السلام عليكم
ببدا بالموضوع انا احس بالندم واللوم على تصرفي وحتى يمكن اعتبره وقاحه وغير قنوعه وما عاجبني العجب مادري صح اللي سويته او خطا شوفوا الموضوع وخبروني اول شي فيه واحد يحبني واشتغل عشاني دوامين يداوم عشان يولف مهر ويكون نفسه ويخطبني بسرعه واي شي اباه تم يصير والولد جنه خاتم في صبعي ماشاء الله مع انه انا مادري شقول لما كلمته ما كان نيتي تعارف اسااسا هو كلمني يطلب مني اخلص له موضوع بما اني مريت بنفس الشي فساعدته عادي وتم يتعلث يرمسني عشان يشكرني ويخبرني بنتايج اللي سويته من هني بدا الموضوع والحمدلله مافيه اي شي يسود الويه لا اتصالات لا طلعات ولا خرابيط هو يحترمني وانا تحترمه فانا لما افكر اقول مابا واحد يعرفني وبييني واحد احسن منه احسني انانيه مرات كسرت قلب الرياال وايد متعلق فيني واعرف اخته ولما تطري وضعه احس قلبي ينفطر طبعا اخته ماتعرف عن اللي صار بيني وبينه وانا قطعته ع اساس لو يباني ياخذني مب يرمسني من ورا اهلي المهم اني مليت منه احسه وايد ناشب لي وهو اذري يسوي جي يخاف يخسرني وكل يوم كان يقول لي بس ماحس اني مرتاحه في نفس الوقت احس اني تسرعت خاصه اخر مره كان يسالني عن اسمي لان يبا يتقدم لي وانا شسويت قلت بملج باجر عسب بس افتك من السالفه لان اخاف من المستقبل مابا اعيش تجربه خايسه ف شو تنصحوني ارد اعترف اني كذبت واخليه يتقدم او اتم ع وضعي والله يعينه لين ما ينساني هو ؟ للعلم انا من شهر وشي كذبت ومودرتنه بس من ذاك اليوم وانا احس باللوم قلبي يعورني مع انه ما افضى اتم افكر فيه كل وقتي مشغوله اداوم صيفي م وامتحانات وضغط بس رغم هذا افكر فيه ادور اخباره في حساباته
انا ماعرف ليش مب مقتنعه فيه واقول بيي غيره واحلم بشخص معين وشخصيه تكون مادري كيف وو مب عارفه لعمري ولله 💔💔💔
تمت الموافقة
الكلمة الطيبة صـــــدقة
خلاص اتخذت الخطوة الصحيحة ولا تتراجعين .لانج مو مقتنعه فيه ولا بوضعه الاقتصادي وتحاتين المستقبل فليش تعلقين الريال فيج مادام مو في نيتج الارتباط فيه اساسا ؟ واللي قاعدة تحسين فيه الحين ترا من وسوسة الشيطان مو تأنيب الضمير ولا شي لانه مبني على الخطأ .خلاص عيشي حياتج طبيعي وخليه بعد يعيش حياته والله يرزقه بنت الحلال اللي ترضيه ويرضيها .ويرزقه ع قد نيته وانت كذلك .انت اتخذت الخطوة الصحيحة مثل ماقلت لج ف البداية ولا تاخذين وتعطين مع الشباب وابتعدي عن هالامور ووجهي طاقاتج وتفكيرج للدراسه .والله يرزقج ع قد نيتج .هذا ردي على عجالة واتمنى اني قدرت افيدج .
كل التوفيق والسداد
اللي سويتيه غلط
صح انج لازم توقفين ترمسينه
بس يعني الريال نيته زينه
وناوي يتقدم وضغط على نفسه عشانج
ماظن كان بييج اللي احسن عنه
لان اللي يقدر يغير حياته عشانج بيسويلج اي عشان بس ترضين
لا تحطين في بالج بصبر وبييني اللي احسن
حطي في بالج هل هالريال بيداري علي وبيخاف الله فيني وبيصوني ولا لا
اذا كل مايتقدملج واحد بتقولين بييني الاحسن عمرج ماراح تتزوجين
الريال ماينقاس بفلوسه وماله
ينقاس بأخلاقه ومواقفه
سبحان الله اللي اييونكم من الباب تبون الفكة منه واللي يجذب عليكم تحبونه وتتعلقون فيه وعقب يفركم وتييون تكتبون قصصكم هني
والامثلة كثيره ف هالمنتدى
بطرانه انتي وغيرج طبيعه فالبشريه ما ألومج
اللي يباكم ما تبونه وتبون الفكة منه والي ما يباكم ومجذب عليكم تبون وتحبونه
اذا انتي ما تبينه خلاص خليه يشوف حياته وخليج صريحه معاه انج ما تبينه
واذا تبينه قوليله هاك اسمي وباب بيتنا تدله
ودام انتي كنتي تبين الفكة منه ليش الحين متلومه فيه خلاص انتهى قصته
انتي مب مجبوره تجاملين انسان ما تبينه خلاص انتي ما بغيتيه زوج لج وهذا من حقج وخلاص سكري السالفه
دامج متاكده انج ما تبينه ك زوج عيل هذا الشيطان يالس يحسسج بالذنب صوبه
اسالي عمرج شو تبين وامشي ع اللي انتي تبينه
بالتوفيق
انا لو مكانج واحد ما فكر يكلمني ويخرط علي بس اعرف انه يشتغل دوامين عشاني بقوله تعال اخطب كخطوة اولى وعشان اتاكد من كلامه اذا هو صادق ولا لاء
مو مهم اهلي يوافقون ولا يردونه
المهم سوه خطوه كبيره ومهمه تدل على انه ريال وشاريني
ماعرف بشو تحلمين وما كتبتي عن شخصيته
ولا عمره ولا مؤهلاته ولا حتى اذا هو ولد بلاد ولا من برع
خبرينا عشان نعطيج مشورة وافيه
الله ييسرلج كل خير