الحمد للـــه ربيت . ويبت فطامــــي . تعالوا اقروا قصة ولادتــــي

طبعا أنا من حملت استوى لي ضغط الحمل … وبداا يزيد علي من دخلت شهري وخافت علي الدكتوره وقالت لي لازم كل يوم أسير اقايس الضغط واذا طلع مرتفع وااايد لازم تدخلين الطواري طبعا انا سرت وقست اليوم الاول وطلع وااايد مرتفع بس ما سرت الطواري وسرت بعد قايسته ثاني يوم طلع نفس الشي مرتفع وااايد رديت البيت وانا مخنوقه وخايفه على اللي في بطني بنفس الوقت … المهم قررت اسير الطواري واشوف شو بيسون لي بس قبل لا اسير الطواري سرت انا واختي وامي البحر ومشيت مال نص ساعه تقريبا على رمل البحر وصدق صدق تعبت ورديت البيت سبحت ولبست وسرت الطواري دخلت على الدكتوره قاست الضغط شافته مرتفع وااايد قالت انتي لازم تترقدين اليوم لان الضغط مرتفع ونحن خايفين على الياهل المهم قالت قبلها خليني افحصج بشوف اذا فاتح عندج ولا؟ شافت فاتح 2 سم والراس نازل في الحوض الحمدلله بس مب وااايد
لان اليوم اللي قبله قالوا لي الراس تحت بس مب في الحوض وأنا الصراحه حسيت ان الراس نزل في الحوض من مشي على البحر … الحمدلله … المهم قالت لي الدكتوره اذا بد الضغط يرتفع اكثر بنسوي لج طلق صناعي … انا من سمعت طلق صناعي حسيت الدنيا بدور فيني … قلت الها لا ما ابه طلق صناعي … قالت نحن بنشوف وان شاء الله ما بتحاتجين لين باجر … المهم دخلت المستشفى وكانوا وياي أمي واختي … وعقبها أمي اتصلت بريلي وقالت له أني اليوم بيرقدوني في المستشفى وكانت الساعه 11 وشي ليلا حليله كان في الدوام ببوظبي … قال انا الحين ياي قلت له لا تعال باجر الصبح الحين ليل ونحن ساكنين برأس الخيمة متى بتوصل قال
لي لا ما عليج … المهم رقدت في المستشفى وأنا ما فيني شي الحمدلله لا تقلصات ولا شي وطبعا كانوا حاطيني في قسم ما بعد الولاده … ياربي كرهت القسم والله كل اشوي كنت اسمع صريخ الحريم وأنا اخاف زياده … المهم
طلع الصبح ويت الدكتوره وكشفت عليـــه فالت لي بنعطيج ألحيـــن طلق صناعي قلت الها لا ما أبه وريلي يقول الها لا اتريوا عليها اشوي قالت على راحتكم بس هي فيها الضغط ونحن خايفين على الجنين واذا صار شي على مسؤوليتكم .. االمهم قالت انا بخليج انتي وريلج واتشاورا وردي علي خبر قبل الساعه 11 الصبح … المهم اتشاورنا واتفقت واتوكلت على ربي وقلت انا تعبت كل هذي ال9 اشهر عشان شوفتها وكنت اخاف ليصير فيها شي قلت حق ريلي سير وقع على الموافقه … المهم سار ووقع … على الساعه 11 وثلث عطوني الطلق الصناعي وكنت متوكله على رب العالمين … المهم على الساعه 1 طلعت اتمشى بالممر وما كان فيني لا تقلصات ولا شي وعلى الساعه 3 وشي بدا الالم يعني كان في بدايته وطووول هاي الفتره ريلي كان وياي ما فارقني ولا لحظه … على الساعه 6 وشي امي قالت لريلي سير هات الها عصير اناناس فرش وشربته ومن بديت اشربه احس الالام اتزيد واتزيد وعقبها يت خالتي وشربتي كوب جرفه محلاي بالعسل وقام يزيد بعد زياده وسرت الحمام لاني كنت احس بشي ويوم سرت الحمام الماي نزل مني بس كان فيه لون اخضر ورديت على السرير والماي يزيد والالم يزيد عقبها يت الدكتوره ما قدرت اتحمل الالم دخلت الحمام ويلست اصيييييح بدون صوت وكنت ادعي وادعي وعقبها امي دخلت علي وشافت حالتي وساروا زقروا الدكتوره وفحصتني قالت مفتوح 4 سم لازم اتودونها غرفه الولاده الحين ويابوا الكرسي… دخلت غرفه الولاده على الساعه 7 المغرب ورقدوني على السرير وكنت خايفه من اصرات الصريخ حطولي جهاز النبض وااايد كنت اتنرفز منه المهم والله يا بنات الالم يزيد وأنا اقول يالله يالله واااااايد فادتني هذي الكلمة الصراحه … وكل اشوي والالم يزيد وبين فتره وفتره امي فديتها ادش علي وساعات خالتي ويوم كانت اتيني االتقلصات ايود بيد امي واقول يا حي يا غيوم برحمتك اسثغيث واضغط على يد امي فديتها او خالتي وطبعا امي كانت اتقول لي ان خالاتج وريلج وخواتج وام ريلي كلهم برع يدعون لج ويتريون البيبي …تميت على هذي الحاله لين الساعه 12ونص والحمدلله الرحم كان مفتوح عندي 10 بس الراس مب نازل واااايد في الحوض وقالوا بنتريا اشوي لو ما نزل بنسي لج عمليه وانا كنت ازاعج على الدكتوره واقولها خلاص ما فيني حيل سولي عمليه ما اقدر اتحمل وكنت طووول الوقت ادعي لخواتي في المنتدى وبرع المنتدى وكانت اتقول لي الدكتوره حرام اسوي لج عمليه اتري اشوي يمكن ينزل في الحوض جان اقول الها انتي ما اتحسين بالام اللي فيني خلاص اصلا ما فيني حيل على البش سوولي عمليه وفكوني طنشتني وطلعت عني برع … اتغصصت مني خخخخخ … وطووول هذي الفتره كنت اسمع بين فتره وفتره صريخ ياهل وانا اقول يالله انا متى بيه دوري وبسمع صوت الياهل الصراحه كنت هلكانه ويوم يخف الالم
اطيح مثل الميته لا حركه ولا صوت وامي خالتي كانوا يخافون علي يتحرون استوى بس شي وكاتوا يحركون ومن اتي الويعه ارد واقول يا حي يا قيوم برحمتك استغيث … ( الصراحه هذا الدعاء وااايد فادني ) اتخيلوا يا بنات من الساعه 7 ليــــن الساعه 1 ونص وأنا فيني تقلصات فضيعه والله ما كنت اتخيل اني جذي الالام وعقبها
يت الدكتوره اتقول اتحسين في شي بينزل منج اقول الها لا ما احس بشي … ومنعوا أي حد يدش عليه وكانوا قوم امي يدشون علي بالدسه خخخخخ … عقبها بشوي حسيت شي بينزل مني وقمت اسوي بش روحي بس كانت طريقتي غلط وعقبها يت الدكتوره وعلمتني الطريقه الصح وطلعت عني وسارت للغرفه الثانيه وتمت وياي النيرس المسؤوله عني وكانت عاطتني ظهرها اتزهب الابره وجيه جان اسوي روحي بوش وبدا يطلع الراس جان اتصد النيرس ولا اتصارخ على الدكتوره واتقول الراس بدا يطلع والدكتوره اتقول اصبري لا اتسوين بش
ما سويت الها سالفه انا ابه اربي وافتك وهي اتصارخ علي لا اصبري وانا ساكته واسوي بش بس الحمدلله لا صارخت ولا سويت كنت كله ادعي واتحمل الالم داخلي وعقبها طلعت فطامي على هذي الدنيا ونورت دنيتي الساعه 2 بالضبط ..شلوها على طوول اقول الهم ييبوها ابه اشوفها قالوا عقب وركضوا فيها برع لانها كانت شاربه الماي … والحمدلله من طلعت نسيت الألم وكل شي … وعقب طلعت النيرس حق اهلي برع وقالت هند ربت والكل استانس خاصه ريلي وحليلهم كانوا برع من الساعه 7 المغرب لين 2 الليل وااااااااايد صح ؟؟؟
وعقبها خلوني في غرفة الولاده ساعتين عسب المغذي وعطوني ابره عسب ينزل الضغط والحمدلله الضغط خاز عني من حملت قالوا لي خلاص رد طبيعي وعقبها طلعوني من غرفة الولاده انا والبنوته وكنت ملحفه ويهي …
استحي كنت خخخخخ بس كنت اسمع اهلي يقولون هذي هند تعالوا اهني المهم وانا كنت ملحفه ويهي لين ما ودوني الغرفه وعقبها اول واحد دخل علي ريلـــي خلونا روحنا واحس الدمعه كانت بعيونه من كثر ما كان خايف علينا وتمينا انسولف ونسينا اهلنا برع يتريون خخخخخخ وعقب دخلوا اهلي ويت النيرس اتعلمني كيف ارضعها وتوته توته خلصت الحتوته خخخخخخخ

الحمدلله على السلامه هنووووووده .. مبروووووووووك عليكم طلة العروس اليديده .. تتربي في عزكم يااااااااارب ^_^

يلا عقبال ماتييبين النونو الثاني وتحكيلنا قصة ولادته ^_*

الحمدالله على السلامه
و تتربي البنوته بعزكم ان شاءالله

حمدالله عالسلااااااااامة…مبروك ما ياج يا ام فطامي

الحمد لله ع سلامتج

ومبررورم ما ياج وتتربي في عزج وعز ايوهاا يارب

الحمد لله على سلامتج
والله يخليلج البنوته وتتربى في عزكم

يتني صيييييييييييييييحه …. متى دووووورنا ان شاااء الله …

الحمدلله على سلاااامتج الغاليه ومبروووووووووك عليج فطاااامي… وعقباالنا ان شااء الله..