الله معاكم وان شاء الله يصدر القرار قريب

بنات انا حابه اتكلم معاكم عن موضوع من فتره وانا افكر فيه الى وهوه فئة البدون

من قريب رمست بنت وتعرفت عليها انسانه في قمت الذوق والاحساس ادب واخلاق والكل يشهد في تربيتها هي وخواتها وخوانها الشباب ……. انا يوم رمستها والله ماكنت اعرف ان هي بدون وقول هالبنت ماعنده اهموم او مشاكل …..ومره حسيتها متقدره ومهمومه سألتها افلانه اشفيج احسج مب انتي الي اعرفج قبل …..قالتلي لا والله ابد مافيني شي ،…….. بعد ماأصريت عليها فتحتلي قلبها قالتلي اخاف اقولج وتبعدين عني قالتلها قولي شو فيج وليش هالرمسه وانتي اتعرفيني عدل قولي افلانه الي في خاطرج قالتلي والله انا بدون قالتلها انزين شو يعني قالتلي مايعني شي بس والله محد حاس فينه خلاص تعبنه انعيش في هالدنيا ونتمنه الموت ارحم من هالعيشه الي نحن عايشينها قالتلها ليش صاير شي قالت والله نحن 9 اعيال 5 شباب واربع بنات ومن غير امي وابوي …. اخواني الشباب مايشتغلون كل مايقدمون على وظيفه اقولولهم ان شاء الله على شهايدهم ويوم اعرفون ان ماعندهم جوزات ماوظفونهم ابدون الاجانب علينه نحن اهني من 40 سنه عايشين في هالبلاد ناكل من خيرها ورابين فيها بس بعدنه ماحصلنه الجوزات
اختي تشتغل بس شو راتبها 3000 درهم شو اكفي هالراتب لي 11 شخص في البيت

قالتلي محد حاس بلي نحن حاسينه لا وظيفه لا مكان عدل …. نضحك في ويه الناس عشان مانبي انحسس حد ان نحن قاصرنه شي عشان مانكسر خاطر حد عايشين في هالدنيا بكرمتنه

وقريت قصه هي الي اثرت فيني اكثر واكثر وهاي القصه واقعيه وصايره احدثها في راس الخيمه

واحد بدون فقير على قد حاله كان يرسم لوحات ومصور فتغرافي حب بنت بس هالبنت من عيله عندهم جوازات وسوه المستحيل عشان ياخذها يشتغل براتب 2500 في شغل قطاع خاص اتمنه ياخذ الجواز بأي طريقه كان كل مايسير ارجع الجوزات اقولون اتريو دوركم وفي واحد قاله اتريد الجواز ادفع 70 الف وبتحصله ابسرعه قال انا ماريد اخذ الجواز بفلوس اريد اخذه بصدار من الدوله قاله عيل اتريه ….. المهم الريال فكر ياخذ البنت واول ماخطبها من اهله شي اكيد بصدونه لان بدون البنت اتمسكت فيه اكثر وعندت اهلها وخوها وقف معها وحاول يقنع الابو بأي طريقه يوم شافها مصره قاله اوكي بس بعدين تنسين اهلج قال اخوها خلاص انا بوقف معاها لان الريال شاريها ودبر عمره وتزوجها عاشو في غرفتين وصاله وحمام ومطبخ والبنت رضت لان هي شاريه الريال الي شاريها والله رزقهم بنت سموها زينب كان اقصرون على عمارهم عشان بس بنتهم تلبس احلا الملابس وتاكل احسن اكل اشوي اشوي الريال قام ابيع لوحته الفنيه عشان يكسب رزقه … بختصار الريال كان كل حلمه ياخذ الجواز وكون مواطن ….. طلعو مره رايحين دبي يتمشون وهو سرحان وسوه حادث والله اخذ امنته الريال وحرمته وبنته توفوا ……. الله يرحمهم برحمته

تعرفون متى حصل التوطين يوم اتوفه …..كتبوا في الجريده المواطن افلان توفى في حادث سيارة

انا كتبت عنهم لان والله شاله همهم يعني ليش مايتعملون مثلنه اشغلونهم وعالجونهم شبااااااب مثل الورود الي اشوفهم من الهم اقول ان اعمارهم في الاربعين والخمسين ماقدرين يشتغلون ولا يتزوجون
يعني شو اسون يجتلون اعمارهم ……. بس ماقول …..غير الله يوفقهم ……. وان شاء الله يصدر حكم بتوطينهم اقريب عاجل غير اجل