اللي تحب تقرا أشعار اشحفان القطو

وسبق إني نشرتها في مواقع ثانية بس اليوم ضفت عليها
أبيات زيادة وبغيتكم اتغيرون جو وتضحكون شوي لما تقرونها
وتراها هزلية وهذا ستايلي ويسموني خواتي اشحفان القطو
وتفضلوا أن شاء الله تعجبكم
وتراني أتقبل النقد عادي
وياويلها اللي تدخل وتقرا وما تشتري من عندي شي
خخخخخخخخخخخخخخخخخخ

يوم ياتنا الزيادة واستبشر أهـل الدار

والكل فرح وغنى صغــارنا وكبــار

كلٍ في ايده حَّسابه ويدقــدق الأزرار

حلم أخويه بلكزس وأنا حلمت جكوار

وأختي نوت فرنسا بتصغر هالمنخار

وأمي بعد وياها بتصير شي ما صار

ومسكين أبويه والله رأسه افتر ودار

قالو ايحل لك أربـع اختار لا تحتــــار

جانك تباها سمرا ترا الموضة زنجبار

وإلا تباها بيضا المهم زواج مسيــار

كشخ أبويه اببدله وودر عنه الوزار

ربع الشيبه مستعيل ساير جدا المطار

خبر الزيادة واصل حتى عند البشكار

طالب بدل معيشة وغلا ارتفاع الأسعار

نشت سونيتا وقالت ابا سيم سيم كمــــار

جانيت بعد وياهم تبا راتب بالــــدولار

حشى يابوكم نشبة بسكم خطط وأفكار

من ياتنا هالزيادة حالنا غـــــدا دمـــــار

وهالجمعية ما ترحم كل شي فيها نار

العيش والنيدو والشكر وإلا الخضــــار

باجر بيونا ضيوف استـــــــر يا ستــــــار

ما نروم على المجبوس بسهم براتا وأجار

المواطن حاله كسيف وسوق الأسهم انهار

لا بركتن في تطوير لا بركتن في إعمـــار

بندفع الكهرب وسالك وإلا الإيجــــــــار

وإلا قروض البنك شي يكسر الأظهـــــار

يا فرحة ما تمت خذها الغراب وطـــــار

كلن رفع أسعــــاره خصوصاً هالتجــــار

بس ما نباها الزيادة راضين بالأقـــــــــــــدار