هلا خواتي انا سجلت ولدي فالحضانه لكن المشكله ان اكله كله لازم انا اعطيهم وجبات الفطور والغدا وقبل لاسجله ولدي تري ياكل من غدا البيت الاي ينطبخ فالحين اخاف يضعف وين الحق من الصبح اسوي له تلغدا متعود ياكل عيش مال الغدا وتعرفون الطبيخ ابدي علا 11 فاللي عيالها فالحضانه شو تعطيهم ساعدوني بوصفات او اقتراحات اما الريوق سهل صمون وجبن ا بيضه لكن احاتي الغدا وهل كل الحضانات جي نظامهم وشو احط له فشنطه عاديه والا فلنش بوكس مابيكفي غدا وريوق
بروحي محتارة لان دوام وادي يخلص 2 ونص
هلا حبيبتي مب لازم تحطين غداء ، انا الصراحه احب عيالي ياكلوا اكل حار ويديد مب بارد مااضمن انهم يسخنوه لهم …. حطي نوعين سندوجات جبن مثلا و شوكليت او شو يحب وعصيرين و بسكوت و فواكهه مثل عنب موز او برتقال مقصص صغار …. غيري كل مره نوع شوفي حاولي زعتر لبنه كراسون و بوبكورن يعني شو عيالج يحبون
المشاركة الأصلية كتبت بواسطة كتكوتة حبيبي 
هي انا نفسجج يعني حزه غداه احسه بيضعف وايد
فوري له الصبح عيش وحطي وياه قوطي وروب ..
اذا تقدرين الصبح تسوين ساندويجات دياي مع خضرة داخلها
ساندويجات تونة ويا خضرة
نوعي اذا الصبح عطيتيه مثلا جبن حطي له الظهر بيض ساندويج
خضار وفواكه فروت سالاد
فطاير دياي
مناقيش جين وزعتر
عادي حاولي تعطينه المهم انه ياكل ولا يتم لج باليوع .الله يبارك فيه
أنا كنت اجهز من الليل واحطه بالثلاجة ومرات اسويه الصبح
بتحتاجين علبتين مقسمات وحدة للصبح و وحدة للغدا اللي تتسكر يعني الها غطا وتصلح تنحط في الميكروويف وبتحتاجين علبة التبريد الزرقا
علبة الفطور:
ممكن تحطين بيضة مسلوقة أو قطعة جبن
سندويتش أو لقيمات أو خميرأو فطيرة
فاكهة مقطعة نوع أو أكثر أو تحطين موزة بقشرتها بس مب في العلبة لأنها مابتدخل
علبة حليب أو حليب بنكهة طبعاً مب في علبة الفطور بتكون مع العلبة داخل الشنطة
علبة الغدا:
قطعة سمك بدون عظم ولا جلد أو نص صدر دجاج بدون جلد ولا عظم أو لحم مكعبات صغيرة بدون عظم
عيش أو معكرونة أو بطاط أو ذرة صفرا
سلطة أو أصابع خيار وأصابع جزر وطمام تشيري
وبتحطين له علبة عصير معلب أو عصير من البيت
وللأمانة مرات على السريع اذا مابداني اطبخ او اتشرى احط لهم بسكويت وتمر حق الريوق وعقب اطبخ الغدا واطرشه
ومرات اكون رادة بوظبي الصبح ومايبديني اتسوق واطبخ فأمر شيشة البترول آخذ سلطة الفواكه الجاهزة وسلطة الخضار الجاهزة والعصاير وسندويتشات
بالنسبة للشنطة كنت ماخذه لهم نفس شنط الروضة عشان تكفي حق علبة الفطور وعلبة الغدا والعصاير والماي وطبعاً علب التبريد الزرقا وبعد كنت استخدم اكياس التبريد الزرقا
كل هذي الاشياء متوفرة في الكارفور و اللولو
أما بالنسبة للملابس والغيارات فمخلتنهم في الحضانة كل واحد له كيسة مكتوب عليه اسمه وكل ما ينقص شي ارسل مرة ثانية ومخلية عندهم كيسة الحفاظات الكبيرة والمناديل
احيد كان في موضوع مثبت عن تجهيزات شنطة الاكل بحط لج الروابط المفيدة عشان بعد باقي الامهات يستفيدن لأن الحين وقت العودة للمدارس