اخوي بيتزوج الثانية

اخوي يبغي يتزوج الثانية و متضايق و تعبان و حالته حاله و يصييح و يالس ع البحر شرات العاشق اللي يبغي يحافظ على بيته و يبغي الثانية

الله يسلمكم حرمته الأولى بنت عمي و تزوجوا من 18 سنة و كان ولد 17سنة يعني عمره الحين 35 سنة

ما انكر عادات اول ان بنت العم لولد العم
يعني هو ما شافها قبل العرس موووووول ولا يتذكر شكلها اصلا

يعني هو ما يحبها بس يحترمها وايد و يقدرها وما شاء الله عليه احسن واحد من اخواني جيبه و جيبها واحد يعني ما يقصر عليها بريال و يعزها وايد وما يرضى عليها
وما شاء الله يحافظ ع صلاته و صيامه لا يدخن ولا يشيش ولا راعي حركات ومب خمار ولا زمار
ومب مال سهرات يرجع البيت و يرقد شرات الديايه مب لاني اخته و بمدح بس هذا هو الحق

وما شاء الله عليها طباخة نمبر 1 يعني اخوي لو بيسافر ولا بسير البر يومين يشتاق واااااااايد لطباخها و يطريها دووم و بعد هى الله يهداها جمن مرة خبرتها يوم ريلج يسير البر سوي لج هايج الطبخات اللي يذكرج فيها بس هي ولا ع البال مهملة ف ها الجوانب و مهملة ف شكلها و جمن مرة نصحتها ما في فايدة
يعني مرات ادخل بيتها الله لا يراويكم ريحة البيت بسبة ريحة الحمامات عزكم الله مع ان عندها خدامة

غير تصدقون مرات هو يرتب البيت و يعدله وين بتلقى ريال شراته ما ادري

المهم من 18 سنة يحاول يغيرها و قالي خلاص كبرت عيالي و ربيتهم احسن تربية و قلت لين ما يكبرون الحين يعرس ؟

الحين السالفة اخوي يبغي يعرس و يبغينا نسير وياه و ف نفس الوقت خواتي كلهم رافضات مب لانه بنت عمنا لا لا لان يخافون رياييلهم يعرسون عليهم ؟
وانا اشوف حرمته مقصرة ووووووووايد و نصحتها وايد ولا تسمع ولا يهمها

غير ان خواتي يوم رياييلهم ايون من السفر اخوي يشوف شكثر يجابلون رياييلهم غير ان ما نشوف رقعة ويههم كل وحدة فرت عيالها ف بيتنا و سارت لريلها ههههههههه و اخوي دايما يقول مالت ع حظي

الريال ما اشتكى من ان بيتهم وصخ ولا من شي اشتكى من تقصيرها من ناحية مظهرها و حتى من ناحية سؤالها عن ريلها

ما ادري هي خبلة ولا ما يهمها شي ؟؟اقولها ريلج بيعرس عليج تقولي عادي ما فيها شي خلى يعرس و اخاف عقب يعرس تنصدم ما ادري شو بلاها ؟؟
ف خاطري اوديها صالون يسمكرونها بس مول ما ترضى ولا تدخل الصالون الا لو عندها عرس بس ؟؟

ما ادري شو اسوي اسير وياه بس اقوله ما يخبرها عسب ما تزعل ولا شو اسوي؟؟
انا رمستها قالت لي لو بتروحين ما بزعل لان ف النهاية حاط فكرة الزواج ف باله و بيعرس علي

شورو علي ما ابغي ازعل بنت عمي بعد ولا ابغي ازعل اخوي

همسة للبنات : حرمته من يومها ما تشتغل يعني فاضية و يالسة ف البيت ريل ع ريل كل شهر يعطيها 5000 درهم مصروفها اي ريال بيعطي حرمته 5000درهم!!!

بنات افهموني الحرمة حتى مكياج ما تحط ما تلبس مب سالفة كشخه ؟؟؟ حتى اللبس العادي ما تعرف جلابية مال بو 5 ريال تلبس لا بجايم لا قمصان نوم ولا شي فهمتوا ؟ الحرمة ما تعرف شي ابدا يعني ع قولة خواتي مال اول و خواتي رمسوها جمن مرة يعني لا بيت لا نظافة لا شي و هي بطالية يعني ستايلها من 18 سنة ما تغير ؟ والله ما بتصدقوني اخوي يشتري لها حتى قمصان النوم ادري ما يستوي اقول بس ضغطي ارتفع قسم بالله مقهورة ؟

يعني والله عبايتها هو يفصل لها ملابسها ناقص يشتر لها اندور وير غير مخاويرها غير عطوراتها

تلبس جلابية و شيلة طقم ؟؟ ليش بسم الله ساكنة ف فيلا بروحج البسي شرات الاوادم والله مرات البس و اتكشخ ف العيد اونه ها الكثر كاشخه سايرة عرس ؟؟؟ والله بنبط بمط شعري هي مهملة اهمال مب طبيعي

و اخوي رمسها قالت عرس علي بس خبرني يوم بتعرس مب اسمع من الناس ياربي شوفوا البرود ؟

خلاص اخوي سار و خطب اليوم المغرب ما قصرتوا ع الردود بس ما سرت ويااه و لو سووا عرس بسير ان شاء الله

و الحرمة ولا كأنه يهمها بس تقول ما احب الناس يقولون ان ريلي عرس علي ؟؟؟؟
بس انتوا شوفوا البرود اقولها انا بدور لي ع برج انتحر من فووقه من كثر بروودج هذا ؟

بسير ويا اخوي و بدور ع سعادته مب تعاسته و بعدين انتي نصحتي الحرمة

الواحد ما بيعيش غير مره وحده و يبغي يستانس بحياته و يعيش براحه و حب