مكياجي المتواضع جدا بالصووووور اقربوا فيدوا واستفيدوا

مجموعتي أعتبرها وسط لا هي ضخمة ولا هي بسيطة ..

تشمل أبرز ما أحتاجه من أدوات ميك أب .. مع ملاحظة إني ما أستعمل كريم أساس ولا شدو ولا روج إلا في المناسبات بس,…

واستعمالي اليومي يكون بودرة / اي لاينر/ ماسكرا / بلاش طبيعي/ كحل الحواجب طبعا مع مرطب البشرة وواقي الشمس

وهذي مجموعتي اليومية في البداية :

وفيها بلاشر طبيعي من ماك وبودرات وفراشي وايلاينر وماسكرا لانكوم وكونسيلري من ماك .. وطبعا المروحة أهف بها على ويهي عسب ينشف الاي لاينر بسرعة .. الصبح اكون مستعيلة وايد ..

هذيل بودراتي اليومية :
1-بودرة من جيتا .. اسمها بيج ايفوري
2-بودرة من مابيلاين ( هذي في الشنطة للترتيب السريع ) بعد اسمها ايفوري
3-هذي غيرلاين القديمة .. يمكن هذي آخر علبة في الكون منها كخخخخ لأنها انقرضت وكنت ماخذة من هالماركة كمن علبة قبل الانقراض .. احطها ع الكونسيلر تطلع واو تعطي عيوني اضاءة ..

هذا درج الميك اب بالتسريحة لأني ما احط الميك اب بالتسريحة أساسا,, بس هالدرج لا غير .. الباقي بشنطة الميك أب .. ويتضمن :
1-بودرة اضاءة من ديور
2-كريم أساس غيرلاين ديفينورا القديم .. بعد هذي آخر علبة في الكون بس يديدة ترا ما فتحتها للحين ..
3-منظف الفراشي من ماك .. بالكرتونة مع انه مستعمل بس أنا أحب احتفظ بعلب الاغراض .. أحس ارتب
4-بيس ميك اب من انجلوت شفاف مخملي ويعطي نفس تأثير بيس سماش بوكس ..
5-مرطب بشرة/ علبة رموش/ العلب اللي تحت فيهم مشابك شعر "بنس"
6-أرواجي .. موب وايد كمن حبة بس .. لأني ما أحط وايد
7-غلوسات / قطن تنظيف
8- فراشي/ ماسكرات / كحل ماك

واضح طبعا قناع من اولاي واعواد قطن واشياء ثانية .. هالدرج مقسم بعلب ساعات ونظارات وهدايا .. بدال ما اشتري مقسم ادراج ابتكرت هالحركة

شوية "ماكيااات "
1-كحل ماك اللي ما ينبرى
2-بيس "بينت بوت " للشدو ..
3-بودرة ستوديو فيكس للمناسبات
4-قطن ميك أب
طبعا شهادتي في منتجات ماك مجروحة وإن كنت أنا ما اشتري الا اللي احتاجه .. فكل اللي أحطه واثقة انه يستاهل الشراء

هنيه عاد ندخل بالجد ..
هذي شنطة ميكياجي .. بس غيرتها .. لأنها مثل ما انتو شايفين عووودة .. شوفوا قياسها لباب الكبت ..
هذي خذتها من عند التاجرة حياة الامارات قبل حوالي سنة ونص .. بس غيرتها من اسبوعين تقريبا لأني ما كنت استعمل كل دروجها .. فخذت وحدة اصغر عسب احطها ع التسريحة .. بس هذي ما استغنى عنها ..

هذي صورتها مفتوحة .. فيها ثلاث ادراج مقسمه .. ممكن كل درج ينفك بروحه .. وفيها مثل الكبت تحت .. وهي طبعا ترولي ..

هذا شكلها من تحت .. وواضح مكان لوضع الفراشي

وهذا التقسيم من فوق .. وأنا حاطة سمر كيك واسفنجات ورموش مختلفة وبودرة سايبة من ميك اب ستوديو "بالكرتونة البيضا"

وهذي شنطتي اليديدة .. أقرب للشنطة الديبلوماسية لكنها اعرض من البلاشتيك المقوى جدا .. شكلها الخارجي موب "ذرب" كثر الأولية بس وااايد حلوة من داخل .. خذيتها من التاجرة (نونة بوظبي ) .. وطلبتها لي من برا مع انها نصحتني اني ما اخذها لأن شحنها غالي .. بس انا خذتها وعجبتني ..

هذا شكلها من داخل .. وأدراجها واسعة أكثر عن أدراج الشنطة الاولى

هذي شنطة كيريولاين .. رهيبة .. فرش قوية وناعمة .. مستواها يقارب ماك .. ماخذتنها من عند التاجرة دنيتي الامارات قبل سنة تقريبا .. بس اعتقد الحين ما تبيعها لأن منعوا بيع منتجات كريولاين في المنتدى ..

اكثر شيء حبيته في الشنطة إن معاها اسفنجات احتياط .. وهذا شيء ما تلاقينه في اغلب الشنط .. وخامة الشنطة حلوة بعد ..

هذيلا بالتتين شدو ماركة "جست قولد " شارتنهم من عند نونة بوظبي .. ايوون صفتين وحدة ساتان ووحدة مخملي.. انا شريت الثنتين عسب يكون عندي ساتان ومخملي .. عطيت اختي المخملي .. وخذت انا الساتان..
1-هذي الالوان بدون بيس البيت بوت من ماك
2-هذي الالوان مع البيس بوت .. لاحظوا كيف تقوى وتصير احسن ..

مجموعة شدواتي:
1-باليته شدو من ميك اب فور لايف
2-بالتتين من جيتا
3-باليته الوان مائية من كيريولاين

1-ماك
2-الوردي والأزرق: ستيلا
3-الاخضر والبنفسجي: ستيلا
4-ازادورا
5-العلب الصغيرة : ماك
6-من مجموعة موديلز الامريكية
7-بيجمنت ولمعات من ميك اب ستوديو وجيتا
8-الاخضر/ البني/ البيج ميك اب فور ايفر
9-البني والوردي ميك اب ستوديو

1-مجموعة الحواجب من سماش بوكس ..طبعا مثل العينة .. لكنها موب عينة
2-من غيرلاين مجموعة برونزاج رهيبة
3-من ماك بلاشر درجتين وحدة على وردي ووحدة على برونز
4-مجموعة من ستيلا بلاشرات وأرواج
5-كريم اساس HD من فور ايفر
6-بودرة HD تستعمل مع الكريم اساس اللي فوق ..
7-شدو جيرلاين
8-شدو اضاءة من جيرلاين
9-شدو نايلون ماك
10-شدو كربون من ماك

1-قلوس شفاف من سماش بوكس
2-البيس من سماش بوكس ( طبعا لاحظتوا احجام صغيرة .. لأني مشترية مجموعة اسمها "تراي مي" بما اني ما استعمل ميك اب وايد فهذي افضل لي )
3-مجموعة كريمات اساس .. وبودرة سايبة من كريولاين
4-كونسيلر اضاءة العين من سماش بوكس
5-بودرة اضاءة الجسم من غيرلاين
6-كريم اضاة لتحت الحاجب .. من ستيج
7-بودرة سايبة للاستعمال اليومي من كريولاين
8-قلم كحل من كيريولاين
9-قلم اضاءة من كيريولاين
10-بلاشر زهري من غيرلاين
11-بيس شدو من كيريولاين
12-قطرة سيلر لتثبيت الشدو والكيك ايلاينر من كيريولاين
13-كيك ايلاينر من كيريولاين
14-بودرة من ميك اب فور ايفر
15-كحل من كيريولاين
16-علبة كونسيلرات / روجين /مزيل ميك اب /بودرة سايبة من كيريولاين

بيس وفول كفر من ميك اب فور ايفر ..

………………

بنوتات .. هالموضوع تعبت عليه وايد تصوير وتصغير وكتابة .. ياليت اشوف رد منكم .. طبعا أنا حاضرة لأي أسئلة .. وتحت أمركم ..

فيه اغراض ثانية ما صورتها مثل الفرش وبعض الكريمات والحاجات والمحتاجات ..