السلام عليكم
اعذروني كلامي مو مرتب ما اعرف كيف ابتدئ انا حاسه بخوف مو حاسه بالأمان خايفه ريلي يزوج علي مافي اسباب بس احس هو من النوع اللي يمل بسرعه احس هو وايد يحب يغير شغلات سياراته تيلفوناته كلامه ما يطمن اقوله ليش تحب تغير سياراتك يقولي انا أغير سيارات في غيري يغير زوجاته ويضحك علاقتي بأهله مو حلوه حاولت أتقرب بهدايا وغيره بس مافي أمل يحسبوني وحده منهم وفيهم انا اشتغل وأشتري كل شي خاطري فيه ويوم أيون أهله يقولون لي خفي عليه انزين انا اشتري من راتبي محد له دخل
احب كل حريم اخواني بس وحده وايد قريبه مني واحس انها حاسه فيني وايد مع اني مو من النوع اللي يشتكي تقولي اخوج يعاملني كأني ملكه وانتي ريلج مو سأل فيج توني راجعه من ألمانيا وسويسرا انا ما ادوام بس اخوج مسوي لي راتب شهري وانتي أداومين وتساعدين في البيت بس ريلج مو سأل فيج
بين فتره وفتره اخوج يفجأني بهديا حلوه واخر مره راح اشترا لي سياره.
وإذ زعلت يجلب الدنيا عشان يراضيني عكس ريلج اذ زعلتي ما يهتم .
اللي متزوجات قولو لي شو اسوي انا صدق مو حاسه بالأمان
كنت أتمنى واحد نفس شخصيه اخوي بس كل شي في الدنيا نصيب
الحمد لله على كل شي
مممم..وليش حرمة اخوج جي تقولج؟ مافهمت؟ غريبة الصراحة..هي شو يخصها؟ قاعده تغايظج ولا كيف؟
قلتيها بنفسج حبيبتي , كل شي في الدنيا نصيب
كل شخص يعبر عن حبه بطريقته الخاصة , لا تشوفين غيرج ولا تتأثرين بعلاقة الآخرين ببعض
الإمان احساس ضروري في الحياة الزوجية , ركزي عالأمور الايجابية , واطردي الأفكار السلبية ,
بل واطردي الأشخاص السلبيين واللي يحبطونج في هالحياة
بالدعاء تقدرين تغيرين , ابدي بتغيير طريقة تفكيرج حبيبتي
ربي يسخر لج زوجج أختي
ويوفقج
كونه مزح وياج مرة عن هالموظوع مش معناته انه صدق من النوع اللي يحب التعدد.. وانتي لاتمين تزنين عليه وتتكلمين وايد فالموظوع عشان هو ما يحطه فباله..
احسج مكتأبة..الريال ما يحب الحرمة اللي دايما مكتأبه..عيشي حياتج ومارسي هواياتج سيري وتعالي ولا تحطين هالاشياء في بالج..لا تيبين حق عمرج الهم بيدج.. واذا اهل ريلج شافوا عندج شي حلو ويتحرون ولدهم يابه لج..بكل بساطه قولي انج ماخذتنه من فلوسج وصكي السالفه.. وما بيرمسون معاج مرة ثانية.
ومرت اخوج حركتها وياج مب حلوة.. اذا هي مستانسة وريلها زين مافي داعي تقولج انا ريلي يسويلي جي وانتي ريلج ما يسويلج سالفة او مب معبرنج.. والسموحة هاي مب حاسة فيج.. لو حاسة فيج وقريبة منج مثل ما تقولين جان ما قالتلج هالكلام.
مرت اخوج مكاره والله .. مستانسه على وضعج ولا شو
ومب كل شي بالهدايا و السفرات مايخصه دام حاشمنج خلاص
يعني هذا مب سبب انتي خايفه منه .. انا احب التغير ماستغر ما يتم الشي عندي سنه اغير كذا مره مافكرت اغير بو العيال لو مجرد التفكير لوول
لا تقيسين على هالمقياس اذا هو يحب التغير انتي غيري من استايلج بين فتره وفتره
سوي مفاجأت وجي شوي بس ثقي بنفسج شوي ولا تسمعين و لا تشوفين فلانه و علانه
ابتعدي عن حرمة اخوج بتكونين بخير
خواتي مشكورات على الرد
انا فعلا مكتئبه من التفكير من ها الموضوع
الحمد لله عايشه حياتي بس ها الشي غالب على تفكيري وايد
امه تقولي ولدي يمكن مو مرتاح وياج ما اعرف شو اللي خلاها تقول ها الشي هي تبغي تقهرني او يمكن هم ملاحظين شي انا مو ملاحظتنه ما اعرف
تعبت من التفكير