انكتبلها عمر يديد والسبب () انتبهوا

لكل وحده بدت اتأكل ولدها او بنتها او اتفكر تأكلهم اقرو قصة بنتي فديتها وانتبهو..

من دخلت بنتي الشهر الخامس وبديت ادخل لها اكل بأمر من الدكتوره..عطيتها خضار وفواكهه كل نوع 3 ايام وعقب اخلط الخضار مع عيش مصري كوجبه والفاكهه مع بعض كوجبه ثانيه..بعدين دخلتلها الروب والحمدلله كان كل شي اوكي…المشكله يوم بديت ادخلها الروب الي بالفواكهه والي اسمه دانينو..اول شي بنتي عادي ما صارلها شي بالعكس حبته وكنت كل يوم المغرب اعطيها وكانت وااااايد تحبه..

في يوم عطيتها الروب ورقدت شوي وقامت اتصيييييييييح ما اعرف شو فيها عقب رجعت وحسيتها من بعد ما رجعت مش قادره تتنفس واتطلع صوت مثل الي تتعصر..اول شي اقول حق اختيه مافيها شي لا تخافين بس قمت احس انها اتزيد قالتلي اختيه قومي وديها المستشفى وكانت الساعه 11 فاليل..واخويه حليله توه داخل البيت وسرنا على طول..اول ما وصلت ودخلت على الدكتوره قالت المشكله مش من بطنها المشكله في صدرها..اول ما رفعت بنتي من السريراشوف شفايفها صارت سووووووودا وويها ازرق ووقف التنفس وبدت تفقد الوعي….الله لا يراويكن هالمنظر انشالله..بديت اصاااااارخ واصيح..على طول اسعفوها بالاكسجين والابار وكانو بيحولونا الانعاش في مستشفى حكومي بس للاسف ما كان فيه غرف…طلبولي استشاري اطفال والدكتوره وتمو واقفين عندي لين الفجر ويوم شافو بنتي رجعت تتنفس طبيعي قالولي الحمدلله بنتج انكتبلها عمر يديد..لان نسبة الاكسجين كانت 60 وهي المفروض 100 يعني اختناق والسبب هو:
انها يوم رجعت استنشقت الاكل من الانف ودخل الاكل في الرئه وسببلها التهاب رئوي حاد وطبعا رقدونا في المستشفى وعطوها مضادات عن طريق المغذي..

بعد 4 ايام طلعنا من المستشفى وكان يوم السبت..الاحد المغرب عطيت بنتي شوي من الروب وكانت تبا ترقد بس اشوفها متملله واتصيح وشوي وبديت اشوف نفس حالة الاختناق رجعتلها وركضت مثل المينونه المستشفى والحمدلله اتلاحقوها للمره الثانيه بس هالمره انعرف السبب الرئيسي والي هو:

حساسيه من الروب او من الفواكهه الي كانت داخل الروب… ((اخر شي كنت اتخيله))

وطبعا رقدونا فالمستشفى للمره الثانيه وقالو البنت لازم اتكون تحت المراقبه..وسولها تحليل دم عشان انعرف شو الاشياء الثانيه الي اتسويلها حساسيه غير منتجات الالبان…

خواتي انتبهن في حساسيات واااااايد خطره وتؤدي الى موت الطفل (بعيد الشر عن عيالكن)) مثل بنتي العوده عندها حساسيه خطره من المكسرات واذا ما اتلاحقناها تتنفخ ويوقف تنفسها بس الحمدلله ما اتعرضت لهالموقف معاها…