إلي ماخذة شهادة الايلتس . ممكن

الايلس يختي سهل وااايد بس يباله اول شي جداره وثاني شي تكون لغتج وايد اوكيه

قبل ما تتمتحنينه انصحج شوفي الجامعه مثلا اللي بتسيرين لها كم يبون يعني في الايلس !! عشان تحطين عزيمتج عدل انه هالدرجه اتيبينها من اول مره

الامتحان طبعا من 4 اقسام

القسم الاول هوه الاستماع listen

هالقسم هوه عباره عن 4 سكشنات كل سكشن عقولتهم كل واحد اصعب عن الثاني
بس انا عن تجربتي يختلف هالشي وايد يعني مب كل مره هالشي وتراه يعتمد هالشي ع الشخص

تسميعنه مره وحدة ولا ينعاد طبعا هالسكشن ياخذ 50 دقيقه وهالوقت كل سكشن يكون 10 دقايق و ااخر 10 دقايق يعطونج وقت عشان تكتبين اجاباتج في ورقه االاجوبه
بس يحاسبون وايد ع السبلنق

فانتي عليج اول شي مثلا تسوين لج دفتر صغيروني تكتبين فيه الكلمات المهمه

مثلا اسامي الدول – الاوقات والايام والشهور والسنين بالانكلش – اسامي الاماكن كالمطاعم والمدارس الجامعات وهالسوالف يعني المهمه

ومن خلال تدربج يعني حاولي من تصادفج اي كلمه صعبه سيده تكتبينها في الدفتر عشان تحفظينها عدل

وحاولي تتدربي يعني في هالسكشن واايد عدل مثلا قبل الامتحان بشهر او شهرين تتدربين فيه كل يوم مثلا نص ساعه ع الاقل للتدريب

وان شاء الله بعد تدريبج تحصلين نفسج قادره تمتحنين

——————-

القسم الثاني القراءه reading

هالقسم اظني ع حسب ذكري 4 اقسام
اول واحد وايد سهل وحرام ما تحلينه كامل يعني
وانصحج في كل السكشنات لا تقرين القطعه موليه لانه بيضيع وقتج وبتسوين نفس ربيعتي كم مره عادت الامتحان عشان هالشي

اعتمدي ع skimming and scanning

اقري السؤال يعني ودوري اجابته ومن تلقينها سيده اكتبيها عدل مثل ما تشوفينها في ورقه الاجوبه لانه هني ما بيعطونج وقت حق ورقه الاجوبه
فحاولي تسوين كثر ما تقدرين فيه

وانصحج اقري كتب اجنبيه او شوفي افلام اجنبيه مع ترجمه انجليزيه واي كلمه ما تعرفينها اكتبيها في دفترج عشان تستفيدين عدل
وبعد انصحج تتدربين وايد فيه مثلا كل يوم بعد مثلا ريدنق واحد تحلين

وتخلين عندج يوم في الاسبوع مثلا تسوين لج مثل امتحان صدقي تحلينه بنفسج

اما القسم قبل الاخير هوه الكتابه writing
طبعا هوه قسمين
اول قسم تكتبين موضوع عن رسم بياني او مخطط اييج ولكل شكل له طريقه في الكتابه
عاد يباله هاه موضوع كامل لشرحه يعني وفي كلمات وايد تساعدج
عقوله المدرس اللي كان يدرسني اونه لو كتبتي هالكلمات بتحصلين عادي 7 بس السموحه منج نص الاوراق عقيتهن لانه ما صدقت انجح وما كنت ابا اشوف شي من الايلس جدامي هع

والقسم الثاني هوه تكتبين اسيي من 250 كلمه

وجيه الامتحان

واخر قسم هوه التحدث

واسهل شي هوه لو السبيكن عندج زين عدل عادي تحصلين فيه 7 حتى
طبعا هوه 3 اقسام اول قسم مثلا يسألونج عن اسمج واهلج وجيه وشو تحبين وجيه وانتي تجاوبيهم ع اللي تقدرين عليه بس ما تمين ساكته ترمسين وتخرطين ع كيف كيفج عدل

والقسم الثاني يعطوج موضوع يقولون لج فكري فيه ع ورقه وجيه كتبي اشياء وعقب تقول لج يلا رمسي وانتي ارمسي مثلا عن رحله سرتيها ويا العايله عاد انتي قصي لهم القصه لين تقول لج اسكتي وتسكتين

وثالث قسم انه يسألونج اسئله وانتي اتجاوبيهم بس هالمره طولي بالاجوبه يعني شوي جيه

لين يقول لج خلص الامتحان وخلاص

واتمنى لج التوفيج اتمنى عطيتج فكره شوي عن الامتحان

عن المواقع ما عندي حاليا ولا موقع

بس كتبي كلمه IELTS على قوقل وبتطلع لج مواقع بالهبل احيد في موقع اسمه IELTS BLOG

وعن الكتب شوفي لج كتبي الكامبرج يونفيرستي بوك

لانه هاي وايد بتفيج هم تقريبا 6 كتب يعني وتلقينهم اون لاين ع ما اظن

واخص اختي الميم وضحتي امور كثيرة لي

اشكر الاخت اللي شرحت كيف طريقة الامتحان .. اللي هو وايد مهم .. عسب تحسبين الوقت ..

اذا كنتي تبين تذاكرين ع السريع .. روحي مكتبة المجرودي او بوك بلس .. عندهم كتاب اسمه last minute preparation حق الايلتس .. اضني اسمه جيه لوووووونه بنفسجي .. شارحلج كل سكشن بطريقة بسيطه ووو في نفس الوقت حاطلتج تدريبات .. وفيه سي دي حق امتحان الاستماع

بسير اشتريه

لاني فعلا كنت ادور على كتب خاصة فيها