التراث

خواتي بنت خالوني طالبين منها تسوي مجسم تراثي ممكن تساعدوني في الافكار كيف أسوي المجسم؟؟؟

في البداية أخذت بليوت (قطعة خشب حق سرير مكسور) أستغليته كقاعدة
عملت قطعتين مربعتين بس وحدة أكبر من الثانية….
ولصقتهم على بعض بحيث تكون زاويتين وضلعين فوق بعض…
ولصقتهم باستخدام صمغ الخشب الأبيض…

بعدين أخذت سعف النخيل وأخذت الخوص منه وعملت منه سجادة للقاعدة يعني سجادة لهذا الركن بحيث أني آخذ كل خوصتين وأدخلهم في بعض بشكل متعامد..

وجبت الخشب غصن كبييييييييييييييير جدا قطعناه من شجرة السدر وتركته يجف في الشمس أسبوع عشان العصارات ماتطلع لي..
وبعدين قصيت الخشب بأطوال متساوية باستخدام المنشار طبعا…
وبعدين ثبت الأعمدة الخشبية على الزاوية الي ما انطبقت عليها الخشبة الثانية…
ولفيت عليهم حبل من الليف عشان تعطي شكل قديم …

"طبعا كنت أرجع للوالد والوالدة في كل صغيرة وكبيرة أخاف أسوي حركة وبعدين تطلع مو موجودة بالقديم…"

وبعدين…. طلعت عندي مسافات مفتوحة بين كل عمودين خشبييين وتوهقت كيف أغطيها … وفي الأخير غطيتها بالسعف….

"يمكن هالحركة ماكانت موجودة من قبل لكن هذا الي طلع معي يقولون عطاها شكل جمالي"

وبدأت أحط الأغراض الي في هذا المجسم…
جرة صغيرة جدا أشتريتها جاهزة وحطيتها بالزاوية…
بخنق "ماكان عندي بخنق صغير بس مافي شي يصعب علي لازم أسويه"
وأخذت غطوة وجه "بوشية" وحاولت أفصلها بشكل بخنق وماعرفت..
حاولت وحاولت ومافي فايدة..
في الأخير خطرت في بالي فكرة … أتصلت بأستاذة الخياطة وسألتها عن الشكل كيف أقصه ويطلع لي شكل البخنق المعتاد.. ووصفت الي وطبقت كلامها بالحرف..
وطرزت حوافه بغرزة السلسلة باللون الفضي "كان المفروض أستخدم اللون الذهبي لكن ماكان عندي ومشيت حالي بالفضي" بس طلع الشكل مو سيء.
وبعدين لصقته على الجدار في المجسم.

وحاولت أعمل مكنسة قديمة "مادري شيسمونها بالقديم" أخذت عناقيد الرطب وشلت الرطب منها تبقى هذا الي يسمونه الشمروخ على ما أعتقد مو متأكدة لأن ماعندي خبرة… وقطعته ولفيته بخيوط عشان يعطيني شكل المكنسة..
وأسندت المكنسة على الجدار الثاني.. بجانب الجرة..

نجي الى هذي حقت اللبن " بعد ماعرف شيسمونها بس أعرف شكلها"وأخذن أغصان ضعيفة جدا وقطعت منها أربع قطع متساوية وثبتهم بشكل متقاطع بأستخدام الخيوط لفيتها على الغصون من جميع إتجاهات نقطة التقاطع..
طبعا عملت من هذا الشكل المتقاطع قطعتين وثبتهم على الأرضية.. وجبت غصن وحطيته بشكل عرضي يوصل بين القطعتين بس قبل ما أثبته كان في شي مهم لازم أسويه…
هو هذي الي يحطون فيها اللبن "مادري يمكن يسموها شربة أو شي ثاني مادري"وعملتها من الجلد وثبتها على هذا الغصن…

وبقى الصندوق … آه على الصندوق الي ماكان عندي صندوق قديم أقدر أحطة وتسليم العمل يوم ثاني يعني مافي وقت ومافي أحد كان يقدر يروح يشتري لي صندوق قديم وأصلا مو ضامنة أنهم يفهموا قصدي ويتخيلوا حجم الصندوق الي أبيه…
في النهاية خطر في بالي إني أسويه بعجينة الملح…!
عملت عجينة الملح الي أساسها مكون من ماء وطحين وملح بمقادير متساوية للجميع وعجنت وعملت شكل متوازي مستطيلات ودخلته الفرن الين نضج..
طبعا عجينة الملح ماتتغير وفي لها أعمال جدا روعة بس هذا العمل الوحيد الي ظل عندي فيه من عجينة الملح والباقي أخذوهم الجامعة…
وبعدين شسويت بمتوازي المستطيلات لونته باللون الأسود وعملت عليه حركات قديمة بالذهبي عشان يبين شكله أنه صندوق قديم "لكن للأسف أنا فاشلة درجة أولى بالتلوين" بس على الأقل أنقذت نفسي … وثبت الصندوق …

وبكذا يكو انتهى المجسم التراثي الصغير….

في الأخير ماعطيته لمسة ورنيش كالعادة ليش؟ لأن العمل القديم أحب أشوفه مغبر يعني لو يمديني أحط عليه غبار حطيت…

أبي آراءكم بكل صراحة يارب يعجبكم..
حتى النقد أقبله عشان استفيد في الأعمال الجاية
وبعد الحاجات الي أنا موعارفة إسمها وفي أحد يعرفها يفيدني ويقول…

"في شي بعد حبيت أقوله كان أول نقد توجه الي على هذا العمل من الوالد الله يعطيه العافية قال "لو أنتي أستخدمتي بدل الخشب الأعمدة حق السعف الي كانوا يبنون بها العشيش الأول كان بيطلع أحلى … ورديت عليه كنت أسألك بكل خطوة ليه ماقلت … رد علي وقال: أنا نسيت وتوي ذاكر الحين بس عملك مو سيء جميل وفيه طابع قديم مستحدث"

بس بغيت فيه أشياء تخص الصغار