شوفوا شو سويت بسبة طلعاته ويا ربعه ورجوعه البيت الفير

اشحالكم ان شاء الله بخير وناسة ^^

اتحيدون يوك كتبت موضوع اني مضايجة من ريلي لانه رد البيت الساعة 4 الفير وما طعت افتح له الباب وجيه طبعا ما قصرتوا قلتولي لا تسكتين واذا سكتي بيرد يعيدها اغلب البنات قالوا جيه

شوفو شو سويت اليوم الثاني سكت عن السالفة ولا كلمته وكل يوم الصبح يوم اسير الجامعة احبه ع راسه وهو راقد واسير لكن ما سويتها بعد هذيج الليلة كنت متعمدة طبعا انزين سرت الجامعه ولا ضايقت عمري حتى استانست مع اربيعاتي وكلما اتذكر الموضوع احاول انسي عمري ما اتصلت له طول ما انا في الجامعة طبعا هو اتصل ع الساعه 1 قال لي " اليوم انتبهت وانا راقد وقمت ادورج كنت ابا احضنج وما حصلتج عقب تذكرت انج في الجامعة " قلت له كنت مستعيلة وطلعت انزين انا عندي كلاس الحين يالله باي سكر وقام يطرش مسجات حب اونه يعني يبا يعدلها الحبيب طبعا انا من هنااك فرحااانة لانه عرف غلطه وحس بالذنب انزين المهم وكلمت اختي حبيبتي وقالت لي اني احاول اتغير اشوي عشان احسسه ان هالشي غيرني عليه وطبعا سويت عمري متغيرة من ناحية اني ما اسولف وياه ما اضحك وياه اكثر شي ابتسامة بتقولون كييف طبعا عمو امه كانت عندنا هذيج الفترة ف كنت طول الوقت عندها اسولف وياها وايلس وياها واذا هو يلس معانا يعني نحن الثلاثة يوم اسولف اوني ما اشوفه اشوف عمو بس واكفك وياها وهو ولا جنه موجود اذا طلب اكل من برا ما اكل اتغدا واتريق في الجامعة واذا رديت البيت ارقد لين المغرب انش اتسبح ايلس ويا عمو اذاكر تلفزيون على قرقرة في التلفون وارقد طبعا اوني قلت حق عمو برقد هنيه عندج لين ما ايي فلان لاني اخاف قالت لي من شو اتخافين قلت لها البيت اللي ورانا عندهم جلب و24 ساعه ينبح وانا ماروم ارقد لان ورا دريشتي وهالشي كان صدق بس استغليته ك سبب انزين يوم رد البيت شافني مب في الغرفة ما اتوقع اني بكون عند عمو دش غرفة عمو وهو خااايف والله يبا يخبر عمو اونه والا شافني راقدة جان يوعيني ويوديني الغرفة وهو يسولف مادري شو يقول يضحك اونه يكلمني بس انا كنت مدوووخة راقدة بس اسمع حد يقرقرواذا تأخر ما اتصل له ما اقول ليش وليش اسكت اتصل له بس اذا بغيت شي من الدكان او جيه يعني بس هو من النوع اللي له كبرياء وعزة نفس ما يبين لي انه مضايج من هالشي تم ساكت وانا تميت على موالي لين اجازة العيد سرنا انعيد عند اهله طبعا اهناك خواته وعمو وحرمة اخوه وعمي والصغارية ابداااا ما كنت اشوفه الا وقت الرقاد والله اذا رد البيت وانا بعدني يالسة في الصاله ويا خواته يغمز لي وينغزني عشان اسير الغرفة بس انا طاااااف هههه اسوي عمري ما فهمت هههه يوم يزقرني اسير بس يوم ينغزني لا المهم احيانا يزقرني اسير واحيانا يسير بروحه الغرفة ووانا وخواته نسهر يوم اسير الا هو راااقد طول الاجازة ونحن ع هالموال بس يوم العيد يوم يوا الحريم عند عمو هو كان بيظهر سمع العيوز اتقول ماشاء الله ومنو هالبنت واش هالحلاة ما كانت تعرف اني حرمة ولدهم لانها اول مرة اتشوفني جان اييني ويقولي سيري امسحي هالروج وما يحتاي اجحالج اتسوينه جيه المهم قلت له يوم العيد وكيفي وبحط وبسوي جان يضحك علي باسني ع راسي وطلع لين امس فليل
طبعا كالعاده رد البيت لساعه 1 نزلني العصر البيت الساعه 5 وما اتصل ولا اتصلت له لين 1 باليل كان مع ربعه الحبيب يوم رد حصلني اشوف تلفزيون كلما يحاول ااني اسوي له سالفة ماشي فايدة بس عقب شوي جفته يصلي يوم خلص قلت انت مب عيب عليك هايت من العصر وتوك تتتذكر صلاتك جان سرت المسيد وصليت قام يتعذر وسكت عنه حزة الرقاد قال لي ابا اكلمج جان يكلمني عن هالموضوع اني متغيره وايد عليه وانه هو يحبني يوم اكون مهتمة فيه واتصل له واحشره ومفتقدني هالفترة وانه هو غلطان طبعا انا واياه بدينا نتناقش هو يقول وانا اقول عقب سكت والاا اسمعه يصيح والله العظيم صاااح هاي ثاني مرة اشوفه يصيح من يوم ما عرفته والله العظيم وهالمرتين كله عشاني قال لي انا حيوان مب حاس فيج ولا امقدر النعمة اللي انا فيها ووووو الخ طبعا كسر خاطري حضنته وقلت اسفة وما رقد الا يوم حلفت له اني مسامحتنه ووعدني ان مرة ثانية ما بيفضل ربعه علي ولا بيطلع وياهم لين انصاص الليالي وقال لي بخليج انتي اول اولوياتي بس لا تتغيرين علي ولا تقللين من حبج خليج فلانة اللي اعرفها احشريني بتلفوناتج بس لا تهملنيي والله العظيم حسيت ان كل اللي سويته كااان صح خليته يحس فيني نشيت اليوم وانا فرحاااااانة وهو كان فرحااااان بعد والله وانا اصلي الصبح حمدت الله وشكرته وقلت يا ليت لو ينفذ كلامه ويسويه ويتغير وما اتمنى يكون كلام ليل يمحيه نهار بس صدق اختي كلامها كل مرة يسوي مشاكل ههههه لكن هالمرة فاد وعرفت انه ما يروم بدوني وانه طول هالفترة كان ندماان ومتضايق وما قال ولا طلع شي الا البارحة

ادعولي احمل بنات وان ريلي يتغير وان يخف من طلعاته ويا ربعه وينفذ وعوده لي ولكم مثل ما بتدعون لي باذن الله