المشكله اللي في ظني ما تنحل

اشحالكن بنات بقولكن شو استوى ويايه بالتفصيل ^^

انا مستانسه تراني اليوم كنت مضيجه الصبح بس اللحينه مستانسه وايد

شوفن بنات انا سويت بنصيحتكن لجأت لربي في كل حايه ابغيها و فوضت امري لله

والحمد لله ، صدق صدق الله ما خيب ظني

بقولكن شو سويت

اول شي انا ما سكت عن حقي وسويت مشاكل وايد لاني اكتشفت انه السكوت مرض يوم ما يكون

في محله ويوم تبدي الناس على حايتك تراك تستهلك نفسك وطاقتك فانا قررت اني ابدي نفسي

اول شي وخلاف الناس الباقين لاني يوم بحب نفسي بحترمها وبصونها والناس بينجبرون على

احترامي وفعلا انا سويت هالشي واتخذت موقف اني ما اسمح لأي شخص مهما كانت صلاحياته

انه يتمادى عليه او يستغلني //

ابويه واجهته وايد ويوم يه بيضربني قلت له انته ها اللي تروم عليه ؟ قالي انتي شو ترومين

قلت له الله يروم ، سكت وما عرف شو يررررررد وانسحب ..

اليوم شفته يصلي غمضني ما ادري ليش ! انا قلبي وايد رهيف خلاف يوم شفته يالس خاري بسته على راسه

وانا اصلا ما كنت متعوده على هالشي تعرفون ما تعلمت احب !! بس سويت هالشي

المهم انه هو اللحينه اوكي ويايه وبيعطيني بيزاتي كله وااليوم سألني حصلتي شغل ؟

وان شاء الله احصل …

انا اليوم سرت الجامعه قلت ليش اعيش عمري في دوامه ما تنتهي لازم اسوي مخرج لنفسي

سرت الجامعه يلست ويا ربيعاتي دورت لي شغل واذا ما حصلت باخذ لي كورسات المهم اسوي

شي لنفسي واساعد عمري انا كنت ساكته على بالي بيحسون فيني بس هم ما حسوا ولا بيحسون

وانا ما يهمني المهم انا ما افقد احساسي ونفسي …

اللحينه انا اعيش اخواني واخواتي في حب وسلام بعيد عن الكراهيه والقسوه لاني عشت هالشي

حتى اخوي البارحه يايب لي دبدوب هههههه فديته والله

وامي ما زالت تتعامل ويايه بنفس اسلوب القسوه منو يتحمل حد دوم يكشر في ويهه او كله يصارخ؟

محد بيتحمل جيه / هيه الله يهديها بس بعد كل شي وله حده ، اتصلت على الدعم الاجتماعي وبرمس

مختصه عن مشكلتي وياها عشان تعلمني كيف اقدر اتعامل او على الاقل اتفادى المشاكل وياها

لاني انا وصلت لمرحله وايد صعبه في حياتي حتى يتني اوقات ما اروم انام او اكل او حتى افكر

وكنت احس اني برحل عن هالدنيا… بس الحمد لله الله ما يخيب ظن عبده

بناات من تجربتي تعلمت وايد اشياء

اللي يبا الحب يزرع الحب ويعيشه حتى لو مب موجود يخلقه في الاشياء اللي حوليه وهالاحساس

بييه لين عنده بدون ما يتعب عمره ويدوره