ارجوكم ساعدوني بصيح والسبب ولدي

اخواتي العزيزات

ابا مشورتكم ونصايحكم
انا ولدي عمره 4سنوات
المشكله يوم يبى الشي وما اعطيه اياه يصيح
واذا قلتله اصبر شوي اخلص المكالمه او اي شي في ايدي يصيح ويصرخ
انا مليت من الصياح
اطنشه ومافيه فايده
احس نفسي متوتره منه
ومرات اضطر اني اضربه وعقب اتلوم فيه وايد

في طلعاتي
مايهون علي اخليه عند الخدامه
ويوم اشله معاي يكرهنا في الطلعه
لازم تكون اوامره مجابه
واذا ما عطيناه يصيح ويتفل ويضرب
واخوه اللحين يتعلم منه
ماشاء الله عليهم
الله يهديهم ويصلحهم

شو الحل
دخيلكم ساعدوني
اكيد تربيتي فيها خلل

الله يعيني و يعينج على حسن تربيتنا لذريتنا

اكيد انج ترضخين له في النهاية،، فسار متعود انه يصر على اللي يريده بطريقة الصراخ وانتي في النهاية تعطينه اللي يباه ولو بعد فترة طويلة؟؟!!!!! صح؟!!!! هذي الطريقة تخليه عنيد

من البداية لازم تميزين شو الاهم؟؟؟ اللي هو محتاجنه والا اللي انتي مشغولة فيه؟؟؟؟؟

اذا موضوعه اهم تركي اللي في يدج وعلى طول لبي له اللي يباه

اذا اللي في يدج او الموضوع اللي انتي منشغله فيه اهم،،، خليه يشغل عمره بشي ثاني لين ماتخلصين موضوعج،،

ممكن تقولين له الحين مشغولة في شي وايد مهم وانت روح شوف التلفزيون / العب بالسيارة/ لون/……الخ لين اخلص شغلي،،،،،،،

بس عطيه اقتراح واحد بس منهم اذا ماعجباه او قالج لا عطيه الاقتراح الثاني،، وبعدها طنشيه ولاتكلمينه لين تخلصين موضوعج..

واصري على موقفج.. واذا خلصتي قولي له،، الحين أنا خلصت حبيبي ونفذي اللي كان يباه منج..

ابتدي من البيت واصبري وداومي على هذي الطريقة حتى لو استمر لاسبوعين،،

واذا بغى منج شي وانتي ماتريدين تعطينه او تنفذينه له.. كوني قاطعة في قرارج تماماً ولا تتراجعين حتى لو كسر عليج الدنيا،،

طنشيه وتجاهليه.. ولا تبينين اللي يسويه من ضرب وسب وعناد وتحطيم للأشياء انه يأثر فيج حتى تعابير ويهج لا معصبة ولا فرحانة…

إياج ثم إياج ترضخين له في شي انتي منعتيه عنه من البداية،، بيسير واااااااااايد عنيد (شفته مع مرت اخوي تخيلي بنتها تصرخ 3 ساعات متواصلة بصوت عالي وآخر شي ترضخ لها الام وتعطيها!!!!!!! لانها من البداية تمنعها وبعدين ترجع بعد الصراخ تعطيها،، وتعلمت البنت انها مهما طولت في الصراخ انها بتحصل على اللي تريده في النهاية)

ولا تمنعين عنهم شي الا اذا كان يضرهم،، لو كل شي ممنوع،، ماراح يسمعون كلامج وبيسوون اللي يريدونه وراج
(عيال اخوي وقت ازورهم ماتتخيلين شو يراووني .. امهم تمنعهم من اللبان،، فالولد6 سنوات شاري وخاش اللبان تحت السرير وراواني اياه،، يدرون اني مرنه،، قلت له اهم شي انه مايكون صناعة صينية ولا في الوان تضرك،، ووقت يزورونا مساكين يشوفون الشوكليت (امهم مانعتهم منعاً باتاً من الشوكليت) على طول ياخذون وياكلون بدون مايشاورون حد،، وحرام اسحب من فمهم شي احنا مانمنع نفسنا منه،، قلتهم بعد ماتخلصون غسلوا اسنانكم عشان مايكلهم السوس ومساكين يسمعون الكلام،، اذا قلت لهم شي اي شي يصدقوني لكن امهم مايثقون في كلامها لان كل شي ممنوع،،، ونفس الشي بعد مع اختي تاكل جبس جدام بناتها وماتعطيهم وتقول لهم ممنوع… قلت لها عطيهم شافوج تاكلين شي لاتمنعينهم منه بيرغبون فيه اكثر ولو من وراج،، على طول عطتهم وزعت كيس واحد على ثلاثة واقتنعوا المساكين بالقليل،،والحين تعلموا ان الجبس والحلويات مسموحة بعد الوجبة الرئيسية وبعدين يغسلون اسنانهم،، لكن حرام تمنعينهم)) (بس فهميهم ان الجبس و الحلويات اللي ماتضر بس هي اللي ناكلها،، تفهمينهم ان الالوان الصناعية و المواد الحافظة وسخ لازم نتجبها ولازم نقرى مكوناتها قبل مانشتريها،، وطبعا مايعرفون يقرون لكن يفهمون الرمسة وبيعتمدون عليج في الاختيار)

خذي بالنصيحة وخليج لينه معاه في اللي مايضره وبإذن الله بتشوفينه انه بيلين معاج وبيروح عنه العناد.. وبيسير سلوكه في الطلعة على نفس ماعودتيه في البيت،، واذا حسيتي انه في الطلعة له حركات نفذي معاه اللي تنفذينه في البيت.. واذا زاد في المشاكل رديه البيت على طول بدون ماتاخذين له او تسوين اللي كان يصرخ عشانه،،، وماعليج من اللي حولج في السوق،، ترى اكثر الناس عندهم عيال ومجربين