السلام عليكم ورحمة الله وبركاته
مساء/ صباح السعادة
الصراحة احترت شو احط عنوان لموضوعي بس السبب هو اني بتكلم في كذا نقطة واباكن في كل نقطة تتخيلن وياي كل موقف خصوصا اللي دوم يقولن لي حطي نفسج مكان فلانة وبتحسين فيها…الخ
بس قبل كل شي مابا وحدة تتسرع وترد علي بعصبية او تقول لي انتي بعدج ما عرستي وما جربتي, ابا وحدة تكون منطقية وتفكر وتتخيل وعقب ترد علي عشان تقدر نفهم بعض ونوصل لنتيجة حلوة ترضي الكل.
نبدا:
اغلب مواضيع القسم او المشاكل المطروحة تكون عن خيانة الزوج وكيف عرفت الحرمة: عرفت بتفتيش تيلفونه او اذا عطاها تجوف شي معين وخطفت ع كل شي نفس امهاتنا الله يحفظهن يوم تقوليلهن جوفن هالصورة بيجوفن كل الصور, المهم بعد هذي النقطة يا عزيزتي.
تخيلي: ريلج جاف تيلفونج مفرور عالكرسي او الطاولة او اي مكان وانتي كنتي مشغولة وقال في خاطره خل اجوف وسار بكل برود فتح التيلفون ولقى عندج حساب ع تويتر وع انستقرام او او او وكان فيه شباب يرمسونج ويا واجهج فيهن انتي بكل بساطة شو موقفج وشعورج؟
وتخيلي عاد شي منتدى رجالي هههههههه بتلقينه ياي يركض ويكتب حرمتي تحونني؟؟؟ 
ما تحسون انه شي وايد اوفر وغير منطقي؟ لو حسيتي بضيق وقلتي منو سمح له يفتش تيلفونه, هل بتسألين نفسج: انا منو سمح لي افتش تيلفونه وادور وراه؟!
نيي لنقطة ثانية وهي بعد وايد مهمة:
نصااااااااااااايحكن يالله شو اضايق يوم اقرا بعض النصايح, البعض من يجوفن وحدة قالت بطلق على طول نقزن وقالن هيه اطلقي اريح لج او كل ما قرن مشكلة يقولن انا لو مكانج جان من زمان طلبت الطلاق, لييييييييييش؟!!!!
تخيلي انتي مكان الحرمة وحاطة مشكلتج ويتج وحدة بكل بساطة وقالت لج طلبي الطلاق احسن لج شو شعورج فهميني؟ ويوم بنرمس تقولن حطي نفسج مكانها كيف تتحملين هالعيشة؟!
حطيت نفسي مكانها, بس لو كان فيه واحد بالامية حل ممكن ينهي مشكلتها ليش انا انهيها بالطلاق!
ابغض الحلال عند الله الطلاق, صح انه حلال بس ليش انا احطه حل لمشاكل الحريم وانا ايلس مستانسة ويا ريلي في بيتي!!!
النقطة الثالثة والاخيرة:
يوم تبون تحلون مشكلة خذوها من كل الجوانب والزوايا حتى لو كانت صغيرة, ابسط زاوية ممكن تلقين فيها الحل, يوم تحسين نفسج مب قادرة تتحملين الجإي لرب العالمين صدقيني هو احسن من اي حد فالدنيا واحسن من كل وحدة ممكن تنصحج في الأول والأخير, الدعوة من القلب لصاحبة المشكلة المطروحة احسن بـ وايد من انج ما تعرفين تردين بس مصرة تكتبين اي حل عندج وخلاص.
فالنهاية السموحة منكن تراني ما حددت اشخاص معينين بخصوص الردود انا قلت البعض واتمنى من كل قلبي حياة زوجية سعيدة لكل وحدة هني.
تقديري
صباح الخير
صح كلامج
و اغلب ردوري تعبر عن نفسي و احاول اوضح هالشي بالردود
انا اشوف الوحده لازم تثقف نفسها بنفسها ،، يعني تقرا وتشوف محاضرات لدكاتره ومستشارين عشان تصير عندها خلفيه عالاقل وخاصه الخيانه..اما انها جاهله وتيي تطرح مشكله او تحط حل لمشكله وهي ما تعرف شي هني الله اعلم بالضرر الي بتسببه.
بس بصراحه في فايده من هالمنتديات خاصه من الحريم العاقلات الي نصايحهم فمحلها ،، والنقاش فهالامور بعد شي ايجابي وانا احب هالشي لانه يعطي خبرات و يفتح العقل ع وايد اشياء نكون غافلين عنها
اهل مكة ادرى بشعابها جي يقول المثل
امممممم لا حبيبتي
عن عمري اشوف كلامج غلط
بقولج نقطة نقطة وان شاء الله ما انسى شي
الحرمة اللي تفتش تليفون سواء شافت شي بالصدفة ترى الله كاتب واذا هي تعنت تفتش موبايله لانها ملاحظة ان ريلها تغير،،
معلومة لج وللبنات،،، الوحدة من تعرس تتحول حرمة وتيلها هبة من الله وهي الحاسة السادسة ههههههه
والله الحرمة عقب الزواج لو ريلها بدا يخون او يلعب من وراها او اي شي هالحاسة تشتغل،، بتعرفين بتعرفين لا محاااااال
عشان جي الوحدة تنبش موبايله عله وعسى تقدر تساعده وتحافظ عليه حق عمرها وعيالها
اما الريال اللي ينبش موبايل حرمته هاي عيب وما يجوز لان معروف ان مويابل الحرمة في صور حريم وحرام يشوفهم
اما لو شاف لها حساب على انستقرام و و و الخرابيط وتسولف مع شباب هاي اساسا ما تستحي وتستاهل اللي بييها من ريلها،،، قص رقاب في السالفة هههههه
بشكل عام انا يوم اطالع ردود البنات نادر اللي ينصحون بطلاق بدون سبب والله نادر والله يهديهم،، بالعكس احصل ردود وااايد طيبة من وااااايد من العضوات بس شي بعض المشاكل اللي تنعرض فعلا الحل يكون الطلاق
واحد يخون حرمته مب مرة وحدة،، لا،، دووووم يخونها ويضربها ويهينها ويضرب العيال وما يصرف عليها ولا مهتم في بيته ويسفر بنات الحرام وحارم اهله من السفر ها شو تبين منه بالذات هي حاولت تصلحه سنوااااات وبالعكس مع السنوات بدال ما يعتدل اتفرعن زيادة،، شو تبا به،، بالعكس الطلاق هني نعمة
اما وحدة مضايقة من اهل ريلها مثلا،،، هاي ما ننصحها بالطلاق،، لا مستحيل بالذات الغلط مش منه من اهله
حالة عن حالة تفرق
بنرد نكلمج عقب ما تشتغل عندج الحاسة السادسة ههههه
لا بسم الله عليج ان شاء الله تعرسين وتكونين مرتاحة في حياتج الزوجية
سوري،،، حذفته
تفتيش فون الزوج أحس انه كل حرمه لازم تسوي هالشي بين فتره وفتره .. سبحان الله أحيانا اييج احساس غريب ولازم تقومين بهذي المهمة وهي التفتيش ههههههه
وفي المقابل عادي عندي لو ريلي خذا فوني لأنه مافيه شي كله صور عيالي بس وحتى لو قرا محادثاتي مع صديقاتي بعد عادي لأنه كلامنا عادي مافيه شي غلط ..
وبخصوص التحريض ع الطلاق ما لاحظت هالشي .. واللي تعرض مشكلتها الله سبحانه وتعالى عطاها عقل تفكر فيه المفروض تحكم عقلها وتفكر زين ما زين وتاخذ اللي تشوفه مناسب لها ..
وما ننسى هني كل وحده تحط فبالها لو واجهتها نفس مشكلة صاحبة الموضوع وترد على هذا الأساس فكل وحده لها مستوى تفكير وأسلوب معين خاص فيها ..
وما ننكر في مواضيع كثيرة استفدنا منها و فتحت عيونا على أشياء ما كنّا حاطينها ف بالنا ومن هالمواضيع طبعا نتبادل خبراتنا مع بعض ..