ريلي متزوج علي كيف انتقم من الثانيه كيف اخلص ريلي منها تفضلي ادخلي

خاطري اتكلم بشغله وبدخل بصلب الموضوع لأني أرررررف من كثر هالمواضيع
وياليت ياليت المعرسات مايزعلن مني لأن بالنهايه والأخير هالشي مش
انا اللي مشرعتنه هذا شرع نازل من ساااااااااابع سما

المواضيع اللي تنكتب يا خواتي بخصوص زواج الرجل من ثانيه وثالثه ورابعه …
واللي تبي تخرب وتكيد للثانيه علشان تفتك منها ويطلقها ريلها …

ليش هذا كله نص المواضيع اللي في هالقسم تنتكتب بنفس المحتوى بتغيير طريقه الطرح

ليش كل هذا . ربنا حلل هالشي علشان اتيين انتي وغيرج ترفضينه ولا فوق كل هذا

الزوجه الثانيه ما تتسمى الا خرابه بيوت وخطافه رياييل و شياطين ومغازلجيات و بنات شر ووووووووو

ليش ؟؟

انا ابويه متزوج ثانيه وماما اللي خطبتها له وفوق كل هذا ساكنه معانا في بيت واحد

وانسانه محترمه لا عرفها بالتلون ولا عن طريق المغازل يايبنها من بيت اهلها

والرجل اذا تزوج الثانيه تأكدي انج نااااااااااااااااااااااااااااااااااااااقصه
بيتج ناااااااااااااااااااااااااقص

امايه خطبت لأبويه لأنها مايابت له غيري انا واخوييه العود وتبا له الذريه

تريووني لين خلصت الثانويه وخطبت له

شو يعني تقوم القيامه ؟؟

واللي تدعي عليها الله يخرب بيتها والله ياخذها وينقص من عمرها والله .. والله … والله ….

ترا هي مب ضارنها شي من هذا كله موليييييييييه

وكل هذا راد عليج

الشطاره مب في اني اقعد اتشكى و اسهر الليالي احيك واكييد الخطط
علشان افرق بين الريل والزوجه الثانيه

الشطاره كيف انج تقدرين تحافظين على بيتج وعيالج ونفسج
وكيف تكبرين العيال بدون ما تخلقين فيهم عقد نفسيه من ورا ان ابوهم
تزوج وحده ثانيه و ثالثه ورابعه وبالحلال

وانشغالج بأنج تدبرين مؤامرات كله راد عليج انتي
واذا نجحتي وتطلقت الحرمه ترا الريال مب مرتاح وحاس بشي ناقصه
وياج من البدايه فتأكدي بيتزوج غيرها لا محاااااااااااااااااااااااااااااال
وحتى لو كانوا ماخذيين بعض عن حب او مغازل بالتلفون
تراهم حللوا اللي بينهم و تزوجوا

ومش كل وحده ريلها متزوج عليها ويودر عياله وحرمته الأولى او منقص بسؤاله عنهم
يعني هذا كله من ورا الحرمه الثانيه

لا ممكن الريال نفسه ما خاف الله ولا عرف يعدل ولقى فيها اللي ما لقاه بغيرها انجذب لها والتهى

يطلع هذا كله من ورا الحرمه ؟؟
انا عندي عمي متزوج ثلاااااااااااااث

ويمووووووووووت في الثالثه
وهامل الأولى والثانيه يا دوب بس هالمصروف اللي يفره عليهم كل شهر

ويوم رمسنا حرمته الثالثه تقول والله انا كل ما اقول له حرمتك الأولى والثانيه

يصد لي بطرق عين ويقول لي انا الريال وانا اللي احدد شو اسوي وشو اللي ما اسويه
مب حرمه تفرض علي شورها

شو خصهااااااا الحرمه الثانيه او الثالثه

يعني والله اللي فاضيات يكتبن مواضيع مثل هاذي اقولها مب ابرك لها اذا
استغلت هالوقت بقرايه قران او تصلي ركعتين او تشوف عيالها شو ناقصهم
شو يبون وشو محتاجين !!!!!!!!

انا بجد اسفه خواتي وادري المعرسات بينهدن علي كلهن لكن انا مايهمني
هذا الحق واللي شرعه ربنا لا انا ولا انتي ولا غيرنا لنا الحق في انه نمنعه
وبالأخير هو ماراح بالحرام و تزوج
ودام ربي محلل نحن نقول لا ؟؟

لأني فعلا لاحظت ان الكثير هنييه متأرفات من هالسيره وهالمواضيع
والدعاوي ماترد الا على صاحبهااااااااااااااااااااا

واللي تدعي الله يخرب بيت الثانيه تأكدي ما بينخرب الا بيتج