اتقدملي واحد بس محتارة لانه يدرس في الخارج !

خواتي انا طالبة جامعية عمري 19 و سنة اولى جامعة .. الحمدلله مرتاحة وايد في الجامعة و متفوقه و طموحة و حابه تخصصي بس قبل فتره اتقدملي واحد يدرس ماجستير في بريطانيا ؛ عمره 26 سنة و قبيلي و أخلاق و دين و سمعته طيبة و ماسك منصب ما شاء الله و فيه كل المواصافات اللي اي بنت تتمناها ( ما شاء الله تبارك الرحمن )

المشكلة اذا وافقت يبغي الملجة و العرس الشهر الياي و بياخذني ادرس وياه في بريطانيا لانه ناوي يكمل دكتوراة بعد ما يخلص ماجستير على السنة اليايه .. طبعاً كل وحده تطمح بالأفضل و تتمنى تدرس في أحسن الجامعات و تتخرج بشهادة قوية ؛ يعني فرصة حلوة بس الصراحه انا خايفة من الغربة !!
و احس صعب اني افارق أهلي و رباعتيه و بلادي و بعد اخاف ما ارتاح في جامعاتهم لانها مختلطه و انا مب متعوده على الإختلاط و الحياه غيير هناك و الدراسة بالإنجليزي و الوضع بيكون يديد عليّه يعني اخاف ما اتأقلم و بعد متردده عشان الانجليزي لاني ماحبه وايد و تخصصي الحين بالعربي و مستواي متوسط في الانجليزي .. انا مرتاحه وايد في جامعتي الحالية ، اخاف اودرها و بعدين أندم على قراري

انا صليت استخارة و حسيت بالراحة الحمدلله بس بعدنيه محتاره واايد لان المعرس ما يتفوت و نفس الوقت مستهمه و احاتي دراستي .. شو تشورون عليه ؟ و شو رايكن في الغربة و الدراسة في الخارج؟

ترى الفرصة الزينة للبنت ما تي إلا مرة وحده .. ولا تنسين دامج صليتي استخارة وعقب سرتي اتعيشين في الغربة .. بتتعلمين أكثر .. صح بتواجهين صعوبات في حياتج الأولى .. بس هالصعوبات بتخليج قوية ..

والله يوفقج يا رب للي فيه الخير دايماً ..

بعدين صح الغربه اشوي صعبه بس دام ريلج عندج مابتحسي في شي وبتعيشي مستاانسه ان شاء الله …انا واحد من هلي مسافر يدرس بالخارج بيقعد 6 سنوات هو وحرمته وبنته الصغيره هنا وعقب يو شلوها ويدرسون هنااك ومرتااحين وايو عندنا في الاجاازاات والحمدلله عايشيين حيااتهم مرتااحين ومستاانسيين …