الوسم: التفصيل

شحالكم بنات وشخباركم ..

اعتقد كلكم تابعتوا تقرير رحلتي في شهر العسل الى (( باريس )) ..
وها هو الرابط

http://forum.uaewomen.net/showthread.php?t=392123

ومثل ما قلت لكم في آخر الجزء ان كملنا 9 ايام في باريس وردينا الامارات ويلسنا تقريبا 12 يوم وبعدين سافرنا (( المانيا والنمسا وهولندا وبلجيكا ))

هاي كيمرتي

وهاي كيمرة ريلي ..

يعني الصور اللي فيهن مكتوب تحتها التاريخ ها تصويري ..
والصور اللي مافيهن التاريخ ها تصوير ريلي من كيمرته .

الحبن ببدا في موضوعي وبخبركم كل شي بالتفصيل الممل اوكي ,, بس ابا اقول شي قبل ما ابدااا اللي تبااا تقرا التفاصيل واللي ما تبا بس تشووف الصور لاني احب اكتب كل شي بالتفصيل ’’

الجزء الاول ..
تاريخ 13 / 7 /

حجزنا التذاكر يوم الجمعه ..والسفر كان يوم الاحد يعني بسرعه رتبنا كل شي ومادري ليش هاذاك اليوم كان وايد نحس المهم طلعنا الساعه 12 الظهر وسلمت على اهلي ورديت البيت وحملنا الشنطه .. وسرنا المطار ع الساعه 1 ونص الظهر يعني وايد متأخرين لان طيارتنا كانت الساعه 4 العصر ،، المهم وكنا شاكين ان نسينا شي وريلي يقول انا متأكد ان ناسين شي وانا اقوله لا كل شي موجود ، المهم ونحن في نص الدرب اكتشفنا ان تذكرة ريلي مب موجوده وتذكرتي موجوده وماعرفنا شو نسوي اذا ردينا بيتأخر الوقت وايد ,, اتصلت لابويه وخبرته قال خلاص تعالوا المطار وانا بتلاقى وياكم وبطبع لكم التذكره وبعطيكم اياها ،، الهم وصلنا المطار وتلاقينا ويا ابويه وما قدرت اتحمل والدموع في عيوني والله والله قلبي كان يعورني وااايد(( الفراق وايد صعب )) المهم حتى هو كان وايد متأثر فديته .. وعطانا التذاكر ولويت عليه وسرنا علشان الوقت ..
دخلنا المطار وانا شكلي متغير 180 درجه والله بس على ريلي كان متحملني لان كنت مضايجه وايد وشكلي يبين عليه المهم تمشينا في المطار وخلصنا وسرنا وركبنا الطياره والمشكله ان الرحله كانت غير عن باريس .. رحلة باريس وااايد حلوه في الطياره .. بس في الطياره ونحن سايرين ميونخ ملل وضيج ماعرف ليش المهم تعبنا في الرحله والله ووصلنا بالسلامه مطار ميونخ ونحن طبعا ابدااا مب مسوين شي لاحاجزين لافندق ولا سياره ..

كانت عدنا شنطه وحده بس ..لان يوم سافرنا باريس كنا شالين شنطتين وحده حقي ووحده حق ريلي .. وبصراحه تلعوزنا فيهن .. المهم في ها السفره شلينا شنطه وحده بس ..

خلصنا وشلينا الشنطه وسرنا مكتب تأجير السياره في المطار طبعاا ولا مكتب عندهم سياره كلهن مخلصات ما شاء الله السنه كل العرب في ميونخ والنمسا .. المهم قلتلكم ها اليوم كله نحاسه وانا كنت لها الساعه ضايجه لان الوقت متأخر وتعبانين والله .. المهم شفنا واحد مواطن عند مكتب تأجير السيارات وقال انتوا ادورون ع سياره قاله ريلي هي .. قال مستحيل تلقون لا هني ولا في محطة القيطار لمدة اسبوع ونحن يلسنا نفكر ان رحلتنا كامله 11 يوم يعني لازم نتصرف المهم .. طلعنا وخذنا تاكسي وقلنا له يودينا شارع المارين بلانس وبصراحه التاكسي عندهم غاليه وايد .. نزلنا في شارع المارين ويلسنا ندور فنادق ابداا ماشي حجز المهم اذكرت ان (( الغر الحشيم )) اللي ويانا في المنتدى موجوده في ميونخ .. والحمدلله ان رقمها عندي وانا بصراحه ابداا ماشفتها بس عن طريق المنتدى .. وقلت لريلي بتصلها وبخليها ادور لنا سكن في الفندق اللي هي ساكنتنه بس قال لا ما نبا نتعب العرب ويانا في نص الليل المهم قلنا بعد بندور وخلاص ماشي امل واتصلت فيها وفديتها والله ما قصرت دورت لنا ولقت لنا في فندق اسمه (( فندق اطلس )) وع طول وقفنا تاكسي وودانا الفندق ولقينا حجز لمدة يوم واحد بس الليله خذناها ب 120 يورو يعني تقريبا 600 درهم ولقينا ريال طيب في الريسبشن وقلنا له نحن نبا نستأجر سياره قال انا بحجز لكم من النت وانتوا استلموها باجر في محطة القيطار والله والله فرحنا من الخاطر الحمدلله ان تيسرت امووورنا كلهااا وحجز لنا سياره من شركة SIXT خذناها لمدة 9 ليالي ب 6000 الاف درهم تقريبا مع التأمين بس نحن خذناها من محطة القيطار فعلشان جي طلعت علينا غاليه بس في المكاتب اللي برع تطلع ع 2500 درهم بس نحن كنا نبا نخلص كل شي ونرتاح .. .. وخذنا مفتاح الغرفه وسرنا نرتاح وبصراحه في ها اليوم ما صورت لكم شي من التعب ولان الوقت متأخر …

وفي تاريخ 14 / 7 / 2024 نشينا الساعه 9 الصبح لان الجيك آوت الساعه 11 ورتبنا الشنطه وطلعنا وسلمنا لهم المفتاح واتجهنا صوب محطة (( الهابنهوف )) في شارع المارين بس بقولكم شي لازم تكون عندكم (( بطاقة الفيزا كارد )) لان ما ياخذون كاش .. الحمدلله استلمنا السياره وموجود فيها القارمن وارتحنا راحه نفسيه والله ..

وكنا يوعانين ما تريقنا ولا شي وطلعنا بالسياره صوب ماكدونالز وتغدينا

وخلصنا الحمدلله وطلعنا نتمشا شوي من عقب التعب .. وخذت لكم ها الصور من ميونخ

وريلي كان وااايد مضايج يقول ان ميونخ مدينه وضجه وما ارتاح فيها واتفقنا ان نسير النمسا ( زيلامسي ) ..المهم ترجمنا القارمن وخليناه ب ال English ولازم تكتبين اسم الدوله واسم المدينه المهم كتبنا في القارمن اسم الدوله Austiria اللي هي النمسا والمدينه زيلامسي (( Zell am see )) وانطلقنا وها ونحن في الدرب .. تقريبا من ميونخ لزيلامسي ساعتين ونص ..

وها هو القارمن .. والله واااااايد نفعنا ..

.. قبل ما نوصل النمساا لازم ناخذ ستيكر للسياره ونلصقه ع واجهة السياره … وها الستيكر موجود في محطات البترول، علشان نقدر ندخل النمسا واللي تشتغل في محطة البترول قالت عادي تسيرون فيها اوروبا يعني ها الستيكر مثل السالك اللي عدنا في دبي .. المهم دخل ريلي المحطه وخذها ولصقها ع السياره بس نسيت اصورها

وبصراحه الجوو كان رووووووووووعه وقفنا ع طرف ونزلنا نصور

وهاي سيارتنا

وقربنا صوب زيلامسي وكان باقي 2 كيلومتر

وهاي هي الغرفه ومستحيل انسا ها الغرفه لان (( دبلتي )) ضاعت فيها وجلبت الغرفه ودورتها ومالقيتها اوف قهر

وها المنظر من الدريشه

وطلعنا نتمشا وقلنا بنسير نتعشاا وها الشارع اللي مجابل البيت

بس بنات على فكره الفنادق اغلى بوايد .. بس اذا بتسكنون في البيت ويا اهل البيت يطلع ارخص بوايد..

الجزء الثاني

تاريخ15 / 7 /

وهاي واجهة البيت من برع

وهني كنا موقفين السياره

وهني ركبنا قمة اليبل بالسياره والله مكان يخوف وااايد

وكانت الساعه

وخذنا تذاكر

وركبنا التلفريك

وصلنا فوق وتمشينا

وكان وقت الغدا وشفنا ها المطعم في قمة اليبل طبعاا

وخلصنا ونزلنا تحت بالتلفريك وسرنا نتحوط في القريه

ونحن نتمشا شفنا القوارب وكل الناس راكبين واستأجرنا قارب لمدة نص ساعه وها الصور ونحن في القارب ،، ونزلت لكم صور واااااايد ونحن في القارب بس بصراحه مناظر رووووووعه والجو احلى وبخليكم ويا المناظر اللي ترد الروح

اول ماركبنا القارب

وهني بدت اختكم ( أحبـ M ـك ) تتفلسف في السواقه في النمسا خخخخخخخ زين ماعطوني الليسن

شحالكم بنات وشخباركم ..؟؟

العنوان واااضح ..

بنزل لكم تقرير كاااااااامل عن (( باريس )) ..

انا كنت منزله ها التقرير بس المشكله ان كل الصور امتسحت والحين رديت ونزلت ها التقرير مره ثانيه لان في بنات طرشوا لي رسايل وقالوا ان يبون يشوفون الصور 

الحمدلله الله تمم عرسي على خير .. وعرست تاريخ 19 / 6 / 2024 والحمدلله كان احلى يوم في حياتي .. وتاريخ 22 / 6 / 2024 سافرنا شهر العسل إلى (( باريس )) .. وطبعااا ما نسيتكم وصورت لكم كل شي .. واتمنى القى ردود حلوه منكم.. مدة الرحله كانت 9 ايام
لاتنسوني من دعواتكم ان الله يوفقني في حياتي اليديده ….
تاريخ المغادره 22 / 6 /
تاريخ العوده 30 / 6 / 2024

مدة الرحله في الطياره تقريبا 6 ساعات ..

كنت استعمل كيمرا Kodak .. وهاي صورتها 12 ميغابيكسل

هاي البطاقه لباب للغرفه

هاي الخريطه وين مكانه بالضبط عن شارع الشانزليزيه

وصلنا تاريخ 22 / 6 / 2024 تقريبا الساعه 7 المغرب .. وخلصنا الاجراءات في المطار والحمدلله خلصنا بسرعه وخذنا الشنط وسرنا الفندق .. تقريبا 40 دقيقه من المطار للفندق .. وانا ما كنت ادري بأي شي. وكنت وايد احاتي كيف بنحصل سكن .. بس ريلي الله يطول في عمره كان مرتب الرحله كامله حاجز الفندق ومخلص كل شي ..

نزلنا من الفندق وسرنا قوس النصر وتصورنا فيه وطلعنا ولفينا مشي من الساعه 1 لين الساعه 5 العصر كنا نستكشف باريس .. وسرنا ع الساعه 5 ونص برج ايفل وبصراحه ها البرج فضيع روووعه وركبنا من الطابق الاول لين الطابق الثالث والمنظر من فوق ما يتفوت شفنا باريس بكبرها ..
اسمحووولي بنات انا صورت كل شي من بداية الرحله لين ما ردينا بس الصور اللي في تاريخ 22 / 6 و تاريخ 23 / 6 امتسحت وباقي التقرير كله بيكون بالصور ان شاء الله ..

بس لقيت لكم كم صوره

هاذا قوس النصر

وهاذا برج ايفل ..

تاريخ 24 / 6 / 2024

طلعنا من الفندق وقلنا بنستكشف المحلات اللي في شارع الشانزليزيه والمحلات كله ماركات عالميه وها المحل المشهور في الشارع اسمه (( سيفورا )) للعطور والمكياج .. وموجود عدنا في الامارات في مركز دبي فيستيفال سيتي

وخلصنا من الشارع وسرنا آخر الشارع وشفنا مباني وايد حلوه .

وهاذا مطعم فيه اكل فرنسي واكل امريكي

وهاذا ميدان الكونكورد

وفي ها الصوره برج ايفل طالع

وتمشينا ولقينا كوشك صغير يبيعون فيه سندويشات ومشروبات خذنا كوكاكولا وخذنا الخبز بالنوتيلا اي وحده تسير لازم اجربه وهو في كل مكان يبيعونه يسوون الخبز جدامج ويحطون عليه كاكاو النوتيلا والله لذيييذ ،، صح انه يبيعون منه في السينما بس اللي في باريس غير والله

ولقينا بحيره صغيره ..

وهاي حديقة ..

..

وصلنا آخر الحديقه وحصلنا متحف اللوفر .. كنا بندخل بس حسينا ان ما شي وقت .. وقلنا بنسير له باجر العصر ..وطلعنا من الحديقه ..

تاريخ 25 / 6 / 2024

في ها اليوم سرنا متحف اللوفر.. ها المتحف اعتقد انه كان قصر وبصراحه فخم واااااااااااااااايد.. وحلوو واايد يعني اذا حد بيسير ويبا يلفه كامل ياخذ 4 ساعات يعني مشي من الخاطر فيه ..
وهاي بوابة المتحف

وهني ندخل من ها الهرم وننزل تحت بالسلم المتحرك .. بس قبل ما ننزل من السلم المتحرك في تفتيش يعني اللي يشل وياه شنطه ولا شي لازم يفتشونه .. ونزلنا وخذنا تذكره الشخص ب 6 يووروو …يعني ب 30 درهم .. وفي عندهم خريطه للمتحف كاامل وفي بكل اللغات حتا اللغه العربيه موجوده

وهاذي هي التذكره

وهاي هي الخريطه

وهني فتحت لكم اياها وصورتها كامله

ويوم شفنا ان المتحف وايد كبير ولازم نمشي فيه واااايد قلناا لازم نشرب وناكل شي وفي كوفي تحت صغير .. خذت سندويج دياي وبيبسي .. بصراحه البيبسي اللي في باريس يرد الرووح طعمه حلوو وايد احلى من البيبسي اللي عدنا

المهم تمشينا وشفنا في الخريطه ان (( الموناليزا )) موجوده في المتحف قلنا لازم نسير ونطالعها ..

تمشينا مشي لين ما وصلناها وشفنا الناس كلهم متيمعين ع الصوره ,,

وهاي هي صورة الموناليزا المشهوره .. ما يسوى علينا لفينا المتحف لف علشان ندورها وآخر شي تطلع ها الصوره الصغيره ..هههههههه

والحين بحط لكم صور وااايد من المتحف وشوفوا فخامة القصر وكيف عايشين الملوك عندهم .. كل شي له فخامته . . يمكن تملون من الصور في المتحف بس في ناس تحب تشوف ها الصور والسموحه بخليكم ويا الصور ..

وهاذا صورة الصقف وااايد حلوو ..