أعطوني رأيكن في هذا الزوج !!!

يا أخوات بخبركم عن شي يسويه زوجي وأتمنى من الله انكن تردون بصراحه لأني ما أعرف شو السبب

اللي يخليه يسوي هالشي ..

انا زوجه ثانيه ،، وأدري بتقولون مثل ما قبلتي انج تكونين الثانيه اصبري واتنازلي ،، بعد الله

سبحانه جعله نصيب وقدر هالشي ..

أنا خلاص متنازله عن أشياء وايد وساكته وصابره ، بس العيال شو ذنبهم ؟؟!!

بخبركم شو الموضوع ..

زوجي مدخل بناته الصغار من حرمته الاولى نفس المدرسه اللي فيها عيالي ، بس في مبنى منفصل

لأن وحده نظامها بريطاني والثانيه غير ما أدري شو اسمها ، المهم بناته يطلعن الساعه 2 ،

وبنتي بعد تطلع نفس الوقت وهي في الروضه بس اتم تنتظر اخوها يعني ولدي الأكبر لين يخلص

تقريبا 40 دقيقه وعقب اتيبهم دريولية أمي ، وولدي يقولي كل يوم يطلع يشوف اخته راقده على

طاوله صغيره حذال الصف من التعب مسكينه ..

وابوهم يمر على بناته الثانيات وياخذهن ويخلي بنتي تنتظر أخوها ، مع ان بيتنا على دربه ،

وهذا الفعل يوميا سواء كان يومه عندهم ولا عندنا .

انا ما أقدر أفتح حلجي بكلمه لأني أدري بس مجرد ابدأ بيطيح فيني طيحه ..

والله إن الظلم ظلمات .. الله يجعلني أرقد مظلومه ولا ارقد ظالمه .

المشاركة الأصلية كتبت بواسطة افناان

خلي الدريول يمر مرتين
وهو لا تكلمينه ولا تعورين راسج
يمكن والله اعلم بينه وبين مرته اتفاق انه عيالج ما يركبون مع عيالها في نفس السيارة !!
ما تعرفين شو سبب الرفض العميق ؟ اكيد عنده سبب سوا مقنع ولا مش مقنع
انتي هامنتج بنتج صح ؟ عيل طرشي الدريول مرتين
و ابعدي عن المشاكل

ألحين خلي سالفة الدريوليه انا اتكلم عنه هو وتصرفه ،