بناء على رغبة الكثير من الاخوات عن معرفة معلومات اضافيه .. عن .. موقع بوكينج ..وبدل مااكتب ايميلات .. بكتبه في موضوع يديد وخلي كل البنات ان شالله يستفيدن..
بما ان لي خبره شبه طويله في هالموقع .. وحبي للسفر والاستجمام والاستمتاع بفنادق البلاد والاماكن السياحيه في بلادنا الغاليه الامارات.. حبيت افيد اخواتي بهذا الموضوع ..
تعريف موقع //www.booking.com:
هو موقع يشمل معظم الفنادق في معظم المدن .. واهمها لندن.باريس.روما.وطبعا دبي. وهو موقع مضمون.
شروط الحجز:
بكل بساطه فيزا كارد او رقم اي بطاقة سارية المفعول. بس انا عن نفسي اشتري بطاقة خاصه للانترنيت فيها مبلغ بسيط . وذلك لتجنب اي مشكله او نصب. وطبعا لما تروحون الفندق ادفعو كاش عادي.
ايجابياته :
1- يشمل معظم الفنادق
2- يزودج بمعلومات بالاماكن القريبه من الفندق( سواء مولات مراكز او اماكن سياحيه او فنادق ثانيه. يعطيج فكره عن اسعار الفنادق بالترتيب يعني من الارخص للاغلا والعكس)
3- يصنف الفنادق على فئأت مختلفة (مثلا .. حسب عدد النجوم 5 نجوم 4 نجوم الى اخره وعلى حسب اشياء ثانيه بعد مثلا العايلة . اصدقاء . اطفال . مجموعات كبيرة . او على حسب الغرفة مزدوجه او مفرده.)
4- تقدرين تختارين اي عملة تبينها.
سلبياته:
1- السعر اللى يحطونه يوضح الغرفه اللى ماعليها خدمات نهائيا .. ستاندر ..ويكون سعرها اقل بوايد عن باقي الغرف.
2- لو ماكانت الغرفه ستاندر وفيها خدمات .. ساعات الموقع مايقول لج ان شي مبلغ اضافي مقابل الخدمات ..فتتفاجين في الفندق ان عليج 500 درهم مثلا اضافيه للخدمه.
3- في حالة كنسلتي الحجز قبل الوصول بفتره .. يتم سحب مبلغ من البطاقة المستخدمة. وطبعا هالشي في كل الفنادق يصير… يعني لازم تلغين الحجز قبل بوقت .. وهالتاريخ يكون محدد.. ومكتوب..
4- مايعطيج معلومات كافيه عن الفندق نفسه. يعني وسائل الترفيه في الفندق السبا السوق او اي كوبونات ممكن الفندق يعطيج اياها. وماتقدرين تتشرطين وتطلبين غرفه على مزاجج .
مايجب مراعاته عند الحجز..
بكل بساطه تكتبين اسم المدينة اللى تبين تحجزين فيها والتاريخ…
لازم يوم تحجزين .. اتدورين في الموقع .. وتختارين الفندق. وعقب تقارنين بين السعر في الموقع وفي موقع الفندق نفسه . والفرق بالغرف . لو ماشي فرق احجزي من موقع الفندق نفسه اظمن واسلم . ولو الفرق كبير احجزي من الموقع بس في البدايه … اتصلي بالفندق وتاكدي اذا شي سيرفس جارج اضافي والا لا ؟؟
وبعد الحجز اتصلي بالفندق .. وتاكدي من الغرفه واذا عليها سيرفس جارج اضافي والا لا واذا هي الغرفه اللى تبينها والا لا ؟ وشو الاشياء الترفيهه الثانيه الموجوده في الفندق ؟ والافضل انج تدخلين على موقع الفندق نفسه وتشوفين اراء الناس وشو الاشياء الثانيه الموجوده في الفندق ويمكن الاستمتاع فيها..
بشكل عام .. نفس الاسعار في موقع الفندق نفسه وفي موقع بوكنج .. بس في موقع بوكنج مايوضحون لج السيرفس جارج..!!
اي سؤال انا حاضره خواتيه
يزاج الله خير حبيبتي وإن شاءالله موضوعج بيفيد البنات
يزاج الله خير ..
و ان شاء الله البنات بيستفيدون من هالنقاط 
ماشالله عليج يعني لو كنت ابا اسير صوب الفجير في الصيف انا وعيالي 2 صغار فباخذ حجره وحده فشو رايج تنصحيني بخصوص الفنادق لاني اول مره ابات في فندق واخاف من الفنادق وشو بخصوص السيرفس قصدج انهم مايون ينظفون ويبدون الفرش ؟
يزاج الله خير
المشاركة الأصلية كتبت بواسطة ام عبوودي 
تسلمين فديتج …
المشاركة الأصلية كتبت بواسطة Roo7_AD و ان شاء الله البنات بيستفيدون من هالنقاط
حياج الله .. واسعدني مرورج
