تعبت من هالحياه!!!!

مليت ابي اتزوج
اهلي رافضين اخذ الشخص الى احبه
يأست من الحياه
ما اعرف شو اسوي

كلام وايد يتكرر واقراه واسمعه والى تطلب نصيحه او ما تعرف شو تسوي؟؟
يمكن يكون كلامى بعد مكرر
بس ابيج وانتى تقرين تفكرين مو قراءه عابره ركزي وفهمي

خلنا نكون واقعين صح الشرع حرم هالشي بس وايد بنات لهم علاقه مع شاب ويحبون بعض وصار لهم مده ممكن فوق الخمس سنين واملهم الزواج الحب مو بيد حد
ويحاولون ويحاولون والاهل يرفضون ويبدأ اليأس

فكرتى قبل بربج؟
استخيري الله الجأي له نحن بشر الى بيأيد موقفج والى ضدج والى بيعارض وبتسمعين كلام جارح
سلمي امرج لله واعرفي انه كله بيد الله لو مكتوب لج هالانسان بتاخذينه غصب عن كل المعارضين حتى لو كان فيه عوائق كثيره
ما سمعتى بريال من السعوديه تزوج الى يحبها وهم عمرهم 80 سنه
انا مو انى مواقفه على مبدأ الحب وانج تكلمين شاب بس هذا الى اقرا وحاصل

الجأى لله وادعي الله واستغفري وقومى الليل والاهم كونى واثقه بالله

ومنهم من تعانى من اهلها الى رافضين انها تشتغل او انها حتى تطلع من البيت وتزور صديقاتها والى متزوجه ومتعذبه مع زوجها
اوكي حلو هالمنتدى متنفس للكل وكلنا نطلب من خواتنا هني وانا اولهم انهم يدعون لنا
بس لا ننسى ان الله فوق كل شي
استغفري ربج وادعي وابكي وتصدقي الله رحيم غفور ستار
الله يختبرنا
ثقي بالله واعرفي ان الله اذا حرمج من شي راح يعوضج الى افضل واحسن منه
لا تيأسين ولا تقولين مستحيييييل لانه ما في مستحيل على الله
ياما سمعنا ناس والعياذ بالله مرضوا بالسرطان وبعد فتره تشافوا
وياما وياما…..لازم يكون عندج اراده وصبر وايمان بالله
كل شي بتحصلين عليه الوظيفه والزوج وكل شي

فوضي ووكلي امرج لله واستخيري في كل امر
صابج ضيقه صلي ركعتين لله
امسكي المسبحه واستغفري
او تصدقي
قومي افتحي دولابج بتحصلين وايد اشياء ما تبينها تصدقي بها شوفي الراحه الى بتحسين بها

صدقيني اعرفي انه لو الشي الى تبينه كان خير ما كان الله بيحرمج منه

كلنا نبي اشياء ونتمنى وما تصير وبعد مده نقول فعلا لو صار هالشي كان استوى شي مو زين فيني
واحيانا بعد نحصل على شي احسن منه ونقول يالله لو كنت اخذت الشي الى ابيه ما كان حصلت على الشي هذا الى هو افضل منه

ما تزوجتى اعرفي انه خير
ما توظفتى اعرفي بعد انه خير
اهلج قاسين اعرفي انه بعد خير يمكن لو كانوا مو متشددين او قاسين كنتى في عالم ثاني ما تدرين سبحان الله

خلي بينج وبين ربج علاقه خاصه ادعي واستغفري ومدي السجاده وفضفضي لله لانه هو بيده كل شي ولا تقولين ليش انا ؟ واشمعنى غيري؟لا تقارنين نفسج بحد ابد

وفي النهايه ما ابي منكم غير دعوه اللهم يارب يفرج همي ويسر امري وينولنى مرادي يالله امين امين امين