عدم اقامة حفلة العرس رايكن و تجاربكن

السلام عليكم و رحمة الله و بركاته

لا ابدا ما يسترخص الحرمه لأن الحفله مب كل شي. اهم شي في عقد زواج وخلاص هو زوجج. ومثل ما ذكرتي عندج اسبابج الخاصه ومدامج مقتنعه خلاص ماحد له شغل.
قريبتي تزوجت وما سوت حفله والسبب كان بصراحه لأن هي من مذهب وهو من مذهب (اعرف مب سبب مقنع) بس خافو من المشاكل ومن نفسهم العروس والمعرس قررو ما يسون حفله ويسافرون سفره حلوه أحسن من القيل والقال والمشاكل. والحمدلله تزوجون وعايشين احلى عيشه.
ما اقدر اجاوب على اسألتج بالنسبه لهم لأن بصراحه ماسألتها وأخاف تتحسس اذا سألتها عن رايها وراي الناس بس ممكن أقول لج تجربتي الشخصيه

انا بعد تزوجت بدون حفله بس بصراحه حازه في خاطري للحين نفسي البس ثوب ابيض وأصور فيه هذه بس اللي ظلت في خاطري والا كلام الناس مب مهم.
السبب اني تزوجت بدون حفله مشاكل مع أهل زوجي على اسباب تافهه.
صاحب القرار احنا الاثنين اتفقنا نتزوج بدون حفله.
ردت فعل الناس, بصراحه سمعت كلام اللي قال حامل واللي يتسائل اش فيهم واش صاير. بس زي ماقلت لج لا تهتمين لكلام الناس انا ابدا مااهتميت لأن هذه حياتي مب حياتهم وكل واحد وظروفه.
مثل ما قلت لج الشي الوحيد الي ضايقني نفسي بصور عرس. يعني لو ترجع الأيام ما بسوي عرس بس بلبس ثوب و بصور و ممكن اسوي عزيمه لصديقاتي والأهل صغيره في البيت او في فندق.
نصحيتي لبسي ثوبج وتصوري مع زوجج وافرحي معاه ولا تفكرين في كلام الناس ووجع الراس اللي يجي منهم. يعني ايش بتستفيدين منهم؟ بيجون ياكلون ويحشون فيج وفي زوجج وفي خلق الله وبيمشون. يعني السالفه فيها حش فيها. فخلاص خليهم يحشون بدون ما تعورين راسج معاهم وتسوين لهم حفله.
الله يوفقج و يبارك لج زواجكم ان شالله

ربي سهل لك امرك سوي الي يناسب ظروفك وفي الاستطاعه ابدا لا تفكري بالناس

تزوجي بالطريقة إلي تعجبج و ما عليج من كلام الناس سويتي عرس أو ما سويتي مو مهم و الله يوفقج في كل شي في حياتج

و عليج السلام
اختي العزيزة في الاخير القرار قرارج بس دوم بغيتي الراي بتكلم عن رايي ، فديتج الوحده ما بتعرس كل يوم هاي فرحة العمر و من حق كل بنت تسوي عرس تلبس الفستان الابيض و مكياج و كل شيء و تكون مب فرحتها بس , فرحة خواتها و امها خاصة امها اللي تبي تفرح في بنتها في هاليوم و تفتخر فيها و تملي عينها من جمالها , حياة الواحد ما تخلى من الظروف و الازمات المالية بس في اشياء اساسية من اكل و شرب و غيره وانا اشوف حفلة العرس من الاساسيات و اللي يقول كلام الناس مب مهم , ليش نحن مب عايشين بروحنا و الا في غابة عايشين في مجتمع و له عاداته و تقاليده , مب لازم تسوين شيء فخم عادي تاخذين قاعة بسيطة و تسوي عدد معين من المعازيم و تستانسين و الله يوفقج طبعا ها رايي الشخصي و الله يوفقج و ماباج تتحسسين من كلامي هاي مجرد وجهة نظر شخصية

من رايي حفلة الملجه مب مهمه لكن حفلة العرس لج انتي
هي ليله وحده ف العمر وعقبها بتسيرين بيت ريلج وما بتنعاد،
وبتلبسين الفستان الابيض مره ف ليش تلغينها؟ اذا ما تبين تعزمين
وايد ناس اكتفي بأنج تسوين العرس ف خيمه حفله بسيطه للمقربين
منج او ف بيتكم اذا عود او ف اصغر قاعه تحصلينها، حفله العرس
مب مهمه للريال كثر ما هي مهمه للعروس وأهلها اما اذا شايله هالفكره
من بالج نهائيا ف سوي اللي يريحج ولا تحاتين الريال ما بيسترخص حرمته
دامهم اتفقوا ع هالشي والله يتمم لج ع خير يارب

المشاركة الأصلية كتبت بواسطة مراسيل الوفاآ

من رايي حفلة الملجه مب مهمه لكن حفلة العرس لج انتي
هي ليله وحده ف العمر وعقبها بتسيرين بيت ريلج وما بتنعاد،
وبتلبسين الفستان الابيض مره ف ليش تلغينها؟ اذا ما تبين تعزمين
وايد ناس اكتفي بأنج تسوين العرس ف خيمه حفله بسيطه للمقربين
منج او ف بيتكم اذا عود او ف اصغر قاعه تحصلينها، حفله العرس
مب مهمه للريال كثر ما هي مهمه للعروس وأهلها اما اذا شايله هالفكره
من بالج نهائيا ف سوي اللي يريحج ولا تحاتين الريال ما بيسترخص حرمته
دامهم اتفقوا ع هالشي والله يتمم لج ع خير يارب

معاها