسه ملانه ماعندي شي اسويه وعيالي يتمون يحنون يبون يطلعون لان بروحهم ف البيت وماعندهم حد
وعيالي صغار واحد عمره سنه ونص والثاني سنتين ونص
وانا مغتربه ماعرف حد اهني عسب جي ماعرف وين اروح ولا عندي ربع اطلع وياهم
ليش تخلينه يقضي الويكند ويا ربعه؟
لازم تفهمينه انه مسؤول عن عيال وحرمه
لازم يعطيهم حقهم، يعني يوم ف الويكند له
يطلع ويا ربعه وانتي تقضينه ويا اهلج واليوم
الثاني لعايلته اللي هم انتي وعياله، واليوم الثالث
تزورون اهله او يكون يوم راحه لكم ف البيت
ناقشيه ورتبوا اموركم ويا بعض وفهميه انه هالشي
ما تحبينه وانج تبينه يكون وياكم والعيال يشوفونه
ف البيت وياهم
مراسيل الوفا
تسلمن ع الرد بس هو من يوم ماعرسنا كان يقول انه من زمان ع هالنظام ويقولي مابيج تفتحين هالموضوع وياي مره ثانيه
المفروض من رمسج عن هالشي كنتي تحطين النقاط ع الحروف وتقوليله اسمحلي يا فلان
ماقدر ارضى ب نظامك وتخلينه يطلع بحل يرضيه ويرضيج ف نفس الوقت، بس دامه قالج
ما يبا يفتح هالموضوع مره ثانيه، خلاص اتبعي وياه اسلوب السياسه، شوفي الاشيا اللي يحبها
او اللي تخليه يتم وياكم اكثر وسويله اياها، او مثلا بالكلام الحلو خليه يوم يطلع ويا ربعه ومن
يرد كلميه قوليله باجر بنسوي جي او شو رايك نسوي هالشي فتره لين ما يتعود ع الوضع لانه
صعبه اتمين جي ما يخليج تطلعين ونفس الوقت ما يتم وياكم، واذا ما عيبه هالشي ف كلميه بأسلوب
هادي قوليله يا انه يخليج تطلعين ويا العيال تستانسون مثل ما هو يستانس ويا ربعه او انه يغير
نظامه ويعطيكم من وقته
انا مع الأخت مراسيل
مافي شي اسمه انا من زمان ع هالنظام
انت الحين زوج وأب مسؤول وهذي مهمتك
لا تتنازلين عن هالشي لانه واجب عليه وحق لج ولعيالج انه يعطيكم من وقته
يعني هو يطلع ويستانس وانتوا ما يصير تطلعون مكان؟!
خليج واضحه وحازمه
وباقي ايام الاسبوع وين يكون؟
فإذا طول الاسبوع معاكم خليه يرفه عن نفسه وانتي سيري بيت اهلج قعدي معاهم
المشكله أنـْْ♡ـْْا ف دوله وهلي ف دوله ثانيه وماعنده خوات كله وخوانه كلهم شباب
باقي الاسبوع الصبح دوام لين الظهر وعقب يرد يتغدا ويرقد للمغرب وعقب المغرب بعد يقول هالوقت اروح عند ربعي