شفط الدهون وشد الجلد بالليزر

أنا شاركت معاكم في موضوع عملية شد البطن قبل 5 شهور وحكيت قصتي بالتفصيل،،، اليوم عندي خبر جديد اللي هو شفط الدهون وشد الجلد بالليزر اسمه slim lipo طبعا كالعادة بعد البحث والسؤال والاتصال مع الدكتور قالي انه يشفط الدهون ويشد

أكيد بتسالون ليش ما سويت البطن ؟؟ أنا سالت والدكتور قال ما ينفع لانه العضلات ضعيفة والبطن وايد مترهل لازم عملية ومثل ما خبرتكم قبل اني سويتها والنتيجة بفضل الله ممتازة

انزين الحين نرجع لموضوعنا ،،، كنت بإجازة في الأردن طبعا الدكتور بالأردن أخذت موعد الاستشارة يوم الأحد اللي طاف بتاريخ 11/4ورحت عنده وشاف الاماكن اللي ابي اسوي فيها شفط وشد عشان ارد أسافر الأردن بشه 12 على إجازة نص السنة ولكن تفاجات انه قالي اذا ابي اسوي اقدر اسويها يوم الثلاثاء تاريخ 11/6 !!!!!

قلت بسال زوجي وبردلك خبر قال أوكي وسالت زوجي وقالي أوكي !!!!

وخبرت الدكتور اني بسويها بالتاريخ اللي اتفقنا عليه وسويتها

بكرة اخبركم التفاصيل وغدا لنا لقاء تصبحون على خير  

اليوم الاول تاريخ ١١/٦ سرت العيادة الساعة ٩:٣٠ صباحا سويت فحص دم طبعا كنت صائمة ،، بعدين سوولي ادخال للمستشفى هي ما فيها اقامة تطلعين بنفس اليوم،،، اترييت لين ما طلعت نتيجة التحليل واخذوني للعمليات الساعة ١٢:٣٠ ظهرا،،، اجى الدكتور بس قبلها غسلتني الممرضة بمطهر وماء معقم،،

بعدين الدكتور سوى علامات حق المناطق اللي يبالها شفط،،، ورقدت على السرير واعطوني إبرة عشان أنام وما احس بشيء لان التخدير موضعي مع إبرة يعني مش تخدير كامل،، أنا صحوت في نص العملية وحسيت بشوية ضغط بس بدون الم ،،، وما صحيت الا وانا على السرير،،، كان زوجي موجود وكنت اكلمه وانا مدوخه المهم تركني علشان ارتاح وردلي الساعة ٦ مساء وكنت بعدني مدوخه والآلام كانت محتملة مثل ضربات على الجسم ،، يعني ما يحتاج مسكنات مثل عملية شد البطن اعطوني بس مضاد وبروفين للالم عند الحاجة وبنادول

المهم كنت لابسة المشد طبعا مشد كامل من اليد الى الرجل لانه اماكن الشفط كانت كالتالي :

– اليد من الأسفل
– الجوانب مع الظهر
– المعدة واسفل البطن شويه
– الأفخاذ من الداخل والامام
مجموع الخبوق ١٠

هي العملية عبارة عن ادخال مثل سيخ رفيع جداً والخبق صغير جداً مثل اي جرح صغير وبعد ما قمت كانت هذي الاماكن تنزل سوائل ودم والمشد كله كان مثل الماي

حتى الملابس تلبسينها وعلطول تبتل بالسوائل بس اول يوم ورحت البيت والوضع كان تمام بعون الله وبالطبع صليت استخارة قبل العملية والحمدلله ربنا وفقني،،،

اليوم الثاني
نمت وقمت حسيت بالالم اكثر شوي أخذت الأدوية ويعني ماشي الحال،،، بس مافي سوائل او دم بس تنفخت اطرافي يعني اليدين والرجلين وقالي الدكتور عادي أشلحي المشد لين ما ترد الى وضعها الطبيعي وبعدين البسيه،،، وفعلا سويت اللي قالها
بعد المغرب أخذت شاور وطهرت اماكن الجروح وحطيت عليه بلاستر بس ولبست المشد وكل شي طبيعي،،، الانتفاخ قعد معاي لين ثالث يوم والالم بعد يعني مش وايد بس تعرفون لما تنامي على ظهرتج يؤلم نفس الم الجرح القوي يعني محتمل

المهم تحملت كل شي لانه أكيد اللي يبي شي لازم يتحمل صح !!!!

رابع يوم العملية كان موعد سفري والدكتور قال مافي مشكلة اني أسافر ،،، طبعا ما في مشكلة بس لما تكوني على كراسي ال economy تعرفون مول موب مريحة،، الحمدلله وصلت بالسلامة طبعا اي احد يسافر يكون تعبان فما بالكم اذا عاملة عملية يعني تعب زيادة

الحمدلله الامور على ما يرام لحد الان وان شاء الله بكون معاكم انقلكم الاحداث واخبركم شو صار معي مثل ما خبرتكم عن عملية شد البطن

الامور التي يجب عملها بعد العملية هي :
المشي لمدة نصف ساعة يوميا
شرب ليترين من الماء عشان تطلع السوائل والدهون اللي تفتت

وان شاء الله تتم الامور على خير واللي عندها اي استفسار أنا على أتم الاستعداد كل العادة

ارجو اني اكون قد أفدتكم لأني ادري اني كنت اتمنى حد يفيدني بهاذي المواضيع
وان شاء الله لنا لقاء حتى اخبركم التفاصيل طبعا النتيجة تبين من ٤-٦ اسابيع ولازم بالطبع تخفيف الاكل والمشي مثل ما قلت