شحالكن خواتي ؟
تقريري اليوم عن رحلتنا إلى الفجيرة في اجازة اليوم الوطني وبالتحديد تاريخ 3 / 12 / 2024
التقرير بسيط ومختصر بس ان شاء الله تستانسون ويانا ^_^
قبل الرحلة بـ يومين اتصلت فيني بنت عم امي وقالتلي بنطلع رحلة صوب الفجيرة بتخاوينا ؟ قلتلها فووقه ما يبالها كلام 
المهم ليلة الرحلة كنا سهرانات نحن البنات ونسولف بالتيلفون ونتفق شو بنلبس و شو بنسوي ونهذرب لين الساعة 5 الفير وبعدين انخمدنا بسلام خخخ
المفروض الساعة 7 الصبح بنت عمي تاخذني من بيتنا بس راحت علينا نومه وما حسيت الا الساعة 8 حد يدق باب الغرفه ويوم فتحت الباب وكشتي ناقعه ولا اشوفهن كلهن عند الباب ما شاء الله هجووم لني ما رديت على الموبايل لول
المهم اتلبست بسرعة و سرنا بيتهم واتيمعنا كلنا هناك وانطلقنا صوب الفجيرة و كنا 5 سيارات ما شاء الله
وقفنا في الدرب نزلنا في بقعه اتريقنا وارتحنا شوي وبعدين اتحركنا بس كنت تعبانه شوي ومب متفيجه للتصوير ..
الدرب كان طوويل الصراحة ومرينا على وايد مناطق مثل مسافي و دبا الفجيرة و الفقيت والجو كان رووعة في الفقيت واايد عوائل وشباب مخيمين والاجواء حلوة والبحر زحمة ما ينشاف من كثر الخيم ما شاء الله
طبعاً نحن البنات طول الدرب نسولف في السيارة وياحبنا للسوالف اللي ما تخلص
وأخيراً وصلنا بالسلامة للمنطقة اللي بننزل فيها بين دبا وخورفكان وكان المكان روووعة على البحر و شفنا عوائل بعيالهم يلعبون دراجات ما شاء الله والناس مبسطين ومستانسين بس مب زحمة شرات الفقيت
لكن للأسف ماعرفت شو اسم المنطقة وسئلت بس محد جاوبني .. اللي عرفته ان هالبحر هو خليج عمان وان شاء الله بنات المنطقة الشرقية يخبرونا ^_^
طبعاً اول ما وصلنا حطينا الأغراض وارتحنا وبعدين مشينا انا وبنت عمي في جولة استكشافية تصويرية خخخ ؛ هي بكاميرتها وانا بالموبايل لني كنت ناسيه الكاميرا في البيت للأسف .. عشان جيه اعذروني على التصوير التعبان لأن كاميرا الموبايل 5 ميجابكسل ..
الصراحة المكان خبااااال لأنه يجمع بين البحر والجبال والمناظر رهيبه واحلى شي البيوت الجديمه المهجورة على السيف حسستني باجواء الماضي الجميل وايام الغوص والفرجان الصغيرة والسكيك والحياة البسيطة بتعبها وحلاوتها 
اممم مادري ياني احساس غريب وانا اتمشى بين هالخرايب وادخل فيها ! يلست اتخيل كيف كانت عيشتهم ؟ حسيت بالحنين للماضي لأن كل شي على حاله ما اتغير .. سبحان الله كيف كانت هالمنطقة فيها حياة وناس وفجأه صارت مهجورة ! .. على فكرة انا وايد احب هالأماكن ويضحكون علي يوم اصورها ^_^
اتذكرت قصيدة الشاعر أحمد علي الكندي .. اللي يقول فيها :
لقيت الدار من عقب الحبايـب .. خليّه باكيـه وبهـا عجايـب
وقفت ابها وانا حيـران ساعـه .. ودمع العين من موقي صبايـب
الا يـــا دار بالله خبـريـنـي .. عن المحبوب قولي وين غايـب
تقول الدار عقبـك غادرونـي .. وخلونـي لعيـات الهبـايـب
وسافر من تـود وحـال دونـه .. بحر وبرور واخطار ومصايب
رجعت بحسرتي وهموم صدري .. وتقلاني مـن العبـره لهايـب
يوم شفت هالمنظر اتذكرت الآية القرآنية .. قال تعالى :
(فَتَرَى الْقَوْمَ فِيهَا صَرْعَى كَأَنَّهُمْ أَعْجَازُ نَخْلٍ خَاوِيَةٍ)
سبحان الله 
لاحظوا الرمل كيف نااااعم .. احلى شي يوم تركضين عليه ونااسة ^.^
طبعاً انا وحده ما اقاوم اغرااء البحر .. !
دخلت غاوصت ولعبت في الماي وكل شوي اتجدم اكثر لين ما وصلني الماي لين الركب و سحبت البنات ويايه واستااانسنا واتخرسنا لول
هذا غدانا دياي مشوي ع الفحم .. كنا مسوين 20 ديايه ما شاء الله واتغدينا العصر
حياكم اقربوا 
و بعد الغدا سرنا نتمشى على السيف لين الغروب وكان الجو خياالي والهوا يرد الرووح والمكان قمة في الرومانسية وانا وحده من عشّاق الغروب ^.^
صورتلكم بعض الصور قبل الغروب لأن الموبايل فضّى بعدين للأسف :
مركون بين البحر والبيت وحداني !
أبني لـروحي أمــل وجروحي تهدّه
و أمر "قبل الغروب" أرتّب أحزاني
أطوي شراع الهوى وأنوح وآمدّه
لا يا بحر منهو اللي ناسي الثاني؟
أنا ولا اللي هجر شاطيك من مدّه؟!
:
:
بعدين شلينا أغراضنا واتوكلنا على الله وصلينا المغرب في مسيد قريب ^.^
و انطلقنا صوب المزرعة في راس الخيمة ..
طبعاً نحن البنات كنا سهرانات ومارقدنا عدل فليل عسب جيه اول ما ركبنا السيارة طحنا على بعض و رقاااد لين ما وصلنا المزرعة خذنا ساعة تقريباً ما حسينا فيها من التعب
و كملنا السهرة في المزرعة اتعشينا وبعد العشا شوينا بطاط و ذرة وشربنا جاي كرك ويلسنا سوالف وعلوم وضحك لين الساعة 10 فليل طلعنا من المزرعة و ردينا الشارجة بالسلامة ..
و جيه نكون وصلنا إلى نهاية الرحلة وان شاء الله ينال التقرير المتواضع على اعجابكم ^.^
دمتم بحفظ الرحمن ..
حلوووووووووووووووووووووووه لفجيرة وايد
لقيت الدار من عقب الحبايـب .. خليّه باكيـه وبهـا عجايـب
وقفت ابها وانا حيـران ساعـه .. ودمع العين من موقي صبايـب
الا يـــا دار بالله خبـريـنـي .. عن المحبوب قولي وين غايـب
تقول الدار عقبـك غادرونـي .. وخلونـي لعيـات الهبـايـب
وسافر من تـود وحـال دونـه .. بحر وبرور واخطار ومصايب
رجعت بحسرتي وهموم صدري .. وتقلاني مـن العبـره لهايـب
والله انج خطيره الشعر ع الصور ..
يتني غبنه صدقتي والله.
والصور حلللللللللوه ومعبره وايد..
رووووووعه المكان
لقيت الدار من عقب الحبايـب .. خليّه باكيـه وبهـا عجايـب
وقفت ابها وانا حيـران ساعـه .. ودمع العين من موقي صبايـب
احب هالمقطع وايد
مشكورة على التقرير المصور ..وتصويرج روعه
تسلم ايدج وعنونج هههه