خواتي بغيتكم تشاركوني ضيجتي ( الله يبعد الضيج عن الجميع )
بس خلاااااص ما باليد حيله …
يمكن الموضوع مب غريب والكل اكيد سامع عنه بس ليتكم تساعدوني …
خواتي ربيعتي كلمة متحطمه شوي عليها والله مادري كيف اوصف حالتها بس اذا في كلمه احق بالتعبير انتو اوصفوها فيها …
قبل 3 سنوات تقريبا خطبها واحد من اهلها و الموضوع سار بشكل طبيعي و مثل اي بنت تنخطب كانت مب شالتنها الدنيا من الفرحه ان فرحت العمر قربت وهذا حلم كل بنت اكيد ..
المهم عرفو بعض زياده ولانه من اهلها يعني يتشاوفون و يتلاقون خلال اليمعه يعني الكل عرف مافي شي مستخبي على قولتهم .. وبعد فتره قرروا يملجون وبالفعل حددو موعد الملجه و بدو بالترتيبات و الايام تمر بسرعه والكل يزهب عمره من صوب …
قبل الملجه باسبوعين بالظبط ………………………………………….. . كل شي تفركش !!
الولد غير رايه فاخر لحظه بدووووووون اي سبب مقنع غير انه كان يقول مب مرتاح احس بضيق مادري ليش و من هالاعذار !!
وللعلم انه حاجز كل شي و مخلص و حتى الشبكه ماخذنها و البنت نفس الشي مخلصه ترتيبات الملجه و حاجزه الفستان و الصالون و ……….. الخ
الكل عرف انه خلاص ماشي ملجه !!
و مرت الايام وكل واحد فيهم سار في درب ولا كان شي صار …
الموضوع لين الحين طبيعي و عادي ..
بس الغريب اللي فالموضوع
انه تكرر مره ثانيه وبنفس الاعذار !!!
خطبها واحد ثاني من سبع شهور تقريبا ..
وتكررت السالفه نفسها بالضبط !!
علما بان الخطيب الثاني ما يدري انها مخطوبه من قبل !!
وقبل الملجه باسبوعين غير رايه وقال انا مب مرتاح ونفس الكلام بالضبط قاله وبالفعل كل شي تكنسل بدوووون سبب مقنع !!
البنت حاليا فحاله محد يعلم بها غير الله تقول ياليت انا اللي ارفض ولا ان الرفض يكون منهم هم وياليت القرار تم قبل لا يعزمون حد وقبل لا تتعلق فيه و ترسم امال وتقول انا شو فيني وشو اللي يخليهم يغيرون رايهم فجاه؟؟ …
دخيلكم خبروني كيف اساعدها والله مب هاينه علي اشوفها في هذي الحاله ما عندها ثقه فنفسها ابدا و مب قادره تنسى اللي صار وكل يوم حالتها من اردى لاردى 🙁
والله البنت بنت ناس و ماشاءالله عليها اخلاق و جمال و طيبه و كل الصفات الزينه ماشاءالله فيها بس سبحان الله الله ما يكتب لها انها تملج ..
الواحد ما يعترض على امر الله بس انعدام الثقه فالنفس صعب ترجع لها …
حاولت وياها وايد و كل اللي حولها يصبرونها و يدعولها ان الله يرزقها بواحد يستاهلها بس …. بعدها فاقده الامل …
كيف ارجع ثقتها بنفسها و كيف اقنعها ان كل شي مقدر و مكتوب وان الانسان ماياخذ الا نصيبه ؟؟
سبحان الله يمكن مب نصيبها
وكل تأخيره فيها خيره
انا يوم حد ايني ويتفركش الموضووع لاي سبب .. والله فخاطري اقوول اكييييييد ربي بييسرلي واحد احسن عنه
احط فبالي الله ما كتب نصيب لانه فيه شخص احسن عنه والله بييسره لي
والله يرزقها ويرزقنا بالزوج الصاالح يا رب
الزواج قسمه ونصييييييب ونصيبها مب ويا هالاثنين اللي خطبوها
خليها تحصن نفسها بالاذكآآآآر ،، الواحد مايعرف متى اييه نصيبه ،، العلم عند الله
خليها تهونها وتهون وان شاء الله بييها نصيبها ولاتاخذ فخاطرها وتقول انا شو فيني ،، ترا ماشي نصييييب
اتحط هالشي فراسها ،، والله يرزقها بالزوج الصالح عاجلاً غير اجل
كـــل التوفيق لها
سبحان الله
اكيد حد مسويلها سوا
والله يعلم
يمكن حبوبه عين صايبتنها خليها ترقي نفسها وتقرا كل يوم سوره البقره او تسمعها
وقوليلها اذكري الله واللي الله كاتبنه لج بتاخذينه ويمكن الله رايد لج الافضل من هالاثنين اللي تقدمولج
الله يرزقها اللي تتمناه
لا حول ولاقوة الا بالله
ربي يصبرها,, ويرزقها من خير الدنيا والاخير..
عليها بالمحافظة على اذكار الصباح والمساء..
والرقية الشرعية..
وربي يجدم لها الخير ويرزقها الرجل الصالح..