زايد او التقنيه

المهم يعني جيه انا دخلت جامعة زايد ع اساس ابا ادش دراسات دوليه بس يعني اللي جفته من ربعي اللي يدرسونه جيه وايد صعبو انه يباله ناس انجليزي فل و هيك يعني و يحبون يقرون وايد و يكتبون انا كنت محتاره من قبل هندسه الكترونيه في كلية التقنيه ولا ها دراسات دوليه ادري مايخصهم في بعض و جيه بس انا حابه هالتخصصين <<<<

الحين انا اخاف اكمل في زايد و اندم لان وايد خايفه من الدراسات الدوليه …. و بعد خايفه انقل التقنيه بس انا مشكلتي في الحياه الكليه ما احبها بس ابي هالتخصص لان فيها شو الحل ادري جيه و ايد رمست و احس نص كلامي ما منه فايده

انتو شو تنصحوني التقنيه ولا زايد

في كل مكان و كل تخصص له صعوباته الخاصة ..

و اللي صج حابة التخصص بيقدر يكمل في مجاله و يبدع ..

إذا على الإنقلش بالنسبة للدراسات الدولية فترا في لفلات تقوية الإنجلش في جامعة زايد .. بتساعدج تقوين لغتج ..

و بعدين في ثلاث مواد تعلمج الرايتنغ في متطلبات الجامعة بعد ..

أهم شي إنتي تشوفين نفسج هل إنتي من النوع اللي فعلاً يحب يقرا مقالات و أشيا طويلة وايد أو لا ..

هل إنتي فعلاً عندج شغف بالدراسة عن الدول و الأحداث السياسية و غيرها و لا لا ؟

و بعد حبيت أضيف فكري من ناحية إنه الهندسة أكيد بيكون فيها عملي تجارب مثلاً و غيره ..

أما الدراسات الدولية فيعتمد أكثر على القراية و الكتابة و إنه نوعاً ما لازم تكون عندج شخصية لان عقب ممكن تجابلين كبار الشخصيات أو تشتغلين في وزارة الخارجية – سفارة من السفارات مثلاً و هيك يعني

ففكري إنتي تحسين نفسج وين أكثر..

فهذا يباله تفكير جدي + الاستخارة أهم شي طبعاً

**

و على فكره إذا إنتي كارهه التقنية و تدرسين أصلاً في جامعة زايد حالياً فخلاص ليش ما تفكرين في التخصصات الثانية الموجودة في زايد ..

و إذا عندج أي سؤال عن التخصصات الثانية

و بشكل عام هاي الكليات الموجودة في الجامعة و فيها تخصصات مختلفة تحتها طبعاً:

– عندج كلية علوم الإدارة
– كلية الابتكار التقني ( IT )
– كلية التربية
– كلية الإعلام و علوم الاتصال
– كلية آداب و علوم الاستدامة
– كلية الفنون و الصناعات الإبداعية

فالج طيب ..