حمالات الرقبة:
طبعا هاي القصة تلتف فيها الحمالات على الرقبة وتكون منطقة الكتف والزنود مكشوفة. البسيها إذا كان جتفج عريض لأنها تصغر الجتف، وابتعدي عنها إذا كان جتفج أصغر من وركج يعني جسمج كمثرى أو إذا كان صدرج وايد كبير لأنها تعرض الصدر…
القصة على كتف واحد أو على جنب:
هاي القصة يسمونها قصة فستان العرس، وهي عبارة عن حمالة على جنب واحد. هاي القصة مثالية إذا كانت منطقة الجتف عندج حلوة وتبغين تبرزينها ولكن ابتعدي عنها إذا كانت جتوفج عريضة لأنها تعرض أكثر.
أختي الغر الحشيم هاي القصة تناسبج لأنها تكبر الصدر وتغطيه بطريقة وايد حلوة وتقدرين تضيفين تفاصيل عليها مثل شغل ورود إلخ وبتكون روعة على قصة الميرميد أو الحورية…
القصة الدائرية العالية أو الباتو:
هاي ما اعتقد وايد يلبسونها هني لأن العرايس وايد تهتم بإبراز العقد مال العرس (:
بس إذا كان عقدج من النوع اللي يلزق على الرقبة تقدرين تلبسين هاي القصة الأنيقة جدا…
هاي تتبع عظمة الترقوة من فوق (العظمة الأفقسة الممتدة من الجتف للرقبة من جدام)، وهي دائرية شوية بس تميل إنها تكون مستقيمة، وتبدأ بعد مسافة انتش من كل كتف. هاي مثالية للي تبغي تكبر صدرها، ولازم تبتعد عنه إللي صدرها كبير لأنها تكبر الصدر…
القصة العالية:
أو يسمونها قصة العقد أو المجوهرات لأن في أوروبا كانوا يلبسونها وفوقها عقد طويل نسبيا. هاي بعد تكبر الصدر.
قصة السويتهارت أو القلب:
هاي القصة تشكل شكل قلب عند الصدر وهاي ممتازة لأغلب العرايس. ممكن القصة تكون مع أو بدون حمالات. البسيها إذا كان عندج صدر تبغين تبرزينه. أما إذا كان صدرج صغير لا ينصح بها.
بدون حمالات أو السترابليس:
طبعا هاي بدون حمالات ولا أكمام. هاي ممتازة إذا بغيتي تبرزين جمال جتوفج ومنطقة الترقوة وإذا كان صدرج حلو ومتوسط. إذا كان وايد عود تره مشكلة (تيلسين ترفعين طول العرس فشيلة)!! وإذا كان صدرج صغير مول ما ينفع لج.
قصة الفي V:
هاي القصة مناسبة لمعظم الأجسام ومعروفة نها تطول الرقة. هاي ممتازة إذا كان حجم صدرج متوسط يعني إذا كان ستيانج B أو C وابتعدي عنها تماما إذا كان صدرج صغير أو كبير يعني A أو أكبر من C وهي بعد ممتازة للجسم المليان أو جسم الساعة الرملية.
القصة الياية على الجتف:
هاي القصة تكون تحت الجتف وتبرز منطقة الجتف والترقوة. ممتازة لأغلب الأجسام. البسيها إذا كان جسمج من نوع الكمثرى أو إذا كان صدرج عود. ابتعدي عنها إذا كان جتفج عريض وزنودج وايد متان.
قصة الملكة آن:
هاي القصة يكون فيها ياقة من وره وعلى جوانب الرقبة، وتدريجيا تتوسع حتى تشكل فتحة على شكل قلب. هاي مناسبة لمعظم الأجسام وتستخدم من أجل إطالة الجسم ومنطقة الرقبة مع إبراز منطقة الصدر قليلا وبتحفظ (يعني تناسبج إذا كنتي قصيرة أو مليانة أ, عندج مشكلة في منطقة الصدر).
القصة المربعة:
شكلها مثل نص مربع. مناسبة لج إذا كان صدرج كبير لأنها تكون نازلة بس ما تطلع صدرج وايد، وهي مناسبة لأي شكل جسم. يعني تستخدمينها إذا بغيتي تبرزين صدرج بتحفظ.
القصة الدائرية:
هاي القصة تكون على شكل U وتكون نازلة وهي مناسبة لأي عروس وتصلح لكل العرايس.
يعطيج العافية على الموضوع
مشكوورة فديتج و الله يعطيج العافية ^_^
و استاانست يوم شفت اسمي اونه منو قدي لوول 
انزين فديتج شو غيرها يناسب الصدر الصغير جداً مع الرقبة الطويلة و الجتوف المتوسطة؟ يعني انا جتوفي حلوة الحمدلله ومتناسقة مب عريضة ولا صغيرة بس مشكلتي في الصدر !
الله يخليج حبيبتي…
مشكوووووووورة ع الموضوع وانا السويت هارت ^^
مبروك لكل العرايس وقصة الهارت للعروس من أجمل القصات فعلا حبيبتي غزالة بغداد…